កីឡាជាតិ
ជាតិ
គ្រូបង្វឹកភ្នំពេញក្រោនចេញពីពេទ្យវិញក្រោយបញ្ហាសម្ពាធបេះដូងមុនជំនួបជាមួយណាហ្គា
× «ឥឡូវនេះ បងប្រុសរបស់ខ្ញុំ [លោក Leonardo Vitorino] ទៅផ្ទះវិញហើយ បន្ទាប់ពីមានស្ថានភាពដ៏អាក្រក់ដោយសារបញ្ហាសម្ពាធបេះដូង នៅមុនជំនួបជាមួយណាហ្គាវើល»។ នេះជាការអះអាងតាមហ្វេសប៊ុករបស់លោក Luis Fernando Vitorino គ្រូចាំទីរបស់ភ្នំពេញក្រោន និងជាប្អូនប្រុសបង្កើតរបស់លោក Leonardo។ លោក Luis Fernado បានអរគុណចំពោះសារជូនពរ និងមន្ទីរពេទ្យដែលបានព្យាបាលបងប្រុសរបស់ខ្លួន។
ភ្នំពេញក្រោន នាការប្រកួតសប្តាហ៍ទី៦ បានរងបរាជ័យ ៣-០ ដោយសារណាហ្គាវើល នៅកីឡដ្ឋានស្តាតចាស់។ លោក ស៊ុម វណ្ណា ដែលជាគ្រូជំនួយ រ៉ាប់ដឹកនាំក្រុមជំនួសលោក Leonardo។
បរាជ័យបាននាំឲ្យភ្នំពេញក្រោនស្ថិតនៅលេខ១០ដោយមានតែ៦ពិន្ទុប៉ុណ្ណោះពីការប្រកួត៦លើក ខណៈណាហ្គាវើល ដែលបានបីពិន្ទុបន្ថែម ក្រោយការស៊ុតបាល់បញ្ចូលទីពីរគ្រាប់របស់ Amir Gurbani និង១គ្រាប់របស់ Esoh Omogba ឡើងទៅចំណាត់ថ្នាក់លេខពីរវិញ ដោយមាន១៥ពិន្ទុ។
ព្រះខ័នរាជស្វាយរៀងរក្សាចំណាត់ថ្នាក់លេខ១លើតារាង ប៉ុន្តែពួកគេបាត់បង់កំណត់ត្រាឈ្នះរហូតក្រោយបញ្ចប់លទ្ធផលស្មើ ១-១ ជាមួយក្រុមឡើងជើងអង្គរថាយហ្គឺរ។ តាំង សុភ័ក្ត្រ រកបានគ្រាប់បាល់នាំមុខសម្រាប់អង្គរថាយហ្គឺរ នៅនាទី៦៤ ហើយ Kobayashi Daisuke ជួយម្ចាស់ផ្ទះតាមស្មើវិញនៅនាទី៨៧។
ព្រះខ័នរាជស្វាយរៀងឡើងដល់១៦ពិន្ទុ ខណៈអង្គរថាយហ្គឺរ ដែលមិនទាន់ស្គាល់បរាជ័យផងដែរនោះ ឈរនៅលេខ៥ដោយមាន១២ពិន្ទុ ក្រោយឈ្នះបីប្រកួត និងស្មើ៣ប្រកួត៕
© រក្សាសិទ្ធិដោយ thmeythmey.com