អន្តរជាតិ
ក្រុងបាងកក គ្រោងដាំដើមឈើ១០ម៉ឺនដើមសម្រាប់លម្អសោភ័ណភាពបៃតង ប្រភពរូប៖ Asia One
× អាជ្ញាធរក្រុងបាងកក មានផែនការ វិនិយោគលុយ ៣០លានបាត ឬស្មើនឹងជាង ៩៤ម៉ឺនដុល្លារ ក្នុងការដាំឈើ១០ម៉ឺនដើមនៅឆ្នាំ២០១៩នេះ ។ គម្រោងនេះ គឺជាកិច្ចប្រឹងប្រែងមួយរបស់រដ្ឋាភិបាលក្នុងគោលដៅបង្កើនសោភ័ណភាពបៃតងរបស់រាជធានីបាងកក។
គម្រោងដាំឈើ១០ម៉ឺនដើមក្នុងទីក្រុងបាងកកនេះ ត្រូវបានបញ្ជូនទៅកាន់ការិយាល័យអភិបាលក្រុងបាងកក ដើម្បីត្រួតពិនិត្យ និងអនុម័តកញ្ចប់ថវិកា។ នេះបើតាមការបញ្ជាក់របស់លោក Wiparat Chaiyanukij លេខាធិការរងនៃរដ្ឋបាលក្រុងបាងកក (BMA) នៅថ្ងៃអង្គារទី៧ ឧសភា ដោយបន្ថែមថា គម្រោងនេះ នឹងត្រូវបែងចែកជាពីរដំណាក់កាល។ នេះបើតាមការចុះផ្សាយរបស់កាសែត The Nation ។
បើតាមលោក Wiparat សម្រាប់ដំណាក់កាលទីមួយ ដើមឈើ៥ម៉ឹនដើម ដែលត្រូវការលុយ៥លានបាត ឬស្មើនឹងជាង ១៥ម៉ឺនដុល្លារ នឹងត្រូវដាំនៅឧទ្យានសាធារណៈ និងការិយាល័យរដ្ឋ។ ចំណែកឯ សម្រាប់ដំណាក់កាលទីពីរ ដើមឈើ៥ម៉ឺនដើមបន្ថែមទៀត ដែលម្តងនេះត្រូវការលុយ២៥លានបាត ឬស្មើនឹងជាង៧៨ម៉ឺនដុល្លារ នឹងត្រូវដាំនៅលើដីរបស់អង្គការឯកជន វិហារ និងសាលារៀនជាដើម។
សូមបញ្ជាក់ថា បច្ចុប្បន្ននេះ ទីក្រុងបាងកក មានតំបន់បៃតង ៣២០០ ហិចតា ក្នុងទម្រង់ជាឧទ្យានសាធារណៈ និងសួនច្បារ។ កន្លងទៅ សាលាក្រុងថៃ ក៏បានចាប់ផ្តើមអនុវត្តដំណោះស្រាយបីធំៗដើម្បីពង្រីកផ្ទៃដីបៃតងខ្លួនផងដែរ។ ទីមួយ គឺស្វែងរកផ្ទៃដីទំនេរដែលស្ថិតក្រោមការកាន់កាប់របស់ខ្លួន រួចហើយប្រែក្លាយតំបន់នោះសម្រាប់ការប្រើប្រាស់សាធារណៈ។
ទីពីរ គឺបង្កើនចំនួនឧទ្យានសាធារណៈឲ្យលើសចំនួនបច្ចុប្បន្ន៣៥កន្លែង។ ចុងក្រោយ គឺលើកទឹកចិត្តឲ្យវិស័យឯកជន ជួយបង្កើតសោភ័ណភាពបៃតងលើការិយាល័យខ្លួន និងជារួម គាំទ្រគម្រោងរបស់សាលាក្រុងបាងកកក្នុងគោលដៅបង្កើនទីតាំងបៃតង៕
Tag:
ថៃ
ក្រុងបាងកក
បរិស្ថាន
© រក្សាសិទ្ធិដោយ thmeythmey.com