លើកដំបូង ដែលលោក សុខ ទូច ត្រូវតុលាការកោះហៅ ក្រោមបណ្តឹងបក្សខ្មែរក្រោក

ជាតិ

នយោបាយជាតិ

លើកដំបូង ដែលលោក សុខ ទូច ត្រូវតុលាការកោះហៅ ក្រោមបណ្តឹងបក្សខ្មែរក្រោក

07, May 2019 , 4:20 pm

រូបភាព

លោក សុខ ទូច ប្រធានរាជបណ្ឌិត្យសភាកម្ពុជា

ដោយ: ថ្មីៗ

លោក វ៉ា សក្តា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានចេញដីកាកោះហៅលោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា ឲ្យចូលបំភ្លឺ នៅថ្ងៃទី១០ ខែឧសភា ឆ្នាំ២០១៩ ជុំវិញបណ្តឹងរបស់គណបក្សខ្មែរក្រោក ដែលមានលោក សុខសុវណ្ណ វឌ្ឍនាសាប៊ុង ហៅ វិលាម ហ្គ័ង ជាប្រធាន។

យោងតាមដីការបស់ព្រះរាជអាជ្ញា គណបក្សខ្មែរក្រោក បានប្តឹងលោក សុខ ទូច ពីបទកុបកម្ម និង បទជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ។ ព្រះរាជអាជ្ញា ប្រាប់លោក សុខ ទូច យ៉ាងដូច្នេះថា «សាមីខ្លួន ត្រូវអញ្ជើញតាមដីកាកោះនេះ ឲ្យបានទាន់ពេលវេលា និងយកលិខិតផ្សេងៗ ដែលទាក់ទងនឹងរឿងខាងលើមកជាមួយផង បើមាន»។

ជាលើកទី១ សម្រាប់លោក សុខ ទូច ដែលត្រូវបានតុលាការកោះហៅ។ ប្រធានរាជបណ្ឌិត្យសភារូបនេះ សរសេរលើបណ្តាញសង្គម យ៉ាងដូច្នេះថា «វា ជារឿងចម្លែកក្នុងជីវិតរបស់ខ្ញុំ ព្រោះមិនធ្លាប់ត្រូវបានតុលាការកោះហៅទេ តែពេលនេះ ត្រូវបានព្រះរាជអាជ្ញា កោះហៅ តាមបណ្តឹងរបស់គណបក្សខ្មែរក្រោក។ ទោះបីខ្ញុំ មមាញឹករកពេលសម្រាកមិនបានក្នុងការបំពេញការងាររាជការ ក៏ខ្ញុំនឹងចូលខ្លួនតាមការកោះហៅនេះ»។

លោក សុខ ទូច រងបណ្តឹងខាងលើ គឺដោយសារតែរិះគន់គណបក្សខ្មែរក្រោក ដែលធ្វើយុទ្ធនាការប្រមូលស្នាមមេដៃពីប្រជាពលរដ្ឋ ដើម្បីប្តឹងទារយកកោះត្រល់វិញ។ កាលនោះ លោក សុខ ទូច លើកឡើងថា ការទាមទារកោះត្រល់គឺជាភារកិច្ចរបស់រដ្ឋាភិបាល ហើយលោក យល់ថា សមត្ថកិច្ច គួរចាត់វិធានការ (ចាប់ដាក់គុក) ចំពោះអ្នកផ្សេង ដែលធ្វើចលនាទាមទារកោះត្រល់នេះ៕