អន្តរជាតិ
នៅចិន អាគារពាណិជ្ជកម្មភាគច្រើនខ្ពស់ៗ តែអាគារក្រុមហ៊ុន«ជេក ម៉ា»ទាប ហេតុអ្វី?
× ក្រុងហាងចូវ៖ អាគារពាណិជ្ជកម្មនៅក្នុងទីក្រុងហាងចូវ ខេត្តជឺជាំង ប្រទេសចិន ភាគច្រើនមានកម្ពស់ខ្ពស់ ប៉ុន្តែ ខុសប្លែកពីអាគារក្រុមហ៊ុន Alibaba របស់មហាសេដ្ឋីចិនលោក ជេក ម៉ា ដែលសង់អាគារត្រឹមតែ៦ជាន់ប៉ុណ្ណោះ។ ជាមហាសេដ្ឋីមានប្រាក់ចាយមិនអស់ តើហេតុអ្វីបានជាលោក ជេក ម៉ា មិនចំណាយប្រាក់សង់អាគារពាណិជ្ជកម្មកម្ពស់រាប់សិបជាន់ ដូចក្រុមហ៊ុនដទៃនៅក្នុងប្រទេសចិន?
«តាមសមត្ថភាពលោកជេក ម៉ា អាចសាងសង់អាគារខ្ពស់ៗ៣០-៤០ជាន់ក៏បានដែរ។ តែលោក ជេក ម៉ា ចូលចិត្តអាគារមានលក្ខណៈដូចនឹងសាលារៀន ដែលមានកម្ពស់មិនខ្ពស់ ហើយអាចដើរឆ្លងកាត់ពីអាគារមួយទៅអាគារមួយទៀតបានយ៉ាងស្រួល»។ លោក WU Szhe បុគ្គលិកនៃក្រុមហ៊ុន Alibaba បានឆ្លើយនឹងសំណួររបស់អ្នកសារព័ត៌មានថ្មីៗយ៉ាងដូច្នេះ ក្នុងដំណើរទស្សនកិច្ចសិក្សានៅក្នុងក្រុមហ៊ុន Alibaba កាលពីចុងខែមេសា ឆ្នាំ២០១៩កន្លងទៅ។
សូមអញ្ជើញទស្សនាវីដេអូខ្លី នៅខាងក្រោមនេះ៖
លោក ជេក ម៉ា ដែលជាអតីតគ្រូបង្រៀនម្នាក់នៅប្រទេសចិន ហាក់ជាប់ចិត្តនឹងទិដ្ឋភាពអាគារសាលារៀន ដែលមានកម្ពស់ទាបល្មម អមដោយរុក្ខជាតិតូចធំ និងមានបរិស្ថានស្អាតត្រជាក់ភ្នែកនៅជុំវិញខ្លួនរបស់លោក នេះហើយជាហេតុជំរុញទឹកចិត្តឲ្យលោក ជេក ម៉ា សាងសង់អាគារពាណិជ្ជកម្មរបស់របស់លោក មានលក្ខណៈដូចនឹងសាលារៀន។
ដូច្នេះអាគាររបស់ក្រុមហ៊ុន Alibaba ដែលមានទីតាំងស្ថិតនៅក្នុងទីក្រុងហាងចូវ មានចំនួន៩អាគារ និងកម្ពស់ត្រឹមតែ ៦ជាន់ប៉ុណ្ណោះ ហើយអាចដើរឆ្លងកាត់ពីអាគារមួយទៅអាគារមួយទៀតបានយ៉ាងស្រួល។
សូមបញ្ជាក់ថា ក្រុមហ៊ុន Alibaba របស់មហាសេដ្ឋីចិនលោក ជេក ម៉ា បង្កើតឡើងនៅឆ្នាំ១៩៩៩ ហើយបច្ចុប្បន្ន ក្រុមហ៊ុននេះមានបុគ្គលិកបម្រើការជិត ៨ម៉ឺននាក់៕
Tag:
ជេក ម៉ា
Alibaba
ចិន
ហាងចូវ
ជឺជាំង
© រក្សាសិទ្ធិដោយ thmeythmey.com