​អាជ្ញាធរ​ឥណ្ឌា​ប្តឹង​អ្នកនយោបាយ​ម្នាក់​ដែល​ជិះ​សត្វ​លា​ទៅ​ការិយាល័យ​បោះឆ្នោត​
សង្គមអន្តរជាតិ​
អន្តរជាតិ
​អាជ្ញាធរ​ឥណ្ឌា​ប្តឹង​អ្នកនយោបាយ​ម្នាក់​ដែល​ជិះ​សត្វ​លា​ទៅ​ការិយាល័យ​បោះឆ្នោត​
04, May 2019 , 8:59 pm        
រូបភាព
ដោយ: ធីតា
 បេក្ខជន​ឯករាជ្យ​ម្នាក់ បាន​រង​ការចោទប្រកាន់​កាលពី​ថ្ងៃ​ទី​១ ខែឧសភា កន្លងមក ដោយសារតែ​លោក​បាន​ជិះ​លើ​ខ្នងសត្វ​លា​ដើម្បី​ទៅ​ចុះឈ្មោះ​ប្រជែង​ការបោះឆ្នោត​ដណ្តើម​កៅអី​សភា​ប្រជាជន ឬ​សភា​ជាន់​ទាប Lok Sabha​។​

 
​លោក Mani Bhushan Sharma អាយុ​៤៤​ឆ្នាំ បាន​ចុះឈ្មោះ​ធ្វើជា​បេក្ខជន​ឯករាជ្យ​សម្រាប់​ប្រជែង​កៅអី​ប្រចាំ​ក្រុង Jehanabad រដ្ឋ Bihar  ក្នុង​សភា​ប្រជាជន Lok Sabha នា​ថ្ងៃ​ចុងក្រោយ​នៃ​ការចុះបញ្ជីឈ្មោះ​បេក្ខជន​។ លោក​បាន​ខកចិត្ត​នា​ការប្រកួតប្រជែង​៤​លើក​មកហើយ ហើយ​កាលពី​ថ្ងៃ​ចន្ទ​កន្លងមក លោក​បាន​ជិះ​លា​ទៅកាន់​ការិយាល័យ​ចុះឈ្មោះ​បេក្ខភាព​សម្រាប់​ការប្រកួតប្រជែង​បន្តទៀត​។​
 
«​យើង​បានសម្រេច​ដាក់ពាក្យ​ប្តឹង​អ្នកនយោបាយ​ដែល​រំលោភ​លើ​មាត្រា​ច្បាប់​ស្តីពី​ការទប់ស្កាត់​អំពើ​ឃោ​ឃៅ​លើស​ត្វ​»​។ នេះ​ជាការ​បញ្ជាក់​របស់​នាយ​ប៉ូលិស​នៅ​ក្រុង Jehanabad លោក Shree Maneesh ដែល​ដកស្រង់​ដោយ AFP ប៉ុន្តែ​លោក​មិនបាន​អះអាង​ពីបទ​ចោទ​ច្បាស់​ឡើយ ពីព្រោះ​ការ​ជិះ​លា និង​សេះទេស ហាក់ដូចជា​រឿង​សាមញ្ញ​ទៅហើយ​នៅ​ឥណ្ឌា​។​
 
​ទោះបីជា​យ៉ាងណាក៏ដោយ ប៉ូលិស​មូលដ្ឋាន​ចង់​ព្រមាន​អ្នកនយោបាយ ជាពិសេស​ការប្រព្រឹត្ត​មិន​ត្រឹមត្រូវ​ចំពោះ​សត្វពាហនៈ​ដើម្បី​នយោបាយ​របស់ខ្លួន​។ បើ​ផ្អែកទៅលើ​ច្បាប់ អ្នកប្រព្រឹត្ត​អំពើ​ឃោ​ឃៅ ឬ​ហិង្សា​លើស​ត្វ ប្រឈម​ជាប់ពន្ធនាគារ​ដល់​ទៅ​៧​ឆ្នាំ​។​
 
​លោក Sharma បាន​និយាយ​ការពារ​ខ្លួន​ថា លោក​ជិះ​សត្វ​លា​ទៅ​ការិយាល័យ​ចុះឈ្មោះ ដើម្បី​បង្ហាញ​ពី​ឲ្យ​ឃើញ​ស្ថានភាព​រួម​របស់​ប្រជាពលរដ្ឋ ដែលមាន​ផល​លំបាក​។ លោក​បាន​ប្រាប់ AFP ថា​៖ «​ពលរដ្ឋ​ជាទូទៅ​ប្រឹង​កសាង​សង្គម និង​ជាតិ​មួយ​ឲ្យ​ល្អប្រសើរ ដូចជា​ការប្រឹងប្រែងរ​បស់​សត្វ មិន​ដូចជា​អ្នកនយោបាយ​ខ្លះ​ដែល​គិតគូ​តែ​ពី​ខ្លួន​។ សត្វ​លា​ជា​តំណាង​នៃ​ការធ្វើការ​ដោយ​ប្រឹងប្រែង​»​។​
 
​អំណះអំណាង​បែបនេះ មិនបាន​ធ្វើ​ឲ្យ​អាជ្ញាធរ​ពេល​ចិត្ត​នោះឡើយ បន្ថែម​ពីលើ​នេះ​ទៀត ឯកសារ​សុំ​ឈរឈ្មោះ​បោះឆ្នោត​របស់លោក​ត្រូវបាន​ច្រានចោល ដោយសារ​មាន​កង្វះខាត​ជាច្រើន​។​
 
​ឥណ្ឌា​កាលពី​សប្តាហ៍​មុន បានចាប់ផ្តើម​ការបោះឆ្នោត​សម្រាប់​អាសនៈ​សភា​ជាន់​ទាប ដែលមាន​រយៈពេល​៦​សប្តាហ៍ ដោយ​លទ្ធផល នឹងត្រូវ​ប្រកាស​នៅ​ថ្ងៃទី​២៣ ខែឧសភា​៕
 

Tag:
 បោះឆ្នោត​ឥណ្ឌា
© រក្សាសិទ្ធិដោយ thmeythmey.com