ជាតិ
បទយកការណ៍ / បទសម្ភាសន៍
២៥ខេត្ត/រាជធានី
ជនជាតិព្នង រ៉ូយ ទើប ឈប់លក់កាហ្វេសរីរាង្គឲ្យវៀតណាម ក្រោយ«ទីម័រកាហ្វេ»បញ្ជាទិញ
× មណ្ឌលគិរី៖ ក្រោយពីកសិករជនជាតិដើមភាគតិចព្នង រ៉ូយ ទើប ងាកមកដាំកាហ្វេសរីរាង្គ តាមគោលការណ៍ស្តង់ដារសរីរាង្គរបស់អង្គការសេដាក រួចមក ដំណាំកាហ្វេសរីរាង្គរបស់លោក ទើប មានទីផ្សារនិងលក់បានថ្លៃជាង កាលដែលរូបលោកដាំកាហ្វេដោយប្រើថ្នាំពុលគីមី។ ម្ចាស់ចម្ការកាហ្វេជនជាតិព្នង រ៉ូយ ទើប នៅខេត្តមណ្ឌលគិរី បានសម្រេចចិត្តឈប់លក់គ្រាប់កាហ្វេនោះ ឲ្យទៅឈ្មួញជនជាតិវៀតណាមទៀត ដោយងាកមកផ្គត់ផ្គង់គ្រាប់កាហ្វេទាំងអស់ឲ្យក្រុមហ៊ុនទីម័រកាហ្វេ ក្នុងតម្លៃថ្លៃជាងឈ្មួញវៀតណាម។
ទិន្នផលកាហ្វេបានតិចជាង កាលដែលលោក ទើប ដាំដោយប្រើប្រាស់ថ្នាំពុលគីមីក៏ពិតមែន ប៉ុន្តែ ម្ចាស់ចម្ការកាហ្វេសរីរាង្គ រស់នៅក្នុងឃុំប៊ូស្រា ស្រុកពេជ្រាដា ខេត្តមណ្ឌលគិរី រូបនេះ អាចរកចំណូលបានច្រើនជាងមុន ដោយកសិករ រ៉ូយ ទើប អាច លក់គ្រាប់កាហ្វេឲ្យទៅក្រុមហ៊ុនទីម័រកាហ្វេបានជិត៣តោនក្នុងមួយឆ្នាំ ដែលស្មើនឹងទឹកប្រាក់ប្រមាណ ២៧លានរៀល។
សូមអញ្ជើញទស្សនាវីដេអូខាងក្រោមនេះ ដូចទៅ៖
ជនជាតិដើមភាគតិចព្នង រ៉ូយ ទើប បានបង្ហាញអារម្មណ៍សប្បាយចិត្តយ៉ាងខ្លាំង ដោយសារ កាហ្វេសរីរាង្គរបស់លោកត្រូវបានចែកចាយក្នុងទីផ្សារកម្ពុជា ដូចជា ខេត្តមណ្ឌលគិរី សៀមរាប ត្បូងឃ្មុំ រាជធានីភ្នំពេញ និងនាំចេញទៅប្រទេសកូរ៉េខាងត្បូង តាមរយ:ក្រុមហ៊ុនទីម័រកាហ្វេ។ ចំនួនកាហ្វេសរីរាង្គដែលលោក ទើប បានលក់ឲ្យទីម័រកាហ្វេនេះ នៅមិនទាន់គ្រប់នឹងតម្រូវការនៅឡើយទេ ពោលគឺក្រុមហ៊ុនទីម័រកាហ្វេសរីរាង្គមណ្ឌលគិរី ប្រមាណជា៥តោនក្នុងមួយឆ្នាំ៕
Tag:
ជនជាតិដើមភាគតិច
កាហ្វេ
សរីរាង្គ
© រក្សាសិទ្ធិដោយ thmeythmey.com