ជាតិ
អចលនទ្រព្យ
×![]()
ដោយ: ថ្មីៗ
ខេត្តកំពតបានស្គាល់ពីភាពរីកចម្រើនក្នុងវិស័យអចលនទ្រព្យក្នុងរយៈជាង ៣ ឆ្នាំចុងក្រោយនេះ។ គម្រោងអភិវឌ្ឍន៍ធំៗមួយចំនួនបានចាប់ដំណើរការនៅក្នុងតំបន់នេះ ដែលមានដូចជាគម្រោងកំពង់ផែទឹកជ្រៅ ឆ្នេរសិប្បនិម្មិតតម្លៃជិត ២ ពាន់លានដុល្លារ និងគម្រោងតំបន់សេដ្ឋកិច្ចពិសេសជាដើម។
រដ្ឋាភិបាលបានកំណត់ប្លង់គោលខេត្តកំពតរួចរាល់កាលពីឆ្នាំ ២០១៨ កន្លងទៅ ដោយដាក់គោលដៅ អភិវឌ្ឍដីខេត្តនេះជា៖ ១. តំបន់រមណីយដ្ឋានទេចរណ៍ធម្មជាតិ ដែលស្អាតបំផុតលំដាប់ពិភពលោក ។ ២.តំបន់កែច្នៃផលិតកម្ម និងឧស្សាហម្ម។ ៣.ទីផ្សារអន្តរជាតិសម្រាប់ផលិតផលកសិកម្ម និងការចែកចាយទំនិញ។ ៤. ទីក្រុងទំនើប ដែលមានហេដ្ឋារចនាសម្ព័ន្ធ សេវាកម្ម និងបរិស្ថានស្អាត និង៥. ទីក្រុងដែលមានអភិបាលកិច្ចល្អ។
សម្រាប់វិស័យអចលនទ្រព្យ វិស័យដីធ្លីត្រូវបានមើលឃើញថា មានសន្ទុះកំណើនខ្លាំងគួរឲ្យកត់សម្គាល់ ពោលគឺប្រតិបត្តិការទិញលក់ ត្រូវបានធ្វើឡើងនៅគ្រប់ទីកន្លែង ជាពិសេសនៅតាមតំបន់ទេសចរណ៍ ដែលគេជឿថា ជាតំបន់មានសក្តានុពលនៅពេលអនាគត។ កត្តានេះ បានធ្វើឲ្យតម្លៃដីធ្លី បានហក់ឡើងខ្លាំងនៅឆ្នាំ ២០១៨។
លោក សុខ គែន ស្ថាបនិកក្រុមហ៊ុន Kampot Property បានឲ្យដឹងថា កំណើននៃការវិនិយោគពីសំណាក់អ្នកវិនិយោគិនក្នុងស្រុក និងក្រៅស្រុក បានរុញតម្លៃដីឲ្យកើនឡើងខ្លាំង នៅឆ្នាំ ២០១៨។ ប៉ុន្តែទោះជាយ៉ាងណាក្តី ចាប់ពីចុងឆ្នាំ ២០១៨មក ពោលគឺរយៈពេល ៦ ខែចុងក្រោយនេះ តម្លៃដីនៅកំពត បាននៅទ្រឹង ដោយសារតែទំហំនៃការវិនិយោគដ៏ច្រើននាពេលកន្លងមក ហើយនៅពេលបច្ចុប្បន្នអ្នកទិញ ពីមុនបានចាប់ផ្តើមដាក់លក់វិញ នៅក្នុងតម្លៃខ្ពស់ជាងទីផ្សារ។
ទោះបីយ៉ាងណា លោកទទួលស្គាល់ថាបរិយាកាសវិនិយោគនៅក្នុងខេត្តកំពត នៅតែមានភាពល្អប្រសើរ ចំណែកការទិញលក់នៅតែមានដំណើរការល្អជាធម្មតា សម្រាប់អចលនទ្រព្យដែលដាក់លក់នៅក្នុងតម្លៃតាមទីផ្សារ។
ទោះបីយ៉ាងណា លោកទទួលស្គាល់ថាបរិយាកាសវិនិយោគនៅក្នុងខេត្តកំពត នៅតែមានភាពល្អប្រសើរ ចំណែកការទិញលក់នៅតែមានដំណើរការល្អជាធម្មតា សម្រាប់អចលនទ្រព្យដែលដាក់លក់នៅក្នុងតម្លៃតាមទីផ្សារ។
ទាក់ទងនឹងតម្លៃដី លោកគែន បញ្ជាក់ថាទីផ្សារតម្លៃដីពិតប្រាកដបានស្ថិតនៅថេរ ចាប់ពីចុងឆ្នាំ ២០១៨ មក ដោយដីលំនៅដ្ឋាននៅតាមជាយក្រុង មានតម្លៃពី ៣០ដុល្លារ ទៅ ៥០ដុល្លារ ក្នុងមួយម៉ែត្រការ៉េ។ ដីជាប់មាត់សមុទ្រមានតម្លៃ ២០០ ទៅ ២៥០ដុល្លារ។ ចំណែកដីនៅតាមមាត់ព្រែក ក្នុងតំបន់សក្តានុពល (ស្ពានកំពង់បាយ) តម្លៃដីអាចមានចន្លោះ ១,២០០ដុល្លារ ទៅ ១,៥០០ ដុល្លារ ក្នុងមួយម៉ែត្រការ៉េ។ រីឯដីចេញឆ្ងាយពីស្ពានកំពង់បាយក្នុងរង្វង់កន្លះគីឡូម៉ែត្ រមានតម្លៃចាប់ពី ១៥០ ដុល្លារ ទៅ ៤០០ ដុល្លារក្នុងម៉ែត្រការ៉េ។
លោក គែន មើលឃើញថា វិស័យទេសចរណ៍ជាផ្នែកមួយដ៏សំខាន់ ដែលបានរុញច្រានតម្លៃអចលនទ្រព្យ នៅខេត្តជាប់មាត់សមុទ្រមួយនេះ ឲ្យកាន់តែមានសក្តានុពល។ លោកជឿថា ការវិនិយោគបែបអេកូទេសចរណ៍ ផ្ទះលម្ហែកាយ មិនថានៅតាមដងព្រែក ឬនៅជាប់មាត់សមុទ្រ គឺនៅតែមានសត្តានុពលខ្លាំងសម្រាប់វិនិយោគិន ដែលចង់ស្វែងរកឱកាសវិនិយោគនៅខេត្តកំពត។
ក្រៅពីកំពត ខេត្តកែប ក៏មានសក្តានុពលប្រហាក់ប្រហែលគ្នានេះដែរ។ លោក គែនបានបង្ហើបថា ទាំងការទិញលក់ និងស្ថានភាពនៃតម្លៃដីរបស់ខេត្តកំពត និងកែបគឺមានលក្ខណៈស្រដៀងគ្នា(ទ្រឹង)។
រដ្ឋាភិបាល នឹងកំណត់ប្លង់គោលសម្រាប់ការការអភិវឌ្ឍន៍ដីនៅក្នុងខេត្តកែប ដើម្បីប្រែក្លាយខេត្តនេះ ឲ្យទៅជាតំបន់ទេសចរណ៍ដ៏មានភាពទាក់ទាញ ជារួមគឺសម្រេចអភិវឌ្ឍន៍ទីក្រុង កោះ ឆ្នេរសមុទ្រ ផ្សារ កំពង់ផែទេសចរណ៍ សេវាកម្មទេសចរណ៍ និងតំបន់រមណីយដ្ឋានទេសចរណ៍នានា នៅក្នុងខេត្តកែបឲ្យកាន់តែមានភាពប្រសើរឡើង។
សម្រាប់ភ្ញៀវទេសចរ កំពត និងកែប គឺជាកន្លែងដ៏ល្អបំផុតសម្រាប់ការសម្រាកលម្ហែ ឬការចូលនិវត្តន៍។ ជាមួយគ្នានេះ រដ្ឋាភិបាលនឹងជំរុញវិស័យទេសចរណ៍ឲ្យកាន់តែប្រសើរឡើង នៅពេលអនាគត។
កម្ពុជា មានខេត្តជាប់មាត់សមុទ្រចំនួន ៤ គឺកំពត កែប ក្រុងព្រះសីហនុ និងកោះកុង។ ក្នុងនោះខេត្តព្រះសីហនុ កំពុងមានការវិនិយោគ និងមានសក្តានុពលខ្លាំងជាងគេ ខណៈខេត្តបី ផ្សេងៗ កំពុងស្រូបយកការវិនិយោគបន្តិចម្តងៗ៕
ប្រភព៖ realestate.com.kh
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
