ព្រះសាកលវិទ្យាធិការរង រិះគន់មន្ត្រីសង្ឃ និងគ្រហស្ថដែលយកតែតួនាទី ហើយមិនបំពេញការងារ

ជាតិ

សង្គមជាតិ

ព្រះសាកលវិទ្យាធិការរង រិះគន់មន្ត្រីសង្ឃ និងគ្រហស្ថដែលយកតែតួនាទី ហើយមិនបំពេញការងារ

07, May 2019 , 7:19 pm

រូបភាព

រូបពីពុទ្ធិកសាកលវិទ្យាព្រះសីហនុរាជ

ដោយ: ឡាយ សុភាវតី

ព្រះតេជគុណ ធម្មឃោសាចារ្យ ឃី សុវណ្ណរតនា សាកលវិទ្យាធិការរងនៃពុទ្ធិកសាកលវិទ្យាល័យព្រះសីហនុរាជ បានចេញសេចក្តីជូនដំណឹងមួយ ប្រគេននិងជូនទៅព្រះសង្ឃ និង គ្រហស្ថ ដែលជាគ្រូបង្រៀន និងជាមន្ត្រីនៃសាកលវិទ្យាល័យនេះ ឲ្យមានវត្តមាននៅកន្លែងការងារ និងត្រូវបំពេញកាតព្វកិច្ចរបស់ខ្លួនតាមច្បាប់កំណត់។

តាមរយៈសេចក្តីជូនដំណឹង ដែលចេញនៅថ្ងៃទី៦ ខែឧសភា ឆ្នាំ២០១៩ ព្រះអង្គ មានសង្ឃដីកា យ៉ាងដូច្នេះថា «ករណីព្រះតេជគុណ អស់លោក លោកស្រី មិនបានបំពេញកាតព្វកិច្ចរបស់ខ្លួន ពុទ្ធិកសាកលវិទ្យាល័យព្រះសីហនុរាជ មិនទទួលខុសត្រូវចំពោះការបង្កកប្រាក់ខែរបស់ខ្លួនឡើយ»។

មិនត្រឹមតែចេញសេចក្តីជូនដំណឹងទេ ព្រះអង្គ នៅបង្ហោះសារលើគណនីហ្វេសប៊ុករបស់ព្រះអង្គថែមទៀត ជំវិញរឿងនេះ ដោយព្រះអង្គ បានសរសេរអមជាមួយនឹងសេចក្តីជូនដំណឹងបែបនេះថា «មានងារហើយ សូមមកបំពេញការងារផង កុំយកតែតួនាទី មិនមកបំពេញកាតព្វកិច្ចការងារនោះ មិនល្អសោះឡើយ»។

ព្រះតេជគុណ ឃី សុវណ្ណរតនា ព្រះសាកលវិទ្យាធិការរងនៃពុទ្ធិកសាកលវិទ្យាល័យព្រះសីហនុរាជ

លោក សេង សុមុនី អ្នកនាំពាក្យក្រសួងធម្មការ និងសាសនា ប្រាប់សារព័ត៌មានថ្មីៗថា មិនមានព្រះសង្ឃ និងមន្ត្រីណា មិនបំពេញកាតព្វកិច្ចនោះទេ។ លោក បកស្រាយថា ព្រះអង្គ ឃី សុវណ្ណរតនា ចេញសេចក្តីជូនដំណឹងនេះ គឺជាការដាស់តឿនព្រះសង្ឃនិងមន្ត្រី ឲ្យចូលធ្វើការ ព្រោះពុទ្ធិកសាកលវិទ្យាល័យព្រះសីហនុរាជ ទើបនឹងបើកបវេសនកាលឡើងវិញ សម្រាប់ឆ្នាំសិក្សា២០១៩-២០២០។

អ្នកនាំពាក្យរូបនេះ បញ្ជាក់យ៉ាងដូច្នេះថា «សាលាឈប់សម្រាក ហើយឥឡូវចូលរៀនវិញ អ៊ីចឹង ព្រះអង្គគ្រាន់តែដាស់តឿន»៕