ជាតិ
សង្គមជាតិ
លោក ខៀវ កាញារីទ្ធ ពិចារណារៀបចំច្បាប់ កំណត់ឱ្យអ្នកកាសែតកែតម្រូវព័ត៌មាន នៅពេលផ្សាយខុស លោក ខៀវ កាញរីទ្ធ រដ្ឋមន្ត្រីក្រសួងព័ត៌មាន ថ្លែងសន្ទាកថាក្នុងទិវាសេរីភាពសារព័ត៌មានពិភពលោកឆ្នាំ២០១៩ ដែលធ្វើឡើងនៅសណ្ឋាគារFaffles Hotel le Royal នាថ្ងៃទី៣ ឧសភា
× ភ្នំពេញ៖ ក្រសួងព័ត៌មាន នឹងរៀបចំច្បាប់ឱ្យអ្នកកាសែតកែព័ត៌មានឡើងវិញ នៅពេលដែលផ្សាយខុសពីសម្ដីប្រភព ហើយមានការស្នើសុំបកស្រាយបំភ្លឺជាថ្មីពីម្ចាស់សម្តីដើម។ នេះជាការលើកឡើង លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន។
ទិវាសេរីភាពសារព័ត៌មានពិភពលោកឆ្នាំ២០១៩ ដែលធ្វើឡើងនៅសណ្ឋាគារFaffles Hotel le Royal នាថ្ងៃទី៣ ឧសភា លោក ខៀវ កាញារីទ្ធ បាននិយាយថា ក្រសួងបានបង្កើតគណៈកម្មការកែតម្រូវច្បាប់(វិសោធនកម្ម) ស្តីពីរបបសារព័ត៌មានដើម្បីកែសម្រួលមាត្រាមួយចំនួនឱ្យស្របទៅនឹងស្ថានភាពជាក់ស្តែង នាពេលបច្ចុប្បន្ន។ លោកបានបន្តថា ក្រសួងព័ត៌មាន នឹងពិគ្រោះយោបល់ជាមួយសា្ថប័នសារព័ត៌មាន នឹងដៃគូពាក់ព័ន្ធនានា ដើម្បីប្រមូលធាតុចូលបន្ថែមទៀតសម្រាប់ទទួលបានសិទិ្ធសេរីភាពព័ត៌មាន ក្នុងការបញ្ចេញមតិ និងសិទ្ធិទទួលបានព័ត៌មាននៅកម្ពុជា ឱ្យបានកាន់តែប្រសើរថែមទៀត។
លោក ខៀវ កាញារីទ្ធ បានបញ្ជាក់ដូច្នេះ« ការរៀបចំកែតម្រូវច្បាប់សារព័ត៌មាន ដែលយើងបានអនុម័តនៅឆ្នាំ១៩៩៥ គឺយើងធ្វើបានល្អហើយ ប៉ុន្តែមានខ្វះចន្លោះមួយចំនួន។ អ្វីដែលសំខាន់ក្នុងការកែតម្រូវនេះ គឺធ្វើច្បាប់ឆ្លើយតប របស់អ្នកដែលយល់ឃើញថា ការចុះផ្សាយព័ត៌មានមិនត្រឹមត្រូវ ដែលគេសុំកែតម្រូវនៅក្នុងព័ត៌មានបានផ្សាយ។ ដូច្នេះយើងនឹងរៀបចំច្បាប់នេះ ដើម្បីធ្វើជាកាតព្វកិច្ចសម្រាប់អ្នកកាសែត ទូរទស្សន៍ វិទ្យុ នៅពេលណាដែលនិយាយខុស។ អ៊ីចឹងអ្នកដែលយល់ថាគាត់មិនខុស គាត់អាចហៅលិខិតសុំកែតម្រូវ ហើយអ្នកកាសែតត្រូវតែកែតម្រូវព័ត៌មាន នៅពេលដែលយល់ឃើញថាការស្នើសុំកែតម្រូវនោះ វាត្រឹមត្រូវ»។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ផ្តល់បទសម្ភាសឱ្យក្រុមអ្នកសារព័តមាន ក្នុងទិវាសេរីភាពសារព័ត៌មានពិភពលោកឆ្នាំ២០១៩ ដែលធ្វើឡើងនៅសណ្ឋាគារFaffles Hotel le Royal នាថ្ងៃទី៣ ឧសភា
កន្លងមកមានអ្នកកាសែតខ្លះ បាននិយាយ ឬផ្សាយព័ត៌មានខុសពីសម្តីប្រភព ហើយប្រភពសុំឱ្យកែតម្រូវព័ត៌មានឡើងវិញ ប៉ុន្តែអ្នកកាសែតទាំងនោះមិនព្រមកែឱ្យគេដែរ។ ចំពោះការរៀបចំច្បាប់នេះ ផ្តោតសំខាន់ទៅលើអ្នកកាសែត ដែលត្រូវតែមានកាតព្វកិច្ចទទួលខុសត្រូវ លើការកែតម្រូវ ឬសរសេរឡើងវិញ នៅពេលប្រភពបកស្រាយបំភ្លឺ។ ប៉ុន្តែលើកលែងចំពោះការបំភ្លឺទាំងនោះមិនទាន់ត្រឹមត្រូវ។ នេះបើតាមរដ្ឋមន្ត្រីក្រសួងព័ត៌មាន។
បើតាម លោក ខៀវ កាញារីទ្ធ នៅពេលដែលច្បាប់ស្តីពីរបបសារព័ត៌មានបានកែតម្រូវរួច និងដាក់ដំណើរការនោះ អ្នកកាសែតនឹងអាចមានទោសផងដែរ នៅពេលដែលគេប្តឹងពីការនិយាយ សរសេរ និងផ្សាយពត៌មានខុស ដោយមិនព្រមទទួលកែតម្រូវ តាមការបកស្រាយបំភ្លឺ៕
Tag:
សេរីភាពសារព័ត៌មាន
ខៀវ កាញរីទ្ធ
អ្នកកាសែត
© រក្សាសិទ្ធិដោយ thmeythmey.com