អត្ថបទពាណិជ្ជកម្ម
ក្រុមហ៊ុន កូកា-កូឡា បន្តដំឡើងប៉មចម្រោះទឹកស្អាតទី២២ ក្នុងស្រុកឧត្តុង្គ ដើម្បីឆ្លើយតបនឹងតម្រូវការចាំបាច់នៅរដូវក្តៅនេះ
× កំពង់ស្ពឺ ថ្ងៃសុក្រ ទី៣ ខែឧសភា ឆ្នាំ២០១៩៖ ក្រុមហ៊ុនភេសជ្ជៈកម្ពុជា កូកា-កូឡា និងអាជ្ញាធរពាក់ព័ន្ធ បានបន្តធ្វើការរួមគ្នាដើម្បីឆ្លើយតបនឹងគ្រោះរាំងស្ងួតនៅក្នុងប្រទេសកម្ពុជា តាមរយៈការដំឡើងប៉មចម្រោះទឹកស្អាត ថ្មីមួយកន្លែង ស្ថិតនៅក្នុងបរិវេណអនុវិទ្យាល័យទួលសុភី នៃស្រុកឧត្តុង្គ ខេត្តកំពង់ស្ពឺ។ បើតាមក្រុមហ៊ុន កូកា កូឡា ប៉មចម្រោះទឹកស្អាតថ្មីនេះ អាចផ្តល់ ទឹកស្អាត ដល់សិស្សានុសិស្ស លោកគ្រូ អ្នកគ្រូ ប្រមាណ៥០០នាក់ ក៏ដូចជាប្រជាពលរដ្ឋដែលរស់នៅក្នុងសហគមន៍ជុំវិញនោះផងដែរ។ ពិធីសម្ពោធប៉មចម្រោះទឹកស្អាតនេះ មានការចូលរួមជាអធិបតីពី លោក សំ រិទ្ធី អ្នកតំណាងរាស្ត្រមណ្ឌលកំពង់ស្ពឺ និងលោក រស់ សោភា នាយកផ្នែកច្បាប់ និងកិច្ចការសាធារណៈប្រចាំប្រទេស នៃក្រុមហ៊ុនភេសជ្ជៈកម្ពុជា កូកា-កូឡា។
លោក រស់ សោភា បានមានប្រសាសន៍ថា ក្រុមហ៊ុន កូកា-កូឡា មានមោទកភាព ដែលបានចូលរួមចំណែក ក្នុងការបង្កើតគម្រោង ដ៏មាន សារៈសំខាន់មួយនេះ ដែលបានកំពុងតែនាំយកទឹកស្អាត មកកាន់សាលារៀន និងសហគមន៍ ជា ច្រើននៅទូទាំងពិភពលោក។ លោក រស់ សោភា បាន បន្តទៀតថា៖«ការប្តេជ្ញាចិត្តរបស់យើងមិនបញ្ឈប់ ត្រឹមតែការដំឡើងប៉មចម្រោះទឹកស្អាតថ្មីក្នុងថ្ងៃនេះប៉ុណ្ណោះទេ ប៉ុន្តែយើងនឹងបន្តគាំទ្រ និងសហការយ៉ាងពេញទំហឹង ជាមួយអង្គការ Planet Water ដើម្បីអនុវត្តកម្មវិធីអប់រំសុខភាព ការប្រើប្រាស់ទឹកស្អាតប្រកបដោយប្រសិទ្ធភាព ការថែរក្សា អនាម័យបរិស្ថាន ការអប់រំបណ្តុះបណ្តាលប្រជាសហគមន៍ អំពីការថែរក្សាការពារ ប៉មចម្រោះទឹកនេះ រួមទាំងការធ្វើលំហែទាំរយៈ ពេល៥ឆ្នាំ។ អង្គការ Planet Water នឹងត្រួតពិនិត្យតាមដានគុណភាពទឹក និងធ្វើលំហែទាំប្រព័ន្ធចម្រោះទឹកជាប្រចាំ ទៅតាមកាលវិភាគកំណត់»។
លោក សំ រិទ្ធី អ្នកតំណាងរាស្ត្រមណ្ឌលកំពង់ស្ពឺ បានថ្លែងកោតសរសើរ ចំពោះក្រុមហ៊ុនភេសជ្ជៈកម្ពុជា ដែលបាន និងកំពុងបន្តសហការជាមួយអង្គការ Planet Water ក្នុងការសាងសង់នូវប៉មចម្រោះទឹកស្អាតនេះឡើង ចំនួន១៨គ្រឿង នៅតាមសហគមន៍នៃខេត្តចំនួន៧ នៅកម្ពុជា។ បើតាម លោក សំ រិទ្ធី នេះជាប៉មចម្រោះទឹកស្អាតទី៣ហើយ ដែលក្រុមហ៊ុនភេសជ្ជៈកម្ពុជា បានដំឡើងនៅខេត្តកំពង់ស្ពឺ ក្នុងនោះប៉មទី១ នៅវិទ្យាល័យភ្នំស្រួច ទី២ នៅវិទ្យាល័យជ្រៃហូព្នៅ និងទី៣គឺនៅអនុវិទ្យាល័យទួលសុភីនេះ។
សូមជម្រាបថា នេះគឺជាប៉មចម្រោះទឹកស្អាតទី២២ ដែលបានដំឡើង ដោយក្រុមហ៊ុន កូកា-កូឡា ជាមួយនឹងស្ថាប័នដៃគូ នៅទូទាំងប្រទេសកម្ពុជា ចាប់តាំងពីឆ្នាំ២០១៦ ក្រោមកិច្ចសហការជាមួយអង្គការPlanet Water ដែលមានការ តម្លើង ប៉មចម្រោះទឹកស្អាត នៅតាមបណ្ដា សហគមន៍នានានៃប្រទេសកម្ពុជា ដែលកំពុងតែ ប្រឈមនឹងការខ្វះ ទឹក ស្អាតសម្រាប់ទទួលទាន។
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com