អត្ថបទពាណិជ្ជកម្ម
និស្សិតកម្ពុជា ទៅចូលរួមការប្រកួតថ្នាក់អាស៊ាន អំពីបដិវត្តន៍ឧស្សាហកម្ម៤.០
×![]()
ដោយ: ថ្មីៗ
កាលពីថ្ងៃទី២៦ ខែមេសា ឆ្នាំ២០១៩កន្លងទៅនេះ ក្រុមហ៊ុនDeloitte បានរកឃើញជ័យលាភីប្រចាំប្រទេសកម្ពុជា ដែលនឹងទៅប្រកួតក្នុងថ្នាក់តំបន់អាស៊ាន ក្នុងខែមិថុនាខាងមុខ ក្រោយការប្រកួតយ៉ាងស្វិតស្វាញ ពី៦០ក្រុម មកពីសាកលវិទ្យាល័យនានា ក្រោមការប្រកួតប្រាជ្ញាហានិភ័យ ឬហៅជាភាសាអង់គ្លេស Risk Intelligence Challenge (RIC) រៀបចំដោយក្រុមហ៊ុនDeloitteផ្ទាល់។
រូបភាព៖ ក្រុមជ័យលាភីលេខ១ មកពីសាកលវិទ្យាល័យអន្តរជាតិផារ៉ាហ្គន។
កញ្ញាសៀក បូរមី និស្សិតឆ្នាំទី៣ ជំនាញធនាគារ និងហិរញ្ញវត្ថុ ពីសាកលវិទ្យាល័យអន្តរជាតិផារ៉ាហ្គន និងជាសមាជិកក្រុមជ័យលាភីលេខ១ ប្រចាំប្រទេសកម្ពុជា លើកឡើងថា ការប្រកួតនេះតម្រូវឱ្យនិស្សិត បង្កើតជាក្រុមដែលមានសមាជិក៤នាក់ និងចូលរួមវគ្គផ្ដល់ព័ត៌មាន មុននឹងផ្ញើរបាយការណ៍ ស្រាវជ្រាវពីបដិវត្តន៍ឧស្សាហកម្ម៤.០របស់ខ្លួន ទៅកាន់កម្មវិធី។ ក្នុងរបាយការណ៍ស្រាវជ្រាវនេះ ក្រុមនីមួយៗ ត្រូវជ្រើសរើសវិស័យមួយ ក្នុងចំណោម៤រួមមានទូរគមនាគមន៍ សុខាភិបាល ពាណិជ្ជកម្ម និងផលិតកម្ម និងវិភាគពីហានិភ័យ ក៏ដូចជាស្ថានការណ៍របស់វិស័យនោះ សម្រាប់ប្រទេសកម្ពុជា នៅក្នុងឆ្នាំ២០២៥ខាងមុខ។ វគ្គផ្ដាច់ព្រ័ត្រ គឺតម្រូវឱ្យក្រុមទាំងអស់ វិភាគពីហានិភ័យ និងការវិវត្តន៍ស្ថានការណ៍ របស់ក្រុមហ៊ុនណាមួយក្នុងប្រទេសកម្ពុជា ក្នុងឆ្នាំ២០២៥ ដោយត្រូវធ្វើបទបង្ហាញ នៅចំពោះមុខគណៈកម្មការ។
កញ្ញាទ្រី គីមលី និស្សិតឆ្នាំទី៣ ពីសាកលវិទ្យាល័យអន្តរជាតិផារ៉ាហ្គន និងជាសមាជិកក្រុមរបស់បូរមីដែរនោះ លើកឡើងថា ការប្រកួតនេះ ប្លែកពីការប្រកួតឯទៀត ដែលខ្លួនធ្លាប់ចូលរួម ដោយសារតែវាបានផ្ដោតលើការវិភាគពីហានិភ័យ របស់បដិវត្តន៍ឧស្សាហកម្ម៤.០។ លើសពីនេះ ការប្រកួតក៏មានលក្ខណៈស្មុគស្មាញផងដែរ ដោយសារមានក្រុមជាច្រើនមកប្រកួតប្រជែង ឯលក្ខន្តិករបស់កម្មវិធីក៏ខ្ពស់ ស្របពេលដែលក្រុមរបស់នាង ពិបាកក្នុងការស្វែងរក ទិន្នន័យឲ្យបានសម្បូរបែប សម្រាប់គាំទ្រការស្រាវជ្រាវ។ បើតាម និស្សិតដដែល ដើម្បីដោះស្រាយបញ្ហានេះ ក្រុមរបស់នាង ត្រូវប្រឹងប្រែងស្រាវជ្រាវដើម្បីស្វែងរកទិន្នន័យ ដែលអាចទុកចិត្តបាន។
យុវជន ពៅ សុខុម និស្សិតឆ្នាំទី២ ជំនាញគ្រប់គ្រងប្រព័ន្ធព័ត៌មានវិទ្យា និងជាសមាជិកក្រុមជ័យលាភីទី៣ មកពីសាកលវិទ្យាល័យអន្តរជាតិផារ៉ាហ្គន លើកឡើងថា ក្រុមរបស់ខ្លួន មានការលំបាកមួយចំនួន ដោយសារតែកម្មវិធីមានលក្ខណៈមមាញឹក ដោយខ្លួនត្រូវផ្ញើរបាយការណ៍ស្រាវជ្រាវ ឱ្យទាន់កាលផុតកំណត់ និងមានពេលត្រៀមខ្លួនតិចតួច សម្រាប់ការធ្វើបទបង្ហាញមុខគណៈកម្មការ។
រូបភាព៖ ក្រុមជ័យលាភីលេខ២មកពី សាកលវិទ្យាល័យអាមេរិកាំងភ្នំពេញ។
រូបភាព៖ ក្រុមជ័យលាភីលេខ៣មកពី សាកលវិទ្យាល័យអន្តរជាតិផារ៉ាហ្គន។
គួរបញ្ជាក់ដែរថា ក្រុមចំណាត់ថ្នាក់លេខ១ ដែលនឹងទៅប្រកួតថ្នាក់តំបន់ នៅប្រទេសវៀតណាម មកពីសាកលវិទ្យាល័យអន្តរជាតិផារ៉ាហ្គន បានទទួលប្រាក់រង្វាន់៥០០ដុល្លារ។ រីឯក្រុមចំណាត់ថ្នាក់លេខ២ មកពីសាកលវិទ្យាល័យអាមេរិកាំងភ្នំពេញ ទទួលបាន៣០០ដុល្លារ និង ឯក្រុមចំណាត់ថ្នាក់លេខ៣ មកពីសាកលវិទ្យាល័យអន្តរជាតិផារ៉ាហ្គន ទទួលបាន២០០ដុល្លារ៕
(អត្ថពាណិជ្ជកម្ម)
© រក្សាសិទ្ធិដោយ thmeythmey.com
