កីឡាជាតិ
ជាតិ
វិសាខាស៊ីកំពង់ចាម១៤-០ មុនគិរីវង់បាន៣ពិន្ទុ ហើយទ័ពត្រឹមស្មើសូលទីឡូ កែវ សុខផេង ជាកីឡាករដំបូងដែលស៊ុតបាល់បញ្ចូលទីដល់ទៅ៧គ្រាប់ក្នុង១ប្រកួត។រូបថត CNCC
× ទីបំផុត ខ្សែប្រយុទ្ធ កែវ សុខផេង មានឈ្មោះក្នុងតារាងអ្នកស៊ុតបាល់បញ្ចូលទីហើយ តាមរយៈការសម្រេចបានដល់ទៅ៧គ្រាប់ក្នុងជ័យជម្នះរបស់វិសាខា ១៤-០ លើភ្ញៀវកំពង់ចាម។ ជំនួបសប្តាហ៍ទី៦ នារសៀលថ្ងៃសៅរ៍នេះផងដែរ ក្រសួងការពារជាតិ ទទួលបាន១ពិន្ទុក្នុងលទ្ធផលស្មើ ១-១ នៅទឹកដីរបស់សូលទីឡូអង្គរ ខណៈគិរីវង់សុខសែនជ័យ បាន៣ពិន្ទុ ជាមួយនឹងលទ្ធផល ២-១ លើអគ្គស្នងការដ្ឋាននគរបាលជាតិ។
វិសាខា បាន៣ពិន្ទុដ៏រីករាយនៅកីឡដ្ឋានរបស់ខ្លួនជាមួយនឹងជ័យ ១៤-០ លើកំពង់ចាម។ កែវ សុខផេង រកបាន៥គ្រាប់នៅតង់ទី១ ហើយ២គ្រាប់ទៀតនៅតង់ទីពីរ។ ខ្សែប្រយុទ្ធក្រិក Evangelos Skraparas រកបាន២គ្រាប់ ស៊ិន សុផាណាត់ បន្ថែមបាន២គ្រាប់ ខណៈខ្សែការពារប៊ុលហ្គារី Lyuben Nikolov ខ្សែបម្រើកូរ៉េខាងជើង Park Song-chol និងខ្សែការពារសុខ សុវណ្ណ ជួយបានម្នាក់១គ្រាប់។ វិសាខាឡើងទៅលេខ២បណ្តោះអាសន្ន ដោយមាន១៣ពិន្ទុ ខណៈកំពង់ចាមធ្លាក់ទៅបាតតារាង ដោយធ្លាយសំណាញ់ទីដល់ទៅ៤៦គ្រាប់ក្នុង៦ប្រកួត។
សម្រាប់ជំនួបនៅទឹកដីខេត្តសៀមរាប ខ្សែប្រយុទ្ធនីហ្សេរីយ៉ា Dzarma Bata បានស៊ុតបាល់បញ្ចូលទីនៅនាទី៦២ ដើម្បីចែករំលែកមួយពិន្ទុជាមួយម្ចាស់ផ្ទះសូលទីឡូអង្គរ ដែលនាំមុខមុន១គ្រាប់ដោយសារគ្រាប់បាល់របស់ លី ម៉ូស្លីម នៅនាទី៣៧។ នេះជាគ្រាប់ទី១០របស់ Bata នៅរដូវកាលថ្មី ប៉ុន្តែរូបគេនៅតែមិនអាចជួយឲ្យក្រសួងការពារជាតិ បង្កើន៣ពិន្ទុដើម្បីប្រជែងកំពូលតារាង ក្រោយបរាជ័យ ២-០ ដោយសារបឹងកេត។ រីឯសូលទីឡូ ពួកគេគ្រាន់តែបង្កើន១ពិន្ទុទៀតប៉ុណ្ណោះ ហើយនៅតែមិនស្គាល់ជ័យជម្នះលើកដំបូងរបស់ខ្លួន។
ដោយឡែកជំនួបនៅកីឡដ្ឋានអគ្គិសនីកម្ពុជា គិរីវង់សុខសែនជ័យបានស្តារការបរាជ័យ៤ប្រកួតជាប់គ្នា តាមរយៈជ័យជម្នះ ៣-២ លើអគ្គស្នងការដ្ឋាននគរបាលជាតិ។ ៦នាទីដំបូង ខ្សែបម្រើជប៉ុន Takahito Ota និង ដាវ នីម បានស៊ុតបាល់បញ្ចូលទីម្នាក់មួយគ្រាប់សម្រាប់គិរីវង់ ហើយខ្សែប្រយុទ្ធអាហ្វ្រិកខាងត្បូង Booysen Shane របស់នគរបាលជាតិ កាត់បន្ថយគម្លាតមួយគ្រាប់នៅនាទី១៧ ហើយបន្ថែមបាល់ប៉េណាល់ទីតាមស្មើ នៅនាទី៦៦។ ប៉ុន្តែ៣ពិន្ទុបានលើគិរីវង់ ក្រោយខ្សែប្រយុទ្ធម៉ាលី Coulbaly Souleymane ទាត់បាល់ប៉េណាល់ទីបានសម្រេចនៅនាទី៧៦៕
© រក្សាសិទ្ធិដោយ thmeythmey.com