ភ្នំពេញ៖ បន្ទាប់ពីចូលរួមវគ្គបណ្ដុះបណ្ដាលបច្ចេកទេសសម្រាប់យុវជនកម្ពុជានៅប្រទេសចិន រយៈពេល ២សប្ដាហ៍ បានជំរុញចិត្តឲ្យយុវជនខ្មែរ មានគំនិតជួយសង្គមកម្ពុជាឲ្យរីកចម្រើនលើផ្នែកបច្ចេកវិទ្យា រួមទាំងសេដ្ឋកិច្ចឌីជីថល។ វគ្គបណ្ដុះបណ្ដាលនេះ យុវជនកម្ពុជា បានទទួលចំណេះដឹងច្រើន តាមរយៈការធ្វើបទបង្ហាញរបស់ភាគីចិន និងការទស្សនកិច្ចសិក្សានៅតាមក្រុមហ៊ុនបច្ចេកវិទ្យាល្បីៗ។
ពីថ្ងៃទី១៧-៣០មេសា តំណាងយុវជនកម្ពុជាចំនួន ២០រូប បានចូលរួមវគ្គបណ្ដុះបណ្ដាលបច្ចេកទេសសម្រាប់យុវជនកម្ពុជានៅប្រទេសចិន។ វគ្គបណ្ដុះបណ្ដាលអំពីបច្ចេកវិទ្យានេះ បានប្រព្រឹត្តទៅនៅខេត្តចំនួន ៣ក្នុងប្រទេសចិន គឺខេត្តក្វាងស៊ី, ខេត្តជឺជាំង និងខេត្តសានទុង។ មុននឹងចាប់ផ្ដើមវគ្គបណ្ដុះបណ្ដាលអំពីបច្ចេកវិទ្យា យុវជនកម្ពុជាទាំង២០រូប បានស្វែងយល់ពីការដឹកនាំសង្គមរបស់ប្រធានាធិបតីចិន ស៊ី ជីងភីង, ពាណិជ្ជកម្មរវាងកម្ពុជា-ចិន រួមទាំងវប្បធម៌ និងប្រពៃណី។
ក្រោយស្វែងយល់លើប្រធានបទទាំងនេះ យុវជនកម្ពុជា ចាប់ផ្ដើមស្វែងយល់ពីបច្ចេកវិទ្យាជឿនលឿនរបស់ប្រទេសចិន។ ក្នុងវគ្គបណ្ដុះបណ្ដាលនេះ ប្រតិភូយុវជនកម្ពុជា បានស្វែងយល់ពីបច្ចេកវិទ្យា 5G, សេដ្ឋកិច្ចឌីជីថល និងសុវត្ថិភាពតាមបណ្ដាញអ៊ីនធឺណិត រួមទាំងដំណើរទស្សនកិច្ចសិក្សានៅក្រុមហ៊ុន China Mobile, AI Town, H3C, ក្រុមហ៊ុន Hikvision និងក្រុមហ៊ុន Alibaba។
លោក អួន សុភិរិន្ទ បុគ្គលិកនាយកដ្ឋានទំនាក់ទំនងអន្តរជាតិ និងដៃគូក្រៅប្រទេសនៃសហភាពសហព័ន្ធយុវជនកម្ពុជា ដែលចូលរួមវគ្គបណ្ដុះបណ្ដាលនេះ បានចាប់អារម្មណ៍លើបច្ចេកវិទ្យា 5G ដែលធ្វើការទាក់ទងនឹងវិស័យសុខាភិបាល និងវិស័យអប់រំ។ យុវជនវ័យ២៩ឆ្នាំរូបនេះ រៀបរាប់យ៉ាងដូច្នេះថា៖ «ក្នុងវគ្គបណ្ដុះបណ្ដាលនេះ ខ្ញុំចាប់អារម្មណ៍លើបច្ចេកវិទ្យា 5G ជាងគេ ដែលចិនបានអនុវត្តលើវិស័យសុខាភិបាល និងវិស័យអប់រំ។ ក្នុងវិស័យអប់រំ គេប្រើ 5G ដើម្បីបង្រៀនសិស្សតាមប្រព័ន្ធអ៊ីនធឺណិត ដែលមានល្បឿនលឿន និងងាយស្រួលដល់សិស្សនៅតាមជនបទ»។
បន្ទាប់ពីស្វែងយល់លើបច្ចេកវិទ្យាជឿនលឿនរបស់ចិនហើយ លោក សុភិរិន្ទ និងប្រតិភូកម្ពុជា ក៏បានសិក្សាពីការការពារនៅតាមប្រព័ន្ធអ៊ីនធឺណិតផងដែរ។ បើតាមលោក សុភិរិន្ទ សុវត្ថិភាពតាមបណ្ដាញអ៊ីនធឺណិត ជាមធ្យោបាយមួយក្នុងការការពារការវាយប្រហារតាមបណ្ដាញមួយនេះ។ យុវជនដែលសិក្សាផ្នែកទំនាក់ទំនងអន្តរជាតិរូបនេះ ជឿជាក់ថា កម្ពុជានឹងរីកចម្រើនផ្នែកបច្ចេកវិទ្យា ដែលផ្នែកទាំងនេះ មានសារៈសំខាន់ក្នុងការអភិវឌ្ឍប្រទេសឲ្យមានភាពជឿនលឿន។
បច្ចេកវិទ្យានៅប្រទេសចិន មានការរីកចម្រើន ទាំងផ្នែកបញ្ញាសិប្បនិម្មិត និងការបង្កើតថ្មីនៅប្រព័ន្ធអេឡិចត្រូនិកផ្សេងៗ។ តួយ៉ាងបច្ចេកវិទ្យា 5G ត្រូវបានប្រើប្រាស់យ៉ាងទូលំទូលាយក្នុងប្រទេសចិន ជាពិសេសការប្រើប្រាស់បច្ចេកវិទ្យានេះ ក្នុងវិស័យសុខាភិបាល, ការជួសជុល, ការផ្សព្វផ្សាយ, ការទិញទំនិញ, ទេសចរណ៍ និងការអប់រំ។
វគ្គបណ្ដុះបណ្ដាលរយៈពេល ២សប្ដាហ៍នេះ ហាក់ខ្លីសម្រាប់ប្រតិភូយុវជនកម្ពុជា ប៉ុន្តែវគ្គបណ្ដុះបណ្ដាលនេះ នាំឲ្យយុវជនកម្ពុជាស្គាល់ និងស្វែងយល់ពីបច្ចេកវិទ្យាជាច្រើននៅប្រទេសចិន។ ក្រៅពីសិក្សានៅក្នុងថ្នាក់របស់គ្រូជាជនជាតិចិនរួចហើយ យុវជនកម្ពុជា បានធ្វើទស្សនកិច្ចសិក្សានៅតាមក្រុមហ៊ុនបច្ចេកវិទ្យាទំនើបផងដែរ។
កញ្ញា ចាន់ ផល្លីកា ដែលជាអ្នកសម្របសម្រួលកម្មវិធីគោលនយោបាយនៃមជ្ឈមណ្ឌលអភិវឌ្ឍន៍កម្ពុជារូបនេះ បញ្ជាក់ទៀតថា៖ «វគ្គបណ្ដុះបណ្ដាលនេះ អាចធ្វើឲ្យខ្ញុំ អាចចាប់យកចំណុចណាមួយ ដើម្បីបង្កើតជាប្រធានបទ សម្រាប់ផ្សព្វផ្សាយដល់យុវជន និងប្រជាជនខ្មែរ»។ យុវតីរូបនេះ បន្តថា យុវជនកម្ពុជា ក៏បានរៀនសូត្រពីសុវត្ថិភាពលើប្រព័ន្ធអ៊ីនធើណិតផងដែរ ដែលវាជាឱកាសល្អ ក្នុងការទទួលបាននូវចំណេះដឹងជាមូលដ្ឋាន និងជាបទពិសោធន៍ដ៏ល្អមួយ។
ទាំងលោក សុភិរិន្ទ និងកញ្ញា ផល្លីកា សុទ្ធតែបានប្តេជ្ញា ផ្សព្វផ្សាយដល់មិត្តភក្តិ និងមិត្តរួមការងារពីសារប្រយោជន៍នៃបច្ចេកវិទ្យា 5G និងបច្ចេកវិទ្យាទំនើបនៅប្រទេសចិន។ អ្នកទាំងពីរយល់ថា ការស្វែងយល់ពីបច្ចេកវិទ្យានេះ អាចឈានទៅចាប់ឱកាសផ្សេងៗនៅក្នុងប្រទេស៕