កីឡាជាតិ
ជាតិ
សូលទីឡូស្វាគមន៍ទ័ព ប៉ូលិសប៉ះគិរីវង់ រីឯ សុខផេង រំពឹងស៊ុតបាល់បញ្ចូលទីពេលវិសាខាទទួលកំពង់ចាម
កែវ សុខផេង មិនទាន់មានគ្រាប់បាល់បញ្ចូលទីឡើយសម្រាប់វិសាខា។ រូបថតពីទំព័រហ្វេសប៊ុកផ្លូវការរបស់វិសាខា
×![]()
ខ្សែប្រយុទ្ធ កែវ សុខផេង បានបង្ហាញពីអារម្មណ៍មិនសប្បាយចិត្ត ក្រោយមិនអាចរកគ្រាប់បាល់ជូនក្រុមវិសាខា សម្រាប់៥ប្រកួតកន្លងមកក្នុងក្របខណ្ឌមិត្តហ្វូនខេមបូឌានលីគ។ អតីតកីឡាករភ្នំពេញក្រោនរូបនេះ ប្តេជ្ញាថា គេនឹងរកគ្រាប់បាល់ជូនក្រុមឲ្យទាល់តែបាន ពេលវិសាខាបើកទ្វារកីឡដ្ឋានខ្លួនស្វាគមន៍ភ្ញៀវកំពង់ចាម សម្រាប់ជំនួបសប្តាហ៍ទី៦ នាវេលាម៉ោង៦ថ្ងៃសៅរ៍ ទី៤ ខែឧសភា។ រីឯជំនួប២គូទៀតប្រព្រឹត្តនៅម៉ោង៣និង៣០នាទី ដោយសូលទីឡូអង្គរ ស្វាគមន៍ក្រសួងការពារជាតិ នៅកីឡដ្ឋានខេត្តសៀមរាប ខណៈអគ្គស្នងការដ្ឋាននគរបាលជាតិ និងគិរីវង់សុខសែនជ័យ តទល់គ្នានៅកីឡដ្ឋានអគ្គិសនីកម្ពុជា។
ក្រោយខកខានក្នុងការរកគ្រាប់បាល់ជូនក្រុម៥ប្រកួតកន្លងមក បានធ្វើឲ្យខ្សែប្រយុទ្ធ កែវ សុខផេង ហាក់មានអារម្មណ៍មិនសូវសប្បាយចិត្ត។ ប៉ុន្តែវាបានក្លាយជាចលករជំរុញឲ្យរូបគេ ស្រេកឃ្លានក្នុងការរកគ្រាប់បាល់កាន់តែខ្លាំងថែមទៀត។ សុខផេង ជឿជាក់ថា រូបគេនឹងអាចរកគ្រាប់បាល់លើកដំបូងឲ្យក្រុមវិសាខាពេលប៉ះកំពង់ចាមនៅសប្តាហ៍នេះ។
«សម្រាប់សប្តាហ៍នេះ ខ្ញុំប្តេជ្ញាថា ខ្ញុំនឹងរកគ្រាប់បាល់ជូនក្រុមវិសាខាឲ្យទាល់តែបាន ព្រោះរយៈពេល៥ប្រកួតកន្លងមកនេះ ខ្ញុំអត់សូវសប្បាយចិត្ត នៅពេលមិនអាចរកគ្រាប់បាល់ជូនក្លិប»។ នេះជាការបង្ហាញការប្តេជ្ញាចិត្តនិងអារម្មណ៍មិនសូវសប្បាយចិត្តកន្លងរបស់កីឡាករ កែវ សុខផេង ពេលចូលរួមសន្និសីទសារព័ត៌មានត្រៀមបើកការប្រកួតពានរង្វាន់ G-Park Youth Cup U15។
ទោះបីកំពង់ចាមជាសមាជិកថ្មីនៃក្របខណ្ឌខេមបូឌានលីគក៏ដោយ តែសម្រាប់ កែវ សុខផេង កំពង់ចាមជាក្រុមមានការរៀបចំបានល្អ ដែលអាចប្រកួតប្រជែងជាមួយបណ្តាក្រុមដទៃទៀត។ «ពួកយើងនឹងខំប្រឹងរក៣ពិន្ទុឲ្យបាន តែការប្រកួតនីមួយៗយើងមិនអាចមើលស្រាលគូប្រកួតបានទេ ហើយរាល់ការប្រកួតយើងត្រូវប្រឹង១០០ភាគរយទាំងក្រុម ទាំងគ្រូបង្វឹក។ ហើយសប្តាហ៍នេះ សង្ឃឹមថាក្រុមយើងនឹងទទួលបាន៣ពិន្ទុពីក្រុមកំពង់ចាម»។ នេះជាការបន្ថែមរបស់កីឡាករ កែវ សុខផេង។
ក្រុមវិសាខាត្រូវបើកទ្វារកីឡដ្ឋានខ្លួន ស្វាគមន៍កំពង់ចាម សម្រាប់ជំនួបក្របខណ្ឌមិត្តហ្វូនខេមបូឌានលីគសប្តាហ៍ទី៥នៅម៉ោង៦ល្ងាចថ្ងៃទី៤ ខែឧសភា ឆ្នាំ២០១៩។ វិសាខាបានស្គាល់បរាជ័យលើកដំបូង ក្រោយពួកគេចាញ់ម្ចាស់ផ្ទះអង្គរថាយហ្គឺរក្នុងលទ្ធផល ២-១ កាលពីសប្តាហ៍មុន។ បច្ចុប្បន្នក្រុមនេះស្ថិតនៅលេខរៀងទី៦មាន១០ពិន្ទុ ខណៈកំពង់ចាមស្ថិតនៅលេខរៀងទី១៣មាន៣ពិន្ទុ ក្រោយឈ្នះ១និងចាញ់៤។
នៅថ្ងៃសៅរ៍នេះដែរ ក្រុមមានមូលដ្ឋាននៅខេត្តសៀមរាបសូលទីឡូអង្គរ ត្រូវតទល់ជាមួយក្រុមក្រសួងការពារជាតិ នៅម៉ោង៣:៣០នាទីរសៀល នាកីឡដ្ឋានខេត្តសៀមរាប។ សម្រាប់៥ប្រកួតកន្លងមកសូលទីឡូអង្គរ ដែលស្ថិតនៅបាតតារាងមិនទាន់ស្គាល់ជ័យជម្នះនោះទេ ដោយស្មើ២ និងចាញ់៣។ ចំណែកក្រសួងការពារជាតិ ដែលស្ថិតនៅលេខរៀងទី៤ជាមួយ១០ពិន្ទុ ឈ្នះ៣ ស្មើ១និងចាញ់១។ កាលពីសប្តាហ៍ទី៥ក្រុមនេះបានចាញ់បឹងកេតក្នុងលទ្ធផល ២-០។
ក្រោយចែកគ្នាម្នាក់១ពិន្ទុជាមួយសូលទីឡូអង្គរបន្ទាប់ពីរក្សាលទ្ធផលស្មើ ២-២ ក្រុមអគ្គស្នងការដ្ឋាននគរបាលជាតិត្រូវបើកទ្វារកីឡដ្ឋានអគ្គិសនីកម្ពុជានៅម៉ោង៣:៣០នាទីរសៀលនេះ ស្វាគមន៍ក្រុមមកពីខេត្តតាកែវគីរីវង់សុខសែនជ័យ។ ក្រោយឈ្នះអាស៊ីអឺរ៉ុប ៣-២ នាជំនួបសប្តាហ៍ទី២ ប៉ូលិសមិនទាន់ស្គាល់ជ័យជម្នះនោះទេ ដោយចាញ់ណាហ្គាវើល ៦-០ ចាញ់ក្រសួងការពារជាតិ ៤-២ និងស្មើ ២-២ ជាមួយសូលទីឡូអង្គរ។ ចំណែកគីរីវង់សុខសែនជ័យ ក្រោយយកឈ្នះយុវជនអាយុក្រោម១៨ឆ្នាំបាទី ៤-១ ក្នុងជំនួបបើកឆាកបានរងបរាជ័យជាបន្តបន្ទាប់ ក្នុងនោះចាញ់វិសាខា ២-០, ស្វាយរៀង ២-០, អាស៊ីអឺរ៉ុប ២-១ និងចាញ់ណាហ្គាវើល ៣-១៕
Tag:
Cambodian League 2019
កែវ សុខផេង
វិសាខា
© រក្សាសិទ្ធិដោយ thmeythmey.com
