អន្តរជាតិ
លោក មហាធៀ ថា មន្ត្រីខ្លះចង់ផ្តួលរដ្ឋបាលលោក ព្រោះលែងអាចស៊ីសំណូកទៀត លោកនាយករដ្ឋមន្ត្រីម៉ាឡេស៊ី មហាធៀ មហាម៉ាត់ (ប្រភពរូប៖ Bernama)
× មនុស្សមួយចំនួន រួមទាំង មន្ត្រីរាជការផងនោះ ចង់ផ្តួលរំលំរដ្ឋាភិបាលចម្រុះដឹកនាំប្រទេស ព្រោះពួកគេលែងអាចស៊ីសំណូកបានទៀត បន្ទាប់ពីមានកិច្ចប្រឹងប្រែងបង្ក្រាបអំពើពុករលួយ ក្រោមអាណត្តិរដ្ឋាភិបាលថ្មី។ នេះការបញ្ជាក់របស់នាយករដ្ឋមន្ត្រីម៉ាឡេស៊ី លោក មហាធៀ មហាម៉ាត់ ដោយសង្កត់ធ្ងន់ថា អំពើពុករលួយនេះឯង ជាហេតុផលដែលធ្វើឲ្យរដ្ឋាភិបាលមុនចាញ់ឆ្នោតនោះ។
ថ្លែងក្នុងសន្ទរកថាមួយនៅមុខមន្ត្រីរាជការម៉ាឡេស៊ីរាប់រយនាក់ លោក មហាធៀ និយាយចំៗថា មនុស្សមួយចំនួន យល់ឃើញថា រដ្ឋាភិបាលលោកមិនល្អដូចរដ្ឋាភិបាលមុន ដោយហេតុថា រដ្ឋាភិបាលលោក ពុំអនុញ្ញាតឲ្យមានការស៊ីសំណូកសូកប៉ាន់កើតឡើងដាច់ខាត។
បើតាមការចុះផ្សាយរបស់ទីភ្នាក់ងារព័ត៌មាន Bernama មេដឹកនាំចាស់វស្សារូបនេះ នៅថ្ងៃទី៥ ខែឧសភា លើកឡើងទៀតថា អ្នកខ្លះទៀត យល់ឃើញថា រដ្ឋាភិបាលលោក ពុំគួរបន្តដឹកនាំប្រទេសទៀតទេ។ ប៉ុន្តែពួកគេ ពេញចិត្តនឹងឲ្យម៉ាឡេស៊ីវិលត្រឡប់ទៅរករដ្ឋាភិបាលពុករលួយដូចមុនវិញ ដែលផ្តល់ផលប្រយោជន៍ដល់ពួកគេ។
ទន្ទឹមនឹងគ្នានេះ លោក មហាធៀ សង្កត់ធ្ងន់ថា ដរាបណាមេដឹកនាំ និងរដ្ឋាភិបាល ដែលត្រូវបានជ្រើសរើសដោយប្រជាជន ប្រព្រឹត្តអំពើពុករលួយហើយនោះ ភាគីជាច្រើន នឹងក្លាយជាជនរងគ្រោះ ក្នុងនោះក៏មានប្រជាជនជំនាន់ក្រោយផងដែរ។
បន្ថែមពីការព្រមានពីផលប៉ះពាល់នៃអំពើពុករលួយ មេដឹកនាំវ័យ ៩៣ឆ្នាំរូបនេះ លើកឡើងពីហេតុផលដែលបណ្តាលឲ្យរដ្ឋាភិបាលមុនរបស់លោកអតីតនាយករដ្ឋមន្ត្រី លោក ណាជីប រ៉ាហ្សាក់ ចាញ់ឆ្នោតក្រោមដៃលោក។ ត្រង់ចំណុចនេះ លោក មហាធៀ អះអាងថា ការបរាជ័យដ៏ធំនេះ គឺបណ្តាលមកពីការអនុញ្ញាតឲ្យមានការប្រព្រឹត្តអំពើពុករលួយយ៉ាងចាស់ដៃ ក្រោមអាណត្តិលោក ណាជីប នេះតែម្តង។
បើតាមប្រភពដដែល ជាចុងក្រោយ លោក មហាធៀ គូសបញ្ជាក់ថា ទ្រព្យសម្បត្តិរបស់រដ្ឋ គួរតែត្រូវបានចែករំលែកជាមួយប្រជាជនទាំងអស់ក្នុងប្រទេស ទោះជាពួកគេមានពូជសាសន៍ ពណ៌សម្បុរ និងសាសនាបែបណាក៏ដោយក្តី៕
Tag:
ម៉ាឡេស៊ី
មហាធៀ
អំពើពុករលួយ
© រក្សាសិទ្ធិដោយ thmeythmey.com