ក្រុមកីឡាករកីឡាការិនីប៉េតង់កម្ពុជា មិនបានទទួលលទ្ធផលល្អឡើយនាការប្រកួតកីឡាប៉េតង់ជ្រើសរើសជើងឯកពិភពលោកនៅប្រទេសអេស្ប៉ាញ។ ក្នុងចំណោម៥វិញ្ញាសា មានតែពីរវិញ្ញាសាប៉ុណ្ណោះ ដែលកម្ពុជាបានឡើងទៅកាន់វគ្គខ្វែង ខណៈក្រៅពីនេះធ្លាក់ត្រឹមវគ្គជម្រុះ។
ក្រុមកីឡាករកីឡាការិនីប៉េតង់កម្ពុជាមិនទទួលបានមេដាយឡើយ ពីការប្រកួតកីឡាប៉េតង់ជ្រើសរើសជើងឯកពិភពលោក ដែលរៀបចំចន្លោះពីថ្ងៃទី២ ខែឧសភា ឆ្នាំ២០១៩ នៅប្រទេសអេស្ប៉ាញ។ ក្នុងចំណោម៥វិញ្ញាសា មានតែវិញ្ញាសាវាយទោលនារីរបស់កីឡាការិនី អ៊ុក ស្រីមុំ និងវាយគូចម្រុះ ដែលជាការចាប់ដៃគ្នារវាងកីឡាការិនី កែ ឡេង ជាមួយកីឡាករ សុខ ចាន់មាន ប៉ុណ្ណោះ ដែលបានឆ្លងផុតវគ្គជម្រុះទៅកាន់វគ្គខ្វែង។
នាការប្រកួតវគ្គជម្រុះលើវិញ្ញាសាវាយទោលនារីកីឡាការិនី អ៊ុក ស្រីមុំ បានបញ្ចប់ក្នុងចំណាត់ថ្នាក់លេខ៧។ បន្ទាប់មកកីឡាការិនីរូបនេះបានបន្តយកឈ្នះកីឡាការិនីន័រវែស ក្នុងលទ្ធផល ១៣-៣ នៅវគ្គ១/៨ ប៉ុន្តែចាញ់កីឡាការិនីថៃ ១៣-៥ នៅវគ្គ១/៤ ដែលធ្វើឲ្យនាងបាត់បង់ឱកាសឡើងទៅវគ្គបន្ត។ កីឡាការិនីបារាំង Charlotte Darodes ទទួលបានមេដាយមាស ក្រោយយកឈ្នះកីឡាការិនីថៃ Phantipha Wongchuvej ក្នុងលទ្ធផល ១៣-១០ នៅវគ្គផ្តាច់ព្រ័ត្រ។
សម្រាប់វិញ្ញាសាវាយគូចម្រុះ(បុរស-នារី)ដែលជាការចាប់ដៃគ្នារវាងកីឡាការិនី កែ ឡេង ជាមួយកីឡាករ សុខ ចាន់មាន បានឡើងទៅកាន់វគ្គ១/៨ ក្រោយបញ្ចប់ក្នុងចំណាត់ថ្នាក់លេខ១១នៅវគ្គជម្រុះដំបូង។ ប៉ុន្តែពួកគេទាំងពីរបានអស់ឱកាសឈានទៅវគ្គបន្ត ក្រោយចាញ់ស៊ុយអែតយ៉ាងប្រផិតប្រផើយ ១៣-១១ នៅវគ្គនេះ។ ក្រុមកីឡាករថៃទទួលបានមេដាយមាស ក្រោយយកឈ្នះក្រុមបារាំងក្នុងលទ្ធផល ១៣-៩។
ដោយឡែកវិញ្ញាសាវាយគូបុរស ដែលជាការចាប់ដៃគ្នារវាងកីឡាករ សុខ ចាន់មាន ជាមួយ សៅ សុភារ៉ាន់ បានបញ្ចប់ក្នុងចំណាត់ថ្នាក់លេខ៣៩ក្នុងចំណោម៤៨ប្រទេស ខណវាយគូនារីរបស់កីឡាការិនី អ៊ុក ស្រីមុំ ជាមួយ កែ ឡេង បញ្ចប់ក្នុងចំណាត់ថ្នាក់លេខ២១ក្នុងចំណោម៤២ប្រទេស និងវាយទោលកីឡាករ សុខ ចាន់មាន បញ្ចប់ក្នុងចំណាត់ថ្នាក់លេខ៣៤ក្នុងចំនោមកីឡាករ៤២រូប។
កីឡាការិនី អ៊ុក ស្រីមុំ ម្ចាស់មេដាយមាសពិភពលោកលើវិញ្ញាសា១នាក់ទល់១នាក់នៅបែលហ្ស៊ិកឆ្នាំ២០១៧ ខណៈកីឡាការិនី កែ ឡេង ម្ចាស់មេដាយមាស៣ជំនាន់លើវិញ្ញាសាវាយយកពិន្ទុ ក្នុងនោះនៅបារាំងឆ្នាំ២០១៣ ថៃឆ្នាំ២០១៥ និងចិនឆ្នាំ២០១៧។ ចំណែកកីឡាករ សុខ ចាន់មាន ម្ចាស់មេដាយមាសពិភពលោកលើវិញ្ញាសាវាយយកពិន្ទុនៅប្រទេសម៉ាដាហ្គាស្កាឆ្នាំ២០១៦។
សម្រាប់ការប្រកួតជើងឯកពិភពលោកនៅប្រទេសអេស្ប៉ាញនេះ កម្ពុជាបានបញ្ជូនកីឡាករកីឡាការិនី៤ឲ្យចូលរួម រួមមានកីឡារិនី កែ ឡេង, អ៊ុក ស្រីមុំ, កីឡាករ សុខ ចាន់មាន និងកីឡាករ សៅ សុភារ៉ាន់។ បើគ្មានការប្រែប្រួល ប្រតិភូកីឡាប៉េតង់កម្ពុជានឹងមកដល់មាតុភូមិវិញនៅថ្ងៃទី៧ ខែឧសភា ឆ្នាំ២០១៩។
កម្ពុជានឹងធ្វើជាម្ចាស់ផ្ទះការប្រកួតកីឡាប៉េតង់ជ្រើសរើសជើងឯកពិភពលោកនៅអំឡុងខែវិច្ឆិកា ឆ្នាំ២០១៩ ខាងមុខនេះ។ ដូច្នេះតាមរយៈលទ្ធផលដ៏មិនគួរឲ្យជឿខាងលើ ទាមទារឲ្យកីឡាករកីឡាការិនីកម្ពុជា ត្រូវយកចិត្តទុកដាក់ និងបង្កើនការហ្វឹកហាត់ឲ្យកាន់តែខ្លាំងទ្វេដង ដើម្បីពង្រឹង និងអភិវឌ្ឍសមត្ថភាពឲ្យកាន់តែប្រសើរ៕