ជាតិ
រថយន្ត
សង្គមជាតិ
អភិបាលខេត្តសៀមរាប ប្រកាសឈប់ឱ្យឡានក្រុង ឡានដឹកដី និងឡានដឹកទំនិញធំៗចូលក្រុង
× សៀមរាប៖ ជាថ្មីម្ដងទៀត រដ្ឋបាលខេត្តសៀមរាប ប្រកាសហាមរថយន្តធុនធំៗ បើកចូលក្រុង ហើយតម្រូវឲ្យរថយន្តទាំងនោះ ចូលចតនៅក្នុងចំណត២ទីតាំង ដែលអាជ្ញាធរបានរៀបចំរួច ក្នុងនោះមានចំណតនៅប៉ែកខាងកើត និងចំណតខាងលិចក្រុងសៀមរាប។ បម្រាមរបស់អាជ្ញាធរខេត្តនេះ ក្នុងគោលបំណងរៀបចំយានយន្ត និង សណ្ដាប់ធ្នាប់ របៀបរៀបរយសាធារណៈ និងបរិស្ថាន អនាម័យក្នុងក្រុងសៀមរាប។
ក្នុងសេចក្ដីណែនាំរបស់រដ្ឋបាលខេត្តសៀមរាប បានបង្ហាញពីកង្វល់នានាដែលប្រជាពលរដ្ឋបានរំលោភដីចំណីផ្លូវសម្រាប់ធ្វើជាចំណតយានយន្តក្នុងបំណងបម្រើផលប្រយោជន៍អាជីវកម្មផ្ទាល់ខ្លួន ដែលធ្វើឱ្យប៉ះពាល់ដល់សាធារណជនទូទៅ ទាំងការរៀបចំសណ្ដាប់ធ្នាប់ និងសោភ័ណភាពក្រុងទេសចរណ៍មួយនេះ។ ដូច្នេះដើម្បីរៀបចំការងារនេះឱ្យល្អប្រសើរ ពិសេសដើម្បីសោភ័ណភាព បរិស្ថាន និងអនាម័យតាមផ្លូវនោះ រដ្ឋបាលខេត្តបានណែនាំឱ្យរថយន្តដឹកទំនិញ រថយន្តសណ្ដោងរ៉ឺម៉ក់ និងរថយន្តឈ្នួលដឹកអ្នកដំណើរគ្រប់ប្រភេទ ចូលចតនៅចំណតទាំង២ទីតាំងជាកំហិតត្រឹមថ្ងៃទី៣០ ខែមេសា។
ក្នុងនោះដែរ រថយន្តខាងលើមិនអនុញ្ញាតឱ្យធ្វើចរាចរណ៍ និងចតតាមបណ្ដោយផ្លូវជាតិលេខ៦ ឬបណ្ដាផ្លូវមួយចំនួនក្នុងភូមិសាស្ដ្រក្រុងសៀមរាបឡើយ ដោយត្រូវឈប់ចតនៅចំណតខាងកើត និងខាងលិចក្រុងជំនួសវិញ។ ក្រុមហ៊ុនដឹកជញ្ជូនភ្ញៀវ ឬក្រុមហ៊ុនទេសចរណ៍ ភោជនីយដ្ឋាន មិនអនុញ្ញាតឱ្យមានការរំលោភដីចំណីផ្លូវ ឬទ្រូងផ្លូវ ធ្វើជាកម្មសិទ្ធិដើម្បីចតយានយន្តគ្រប់ប្រភេទ។ រថយន្ត ដឹកដី ថ្ម ខ្សាច់ ទំនិញ ឬសម្ភារផ្សេងៗ និងសំរាម មិនអនុញ្ញាតឱ្យដឹកហួសកម្រិតពីស្ថានភាពដើមទេ ជាពិសេសត្រូវមានការគ្របត្រឹមត្រូវ។ ករណីក្រុមហ៊ុន ដេប៉ូ ឬក្រុមហ៊ុនទេសចរណ៍ចាំបាច់ត្រូវធ្វើចរាចរណ៍ក្នុងក្រុង ដូចជាដឹកជញ្ជូនភ្ញៀវ រថយន្តលាយស៊ីម៉ង់ត៍ ដឹកដី ថ្ម ខ្សាច់ ត្រូវស្នើសុំពីរដ្ឋបាលខេត្តដើម្បីឱ្យមានការត្រួតពិនិត្យត្រឹមត្រូវ។ នេះបើតាមសេចក្តីណែនាំរបស់រដ្ឋបាលខេត្ត។
ចំពោះម្ចាស់ក្រុមហ៊ុនបម្រើសេវាដឹកជញ្ជូន ត្រូវពិនិត្យលទ្ធភាពផ្លាស់ប្ដូរទីតាំងស្នាក់ការលក់សំបុត្រ ឬការទទួល និងដឹកជញ្ជូនភ្ញៀវ ឱ្យមានស្នាក់ការនៅក្នុង ឬជិតចំណតទាំង២ខាងលើ ដោយមិនអនុញ្ញាតឱ្យទទួល ឬដឹកភ្ញៀវក្រៅពីទីតាំងខាងលើឡើយ តែអនុញ្ញាតត្រឹមលក់សំបុត្រប៉ុណ្ណោះ។
សេចក្ដីណែនាំដែលចុះហត្ថលេខាដោយអភិបាលខេត្ត លោក ទៀ សីហា នៅថ្ងៃទី២ ខែមេសា បង្គាប់ឱ្យស្នងការដ្ឋាននគរបាលខេត្ត រដ្ឋបាលក្រុង-ស្រុក ឃុំ-សង្កាត់ ត្រូវចុះពិនិត្យ និងរៀបចំសណ្ដាប់ធ្នាប់ របៀបរៀបរយសាធារណៈ ដោយអនុវត្តតាមគោលការណ៍ខាងលើ៕
© រក្សាសិទ្ធិដោយ thmeythmey.com