អន្តរជាតិ
នយោបាយអន្តរជាតិ
សង្គ្រាមពាណិជ្ជកម្មឡើងកម្ដៅវិញ ក្រោយលោក ត្រាំ ប្រកាសដំឡើងពន្ធលើទំនិញចិន ប្រធានាធិបតីអាមេរិក ដូណាល់ ត្រាំ ថ្លែងទៅកាន់អ្នកសារព័ត៌មាន ខណៈឧបនាយករដ្ឋមន្រ្តីចិន លីវ ហឺ កំពុងស្ដាប់អំឡុងជំនួបនៅសេតវិមាននាពេលកន្លងមក។ (រូបភាព AFP)
× ប្រៀបដូចចាក់សាំងលើភ្លើងដែលហៀបនឹងរលត់ទៅហើយនោះ ប្រធានាធិបតីអាមេរិក ដូណាល់ ត្រាំ នៅថ្ងៃទី៥ ខែឧសភា បានប្រកាសដំឡើងពន្ធលើទំនិញចិនជាថ្មីទៀត។ ខណៈការចរចាដប់លើកមកនោះត្រូវបានមន្ត្រីភាគីទាំងពីរអះអាងថា មានដំណើរការទៅមុខ លោក ត្រាំ ហាក់មិនពេញចិត្តនឹងលទ្ធផលដែលទទួលបានទៅវិញ។ ការប្រកាសដំឡើងពន្ធនេះ ធ្វើឲ្យគម្រោងចរចាជុំទី១១ ស្ថិតក្នុងភាពមិនច្បាស់លាស់ ហើយច្បាស់ណាស់ ក្រុងប៉េកាំងនឹងមិនសប្បាយចិត្តឡើយ។
មុនជំនួបចរចាលើកទី១១ ដែលគ្រោងធ្វើនៅរដ្ឋធានីវ៉ាស៊ីនតោន ប្រធានាធិបតីអាមេរិក ដូណាល់ ត្រាំ បែរជាប្រកាសដំឡើងពន្ធនាំចូលចំនួន២៥ភាគរយលើទំនិញចិនដែលមានទំហំទឹកប្រាក់២០០ពាន់លានដុល្លារ។ ការប្រកាសដ៏គួរឲ្យភ្ញាក់ផ្អើលនេះ ទំនងជាសារព្រមានចិនមុនការចរចានៅទឹកដីអាមេរិក ដែលគេជឿថា ជាការចរចាជុំចុងក្រោយដើម្បីសម្រេចថា អាមេរិក និងចិនត្រូវរ៉ូវគ្នាហើយបញ្ចប់ជម្លោះពាណិជ្ជកម្ម ឬក៏ចាប់ផ្ដើមធ្វើសង្គ្រាមបន្តទៀត។
តាមពិតទៅ ក្រោយការចរចាដប់លើកកន្លងមកមិនថានៅប៉េកាំង ឬវ៉ាស៊ីនតោន ភាគីទាំងពីរសុទ្ធតែបង្ហាញគំនិតវិជ្ជមានដូចគ្នា។ ភាគីទាំងពីរ គ្រោងបើកការចរចាចុងក្រោយនៅក្នុងសប្ដាហ៍នេះចាប់ពីថ្ងៃទី៨ តទៅ ដើម្បីពិនិត្យលើកិច្ចព្រមព្រៀងមុននឹងដាក់ឲ្យមេដឹកនាំចុះហត្ថលេខា។ យោងតាមរបាយការណ៍នានា អ្វីដែលនៅសេសសល់ គឺការប្រើប្រាស់ពាក្យពេជន៍ឲ្យសមស្របទៅតាមផលប្រយោជន៍នៃភាគីរៀងៗខ្លួន។
យ៉ាងណាមិញ លោក ត្រាំ បកស្រាយថា លោកមិនពេញចិត្តនឹងដំណើរការចរចាយឺតយ៉ាវទើបប្រកាសដំឡើងពន្ធតែម្ដង។ ដូចសព្វដង លោកសរសរលើ Twitter ថា៖ «១០ខែមកនេះ ចិនបានបង់ពន្ធនាំចូល២៥ភាគរយលើទំនិញបច្ចេកវិទ្យាមានទំហំទឹកប្រាក់៥០ពាន់លានដុល្លារ និង១០ភាគរយទៀតលើទំនិញផ្សេងៗដែលមានទំហំ២០០ពាន់លានដុល្លារ។ ពន្ធនាំចូល១០ភាគរយនេះ នឹងបង្កើនទៅដល់២៥ភាគរយនៅថ្ងៃទី១០ ខែឧសភា។»
ការកាត់បន្ថយឱនភាពពាណិជ្ជកម្មដែលលម្អៀងទៅរកចិន ការបើកចំហទីផ្សារចិន ការប្រកួតប្រកួតដោយស្មើភាព និងការបញ្ចប់នយោបាយឧបត្ថម្ភធនដល់ក្រុមហ៊ុនរដ្ឋ ជាលក្ខខណ្ឌសំខាន់ៗដែលអាមេរិកចង់បានពីចិន។ ប៉ុន្តែការប្រកាសដំឡើងពន្ធរបស់លោក ត្រាំ ជាសញ្ញាប្រាប់ថា ចិននៅរារែកមិនចង់ធ្វើតាមការទាមទារឡើយ ទោះជាបានសន្យាបង្កើនការទិញទំនិញកសិកម្មពីអាមេរិកឲ្យបានច្រើនជាងមុខក៏ដោយ។
បើតាមការប្រកាសនេះ លោក ត្រាំ ចង់ដាក់សម្ពាធកាន់តែខ្លាំងលើចិនដើម្បីបំពេញតម្រូវការរបស់អាមេរិកឲ្យបានដាច់ខាត។ យ៉ាងណាមិញ គេមិនដឹងថា ការចរចាជុំចុងក្រោយនេះ អាចធ្វើឡើងតាមគម្រោងឬយ៉ាងណាឡើយក្រោយការប្រកាសរបស់ប្រធានាធិបតីអាមេរិក។ និពន្ធនាយកកាសែត Global Times របស់បក្សកុម្មុយនីស្តចិន បានសរសេរលើ Twitter ដែរថា ឧបនាយករដ្ឋមន្ត្រីចិន លីវ ហឺ ដែលជាប្រធានក្រុមចរចារបស់ចិន ទំនងជាមិនទៅអាមេរិកឡើយ៕
Tag:
ចិន
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com