​អភិវឌ្ឍន៍​ដោយ​ក្រុមហ៊ុន Microsoft នៅ​ឆ្នាំ​១៩៩០ ហ្គេម Solitaire មាន​វត្តមាន​រួចជាស្រេច​នៅលើ Windows កុំព្យូទ័រ​នីមួយៗ​។ ទោះបី​មាន​រយៈពេល​យូរ​ក៏ដោយ ក៏​ហ្គេម​មួយ​នេះ នៅតែ​ជា​ជម្រើស​បំបាត់​ការ​អផ្សុក​របស់​អ្នកប្រើប្រាស់​កុំព្យូទ័រ​ជាច្រើន ដោយសារតែ​វា​មិនមាន​ភាពសាំញ៉ាំ​ដែល​ត្រូវការ​ការណែនាំ​ពន្យល់​ច្រើន បន្ថែម​ពីលើ​នេះ ការលេង​ហ្គេម Solitaire ក៏​ជា​ការរៀន​អនុវត្ត​ប្រើប្រាស់ កូនកណ្តុរ (Mouse) ឲ្យ​ត្រឹមត្រូវ​ផងដែរ​។​

 

​ក្រៅពី Microsoft Windows Solitaire វីដេអូ​ហ្គេម​បី​ផ្សេងទៀត ក៏ត្រូវ​បានដាក់​បញ្ចូល​ក្នុង World Video Game Hall of Fame របស់​សារមន្ទីរ The Strong, National Museum of Play ប្រចាំឆ្នាំ​២០១៩​នេះ​ផងដែរ ដោយ​ក្នុងនោះ​មាន Colossal Cave Adventure, Mortal Kombat និង Super Mario Kart​។​

 

​ជ័យលាភី​ទាំង​៤ ត្រូវបាន​ជ្រើសរើស​ចេញពី​ក្នុងចំណោម​ហ្គេម​ចុងក្រោយ​ចំនួន​១២​។ ហ្គេម​វីដេអូ​៨​ផ្សេងទៀត ដែល​ខក​ឱកាស​ចូលក្នុង Hall of Fame រួមមាន Candy Crush Saga, Centipede, Dance Dance Revolution, Half-Life, Myst, NBA 2K, Sid Meier’s Civilization និង Super Smash Bros. Melee។

 

​ការដាក់បញ្ចូល​ក្នុង Hall of Fame មានន័យថា ហ្គេម​ទាំង​៤ នឹង​ទទួលបាន​កិត្តិយស​សម្រាប់​តាំង​បង្ហាញ​ក្នុង​ព្រឹត្តិការណ៍​ពិ​ព័រ​ណ៌​ធំៗ​ដែល​ពាក់ព័ន្ធ​។ សារមន្ទីរ The Strong, National Museum of Play ដាក់បញ្ចូល​ហ្គេម​ចំនួន​២០​ហើយ​ក្នុង World Video Game Hall of Fame​។​

 

​ជ័យលាភី​២០​កន្លងមក​រួមមាន Final Fantasy VII, John Madden Football, Spacewar!, Tomb Raider (​ឆ្នាំ​២០១៨), Donkey Kong, Halo: Combat Evolved, Pokémon Red and Green, Street Fighter II (​ឆ្នាំ​២០១៧), Grand Theft Auto III, Sonic the Hedgehog, Space Invaders, The Legend of Zelda, The Oregon Trail, The Sims (​ឆ្នាំ​២០១៦), DOOM, Pac-Man, Pong, Super Mario Bros., Tetris និង World of Warcraft នៅ​ឆ្នាំ​២០១៥៕