គិតត្រឹមខែឧសភា ឆ្នាំ២០១៩ លោក សម រង្ស៊ី មេដឹកនាំក្រុមប្រឆាំង ដែលកំពុងនិរទេស បានរងបណ្តឹងដល់ទៅ១០ឯណោះ ដោយក្នុងនោះ បណ្តឹង៨ ត្រូវបានជំនុំជម្រះរួចហើយ ខណៈបណ្តឹង២ទៀត កំពុងស្ថិតក្នុងនីតិវិធីរបស់តុលាការ។
បណ្តឹងដែលត្រូវបានកាត់ក្តីរួច រួមមាន៖
១. បណ្តឹងរបស់លោក ហោ ណាំហុង អតីតរដ្ឋមន្ត្រីក្រសួងការបរទេស៖ តុលាការ បានផ្តន្ទាទោសលោក សម រង្ស៊ី ឲ្យជាប់ពន្ធនាគាររ២ឆ្នាំ និង ពិន័យជាប្រាក់៨លានរៀល (២០០០ដុល្លារ) ពីបទ «ញុះញង់ឲ្យមានការរើសអើង»។
២. បណ្តឹង ដែលព្រះរាជអាជ្ញាដើរតួជាដើមបណ្តឹងខ្លួនឯង៖ លោក សម រង្ស៊ី ត្រូវបានកាត់ទោសឲ្យជាប់ពន្ធនាគារ៥ឆ្នាំ។ តែចៅក្រម សម្រេចឲ្យលោកអនុវត្តទោសក្នុងពន្ធនាគារតែ៣ឆ្នាំប៉ុណ្ណោះ ហើយ២ឆ្នាំទៀត ត្រូវបានព្យួរ។ ក្នុងសំណុំរឿងនេះ តុលាការ បានចោទលោក ពីបទ «សមគំនិតក្នុងអំពើក្លែងបន្លំឯកសារសាធារណៈ ប្រើប្រាស់ឯកសារសាធារណៈនិងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» ដែលពាក់ព័ន្ធនឹងបញ្ហាព្រំដែនកម្ពុជា-វៀតណាម។ (តុលាការ ដូចជាមិនបានតម្រូវឲ្យលោកបង់ប្រាក់ក្នុងបទល្មើសនេះទេ?)។
៣. បណ្តឹងរបស់លោក សោម សឿន រដ្ឋមន្ត្រីប្រតិភូអមនាយករដ្ឋមន្ត្រី៖ តុលាការ បានចោទលោក សម រង្ស៊ី ពីបទ «បរិហារកេរ្តិ៍ជាសាធារណៈ» ។ តុលាការ តម្រូវឲ្យលោក បង់ប្រាក់១០លានរៀល (២៥០០ដុល្លារ) ចូលរដ្ឋ និង១៥លានរៀល (៣៧៥០ដុល្លារ) ឲ្យទៅដើមបណ្តឹង។ បណ្តឹងនេះ កើតឡើងដោយសារតែលោក ចោទសម្តេច ហ៊ុន សែន ថា បញ្ជាមន្ត្រីក្រោមឱវាទឲ្យបង្កើតគណនីហ្វេសប៊ុកក្លែងក្លាយ ដើម្បីយកទៅចុច Like លើទំព័រហ្វេសប៊ុករបស់សម្តេច ហ៊ុន សែន។ បណ្តឹងនេះ ពុំផ្តន្ទាទោសលោក ឲ្យជាប់ពន្ធនាការនោះទេ។
៤. បណ្តឹងរបស់សម្តេច ហេង សំរិន ប្រធានរដ្ឋសភា៖ តុលាការ បានតម្រូវឲ្យលោក សម រង្ស៊ី បង់ប្រាក់១០លានរៀល (២៥០០ដុល្លារ) ចូលទៅរដ្ឋ និង បង់១៥០លានរៀល (៣៧៥០០ដុល្លារ) ទៅឲ្យសម្តេច ហេង សំរិន ដែលជាដើមបណ្តឹង ទុកជាការសងសំណងជំងឺចិត្ត។ សម្តេច ហេង សំរិន បានប្តឹងលោក ពីបទ «បរិហារកេរិ៍្តជាសាធារណៈ»។ បណ្តឹងនេះ ពុំផ្តន្ទាទោសលោក ឲ្យជាប់ពន្ធនាការនោះទេ។
៥. បណ្តឹងរបស់សម្តេចនាយករដ្ឋមន្ត្រី ហ៊ុន សែន៖ បណ្តឹងនេះ ធ្វើឲ្យលោក សម រង្ស៊ី ជាប់ទោស១ឆ្នាំ៨ខែ ក្រោមបទចោទ «បរិហាកេរ្តិ៍ជាសាធារណៈ និងញុះញង់ឲ្យប្រព្រឹត្តិអំពើបង្កឲ្យមានភាពវឹកវរធ្ងន់ធ្ងរក្នុងសន្តិសុខសង្គម»។ លោក រងបណ្តឹងនេះ ព្រោះលោក បានចោទសម្តេច ហ៊ុន សែន ក៏ដូចជា រដ្ឋាភិបាល ថា នៅពីក្រោយខ្នងនៃអំពើឃាតកម្មលើលោក កែម ឡី។ ក្នុងបណ្តឹងនេះ តុលាការ បានពិន័យលោក ឲ្យបង់ប្រាក់១០លានរៀល (២៥០០ដុល្លារ) ចូលទៅរដ្ឋ តែតុលាការ ឲ្យលោកបង់តែ១០០រៀលប៉ុណ្ណោះ ទៅឲ្យសម្ដេច ហ៊ុន សែន ព្រោះសម្តេច ហ៊ុន សែន ទាមទារតែប៉ុណ្ណឹង។
៦. បណ្តឹងរបស់សម្តេច ហ៊ុន សែន ដដែល៖ តុលាការ ឲ្យលោក សម រង្ស៊ី បង់៤ពាន់លានរៀល (១លានដុល្លារ) ទុកជាការសងជំងឺចិត្តដល់សម្ដេច ហ៊ុន សែន និង បង់១០លានរៀល (២៥០០ដុល្លារ) ចូលទៅរដ្ឋ ពីបទ «បរិហារកេរ្តិ៍ជាសាធារណៈ»។ រងបណ្តឹងនេះ ព្រោះលោក បានចោទសម្ដេច ហ៊ុន សែន ថាផ្ដល់ថវិកា១លានដុល្លារឲ្យកញ្ញា ធី សុវណ្ណថា សកម្មជនគណបក្សប្រជាជនកម្ពុជា ដើម្បីឲ្យវាយប្រហារអតីតគណបក្សសង្គ្រោះជាតិ។ បណ្តឹងនេះ មិនធ្វើលោក ឲ្យជាប់ទោសពន្ធនាគារឡើយ។
៧. បណ្តឹងរបស់ក្រសួងការពារជាតិ៖ តុលាការ កំណត់ឲ្យលោក សម រង្ស៊ី ជាប់ពន្ធនាគារ៤ឆ្នាំ ពីបទញុះញង់កងទ័ពមិនឲ្យស្តាប់បទបញ្ជា និង តម្រូវឲ្យលោក បង់ប្រាក់១០លានរៀល (២៥០០ដុល្លារ) ចូលទៅរដ្ឋ។
៨. បណ្តឹងពីបទប្រមាថព្រះមហាក្សត្រ៖ ក្នុងបទល្មើសនេះ តុលាការ ផ្តន្ទាទោសលោក សម រង្ស៊ី ស្មើនឹងបទញុះញង់កងទ័ពដែរ គឺឲ្យលោក ជាប់ពន្ធនាគារ៤ឆ្នាំ និង បង់ប្រាក់១០លានរៀល (២៥០០ដុល្លារ) ចូលទៅរដ្ឋ។
សរុបទោសទាំង៨បទល្មើសនេះ លោក សម រង្ស៊ី ត្រូវបានជាប់ពន្ធនាគារ១៣ឆ្នាំនិង២ខែ ហើយត្រូវបង់ប្រាក់ទាំងអស់ ១.០៥៨.២៥០ ដុល្លារ និង ១០០រៀល។
យ៉ាងណាក៏ដោយ មកដល់ពេលនេះ លោក សម រង្ស៊ី មិនទាន់បានអនុវត្តទោសក្នុងពន្ធនាគារនោះទេ ដ្បិតលោក កំពុងស្ថិតនៅឯក្រៅប្រទេសឯណោះ។ ចំណែកប្រាក់ទាំងប៉ុន្មាន ដែលតុលាការ តម្រូវឲ្យលោកបង់ ក៏លោក មិនទាន់បានបង់ដែរ។
ប៉ុន្តែ កន្លងមក តុលាការ បានរឹបអូសយកទ្រព្យសម្បត្តិរបស់លោកក្នុងប្រទេសកម្ពុជាជាបណ្តោះអាសន្ន គឺអតីតទីស្នាកការកណ្តាលគណបក្សសង្គ្រោះជាតិ។ តុលាការ ប្រាប់ថា ដើម្បីឲ្យមានការលុបចោលនូវការរឹបអូសនេះ លោក សម រង្ស៊ី ត្រូវយកប្រាក់៤២៥០លានរៀល (ជាប្រាក់រំដោះ) ទៅតម្កល់នៅសាលាដំបូងរាជធានីភ្នំពេញ។
បណ្តឹង២ទៀត ដែលមិនទាន់កាត់ក្តីគឺ៖
១. បណ្តឹងរបស់កញ្ញា ធី សុវណ្ណថា៖ ពេលលោក សម រង្ស៊ី ចោទសម្តេច ហ៊ុន សែន ថាឲ្យលុយទៅកញ្ញា ធី សុវណ្ណថា ដើម្បីឲ្យកញ្ញា វាយប្រហារអតីតគណបក្សសង្គ្រោះជាតិ សម្តេច ហ៊ុន សែន ក៏ដាក់ពាក្យប្តឹង ហើយកញ្ញា ក៏ដាក់ពាក្យប្តឹងដែរ។ តែរហូតមកដល់ពេលនេះ បណ្តឹងរបស់កញ្ញា នៅមិនទាន់ឈានដល់ការជំនុំជម្រះនោះទេ ខណៈបណ្តឹងរបស់សម្តេច ហ៊ុន សែន បានជំនុំជម្រះរួចរាល់ហើយ។ កញ្ញា បានប្តឹងលោក សម រង្ស៊ី ពីបទ «បរិហារកេរ្តិ៍ជាសាធារណៈ» ដោយទារសំណងជំងឺចិត្ត២សែន៥ម៉ឺនដុល្លារ។
២. បណ្តឹងរបស់ព្រះរាជអាជ្ញា៖ រឿងក្តីនេះ គឺពាក់ព័ន្ធនឹងបទ «ញុះញង់ បង្កចលាចល ប៉ះពាល់ដល់សន្តិសុខសង្គម» ដែលព្រះរាជអាជ្ញានៃអយ្យការអមសាលាដំបូងរាជធានីភ្នំពេញជាអ្នកដើរតួជាដើមបណ្តឹង។ អង្គហេតុ ដែលនាំឲ្យបណ្តឹងនេះ គឺទាក់ទងនឹងសារនយោបាយរបស់លោក សម រង្ស៊ី ដែលបានថ្លែងនៅក្នុងវត្តខ្មែរមួយ ក្នុងប្រទេសបារាំង កាលពីអំឡុងខែកញ្ញា ឆ្នាំ២០១៦។ ចំពោះបណ្តឹងនេះ ហាក់ស្ថតិក្នុងសភាពស្ងៀមស្ងាត់ ដោយពុំទាន់ឮតុលាការ កោះហៅលោក សម រង្ស៊ី ទៅសាកសួរ ឬក៏បញ្ជូនសំណុំរឿងទៅជំនុំជម្រះឡើយ។
ទោះរងបណ្តឹងច្រើនសន្ធឹកសន្ធាប់បែបនេះក្តី ក៏មិនធ្វើឲ្យលោក សម រង្ស៊ី ពិបាកចិត្តដែរ។ កាលពីថ្ងៃទី៣ ខែឧសភា ឆ្នាំ២០១៩ លោក បានសរសេរសារលើទំព័រហ្វេសប៊ុក ឌឺឲ្យរដ្ឋាភិបាល និងតុលាការកម្ពុជា យ៉ាងដូច្នេះថា «សម្រាប់ខ្ញុំ ជាកិត្តិយសវិញទេ ដែលត្រូវបានផ្តន្ទាទោស ឲ្យជាប់ពន្ធនាគារច្រើនឆ្នាំបែបនេះ ដោយសារខ្ញុំ គ្រាន់តែធ្វើសកម្មភាពនយោបាយដោយសន្តិវិធី។ នេះបង្ហាញថាខ្ញុំ កំពុងតែធ្វើត្រូវហើយ ដោយខិតខំទាមទារសេរីភាព ជូនប្រជារាស្ត្រខ្មែរទាំងមូល»។
ម្យ៉ាងទៀត ទោះជារដ្ឋាភិបាល ព្រមានចាប់ដាក់ពន្ធនាគារក៏ដោយ មេដឹកនាំក្រុមប្រឆាំងរូបនេះ នៅតែប្រកាសថា នឹងវិលមកកម្ពុជាវិញ នៅឆ្នាំ២០១៩។ លោក ជឿជាក់ថា វត្តមានរបស់លោក នឹងធ្វើឲ្យកម្ពុជាមានការផ្លាស់ប្តូរ៕