ជាតិ
លោកស្រី ស្មីត ស្នើឲ្យរដ្ឋាភិបាលបើកចំហសេរីភាពព័ត៌មាន និងទម្លាក់បទចោទពីអតីតអ្នកកាសែតពីររូប
អ្នកស្រី ស្មីត ផ្តល់បទសម្ភាសដល់អ្នកកាសែត ក្រោយជួបលោក អង្គ វង្ស វឌ្ឍានា រដ្ឋមន្រ្តីយុត្តិធម៌ នៅថ្ងៃទី២ ខែឧសភា ឆ្នាំ២០១៩
×![]()
ដោយ: ធឿន បញ្ញាឬទិ្ធ
ភ្នំពេញ៖ អ្នករាយការណ៍ពិសេសទទួលបន្ទុកសិទ្ធិមនុស្សនៃអង្គការសហប្រជាតិ ស្នើឲ្យរដ្ឋាភិបាលបើកចំហសេរីភាពសារព័ត៌មាន ហើយទម្លាក់ការចោទប្រកាន់លើអតីតអ្នកកាសែតអាស៊ីសេរីចំនួន២រូប។ ការលើកឡើងរបស់អ្នករាយការណ៍ពិសេសរូបនេះ ធ្វើឡើងស្របពេលដែលនាយករដ្ឋមន្ត្រីកម្ពុជា អះអាងថា រដ្ឋាភិបាលខ្លួន បានធានានូវសេរីភាពនៃការផ្សាយព័ត៌មាន តាមស្មារតីរដ្ឋធម្មនុញ្ញ និងច្បាប់ស្តីពីរបបសារព័ត៌មាន ។
លោកស្រី រ៉ូណាល់ ស្មីត ដែលកំពុងទស្សនកិច្ចនៅកម្ពុជា បានបង្ហាញក្តីកង្វល់ពីសេរីភាពសារព័ត៌មាន ក្នុងការផ្សព្វផ្សាយពីចំណុចសំខាន់ចាំបាច់ និងមានឥទ្ធិពល សម្រាប់ការជជែកដេញដោល ក្នុងន័យស្ថាបនាជុំវិញបញ្ហាសង្គម សេដ្ឋកិច្ច និងនយោបាយនៅកម្ពុជា។ អ្វីដែលនាំចិត្តលោកស្រី ស្មីត ឲ្យក្តីព្រួយបារម្ភនោះ គឺដោយសារការធ្លាក់ចុះ១ពិន្ទុបន្ថែមទៀត ជាប់ចំណាត់ថ្នាក់លេខ១៤៣ នៅក្នុងសន្ទស្សន៍សេរីភាពសារព័ត៌មានពិភពលោករបស់អ្នករាយការណ៍គ្មានព្រំដែន កាលពីឆ្នាំ២០១៨។
អមជាមួយការព្រួយបារម្ភនេះ អ្នករាយការណ៍ពិសេស ស្នើឲ្យរដ្ឋាភិបាលបើកចំហរសេរីភាពសារព័ត៌មាន និងទម្លាក់ការចោទប្រកាន់លើអតីតអ្នកកាសែតវិទ្យុអាស៊ីសេរី ២រូបផងដែរ។ តាមរយៈហ្វេសប៊ុក អ្នករាយការណ៍ពិសេសរូបនេះ ដែលមានទាំងភាសាខ្មែរ និងអង់គ្លេស នៅក្នុងទិវាសេរីភាពសារព័ត៌មានពិភពលោកលើកទី២៦ ក្នុងន័យដូច្នេះថា៖«ខ្ញុំសូមលើកទឹកចិត្តឲ្យរដ្ឋាភិបាលផ្តល់លំហសម្រាប់សេរីភាពរបស់ប្រព័ន្ធផ្សព្វផ្សាយ ទាំងតាមOnline និងទាំង Offline រួមទាំងតាមរយៈការអនុម័ត និងការអនុវត្តសេចក្តីព្រាងច្បាប់ស្តីពីសិទ្ធិទទួលព័ត៌មាន។ ខ្ញុំសូមជំរុញលើកទឹកចិត្តជាថ្មីម្តងទៀត ឲ្យទម្លាក់ការចោទប្រកាន់លើអតីតអ្នកសារព័ត៌មានវិទ្យុអាស៊ីសេរីទាំងពីរនាក់ផងដែរ»។
សម្តេចនាយករដ្ឋមន្ត្រី ហ៊ុន សែន ក៏មានសារលិខិតមួយដែរ សម្រាប់ចូលរួមអបអរសាទរទិវាសេរីភាពសារព័ត៌មានពិភពលោកលើកទី២៦នេះ។ ក្នុងសារលិខិត សម្តេចនាយករដ្ឋមន្ត្រី បានសរសេរថា រដ្ឋាភិបាលកម្ពុជា បានគោរពយ៉ាងហ្មត់ចត់តាមស្មារតីរដ្ឋធម្មនុញ្ញ និងច្បាប់ស្តីពីរបបសារព័ត៌មាន ដែលធានាបាននូវសេរីភាពនៃការផ្សាយព័ត៌មាន ដោយគ្មានការត្រួតពិនិត្យជាមុន សិទ្ធិរក្សាការសម្ងាត់ស្តីពីប្រភពព័ត៌មានរបស់ខ្លួន និងសេរីភាពនៃការបញ្ចេញមតិដោយគ្មានការទទួលព្រហ្មទណ្ឌ។
រដ្ឋាភិបាល ក៏បានអនុញ្ញាតឲ្យជនបរទេសធ្វើជាម្ចាស់ប្រព័ន្ធផ្សព្វផ្សាយផងដែរ ដែលត្រូវបានគេមើលឃើញថា កម្ពុជា មានសេរីភាពខាងសារព័ត៌មានជាងប្រទេស ដែលកាន់របបប្រជាធិបតេយ្យមួយចំនួន នៅក្នុងតំបន់អាស៊ាន។ នេះជាសំណេររបស់សម្តេចនាយករដ្ឋមន្ត្រី ដដែល។
ប្រមុខរដ្ឋាភិបាលកម្ពុជា បានបញ្ជាក់ ក្នុងសារលិខិតបែបនេះថា «ការបើកទូលាយនូវសេរីភាពសារព័ត៌មាននៅកម្ពុជា បានធ្វើឲ្យវិស័យនេះ មានការរីកចម្រើនលូតលាស់យ៉ាងឆាប់រហ័សទាំងព័ត៌មានបោះពុម្ភផ្សាយ សារព័ត៌មានអេឡិចត្រូនិក និងប្រព័ន្ធផ្សព្វផ្សាយតាមអនឡាញដែលមាននិន្នាការផ្សេងៗគ្នា ស្របតាមស្ថានភាពនយោបាយ និងការវិវឌ្ឍនៃបច្ចេកវិទ្យាទំនើបនាពេលបច្ចុប្បន្ន ដែលអាចផ្សព្វផ្សាយ និងចែករំលែកព័ត៌មានទូទាំងសាកលលោកបានយ៉ាងឆាប់រហ័ស»។
របាយការណ៍ World Press Freedom Index របស់អង្គការអ្នកកាសែតគ្មានព្រំដែន (Reporters Without Borders) ដែលចេញផ្សាយកាលពីពេលថ្មីៗកន្លងមកនេះ បានបង្ហាញថា កម្ពុជាស្ថិតនៅចំណាត់ថ្នាក់លេខ១៤៣ក្នុងចំណោម១៨០ប្រទេស។ ន័រវេសស្ថិតនៅលើកំពូលតារាងដែលប្រសើរដាច់គ្នា ខណៈតួកមេនីស្ថាន ជាកន្លែងដែលគ្រោះថ្នាក់ខ្លាំងជាងគេសម្រាប់សេរីភាពសារព័ត៌មាន។
គួរបញ្ជាក់ថា ទិវាសេរីភាពសារព័ត៌មានពិភពលោក ត្រូវបានអង្គការសហប្រជាជាតិ ប្រកាសទទួលជាផ្លូវការ កាលពីឆ្នាំ១៩៩៣៕
Tag:
រ៉ូណាល់ ស្មីត
សិទ្ធិមនុស្ស
UN
© រក្សាសិទ្ធិដោយ thmeythmey.com
