ដឹកនាំប្រទេសបានជិតមួយឆ្នាំ លោក មហាធៀ ឲ្យពិន្ទុរដ្ឋមន្ត្រីត្រឹម៥លើ១០

អន្តរជាតិ

ដឹកនាំប្រទេសបានជិតមួយឆ្នាំ លោក មហាធៀ ឲ្យពិន្ទុរដ្ឋមន្ត្រីត្រឹម៥លើ១០

07, May 2019 , 8:39 pm

រូបភាព

ដោយ: តន ចាន់រិទ្ធារ៉ា

ចូលដឹកនាំប្រទេសបានជិតមួយឆ្នាំ នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នៅមិនទាន់ពេញចិត្តលទ្ធផលសម្រេចបានដោយសមាជិកគណៈរដ្ឋមន្ត្រីរបស់លោកឡើយ។ មេដឹកនាំជើងចាស់រូបនេះ បានផ្ដល់ពិន្ទុត្រឹម៥ប៉ុណ្ណោះឲ្យគណៈរដ្ឋមន្ត្រីរបស់លោក ដោយលោកអះអាងថា មន្ត្រីរដ្ឋាភិបាលភាគច្រើននៅក្មេងនៅឡើយ មិនទាន់មានបទពិសោធគ្រប់គ្រាន់ ហើយខ្លះទៀតខ្លាចការបង្កើតកំហុសទៅទៀត។ ប៉ុន្តែ លោកនឹងមិនដោះដូរតំណែងពួកគេឡើយ។

គិតត្រឹមថ្ងៃទី៧ ខែឧសភា នៅសល់ពីរថ្ងៃប៉ុណ្ណោះ នឹងដល់ថ្ងៃគម្រប់មួយឆ្នាំនៃការបោះឆ្នោតនៅម៉ាឡេស៊ី។ កាលពីថ្ងៃទី៩ ខែឧសភា ការភ្ញាក់ផ្អើលបានកើតឡើងក្នុងឆាកនយោបាយម៉ាឡេស៊ី ក្រោយសម្ព័ន្ធភាពប្រឆាំង Pakatan Harapan ដឹកនាំដោយអតីតនាយករដ្ឋមន្ត្រី មហាធៀ មហាម៉ាត់ ផ្ដួលសម្ព័ន្ធភាពកាន់អំណាច Barisan Nasional របស់លោក ណាជីប រ៉ាហ្សាក់ ដែលកាន់អំណាចតាំងពីម៉ាឡេស៊ីបានឯករាជ្យនៅឆ្នាំ១៩៥៧ ។

ជិតមួយឆ្នាំក្នុងអំណាច រដ្ឋាភិបាលថ្មីដឹកនាំលោក មហាធៀ ផ្ទាល់ រងការរិះគន់មិនតិចឡើយជុំវិញបរាជ័យមិនអាចអនុវត្តតាមពាក្យសន្យារបស់ខ្លួន ខណៈប្រជាជនម៉ាឡេស៊ីខ្លះយល់ឃើញថា រដ្ឋាភិបាលថ្មី មិនខុសពីរដ្ឋាភិបាលមុនឡើយ។ ក្នុងការស្ទង់មតិចុងក្រោយ ប្រជាប្រិយភាពរបស់លោក មហាធៀ និងរបស់រដ្ឋាភិបាលបានធ្លាក់ចុះយ៉ាងគំហុក។

ទោះយ៉ាងណា នាយករដ្ឋមន្ត្រីវ័យ៩៣ឆ្នាំរូបនេះ នឹងមិនរុះរើគណៈរដ្ឋមន្ត្រីឡើយ។ ក្នុងកិច្ចសម្ភាសជាមួយក្រុមអ្នកសារព័ត៌មាននៅថ្ងៃទី៦ ខែឧសភា លោក មហាធៀ អះអាងថា លោកគ្មានមូលហេតុដែលត្រូវផ្លាស់ប្ដូរសមាជិកគណៈរដ្ឋមន្ត្រីរបស់លោកឡើយ។ តបនឹងសំណួរពាក់ព័ន្ធការងាររបស់សមាជិករដ្ឋាភិបាលដែលមានអាយុជិតមួយឆ្នាំនេះ លោកបានដាក់ពិន្ទុឲ្យបណ្ដាមន្ត្រីនានាត្រឹម៥លើ១០ ប៉ុណ្ណោះ។ នេះបើតាមការផ្សាយរបស់សារព័ត៌មាន The Star ។

ក្នុងកិច្ចសម្ភាសដដែលនោះ លោក មហាធៀ ពន្យល់ថា លោកធ្លាប់ដឹកនាំប្រទេស២២ឆ្នាំទៅហើយ ដូចនេះលោកដឹងច្បាស់ពីដំណើរការរបស់រដ្ឋាភិបាល។ ប៉ុន្តែរដ្ឋមន្ត្រីបច្ចុប្បន្ន ជាមនុស្សថ្មី ហើយមិនសូវយល់ពីដំណើរការរដ្ឋាភិបាលឡើយ។ លោកបន្តថា មានរដ្ឋមន្ត្រីខ្លះ ខ្លាចរងពាក្យរិះគន់នៅពេលសម្រេចចិត្តខុសលើបញ្ហាអ្វីមួយ ប៉ុន្តែឆ្លៀតសរសើរវិញថា ថ្នាក់ក្រោមរបស់លោក ជាមនុស្សដែលរៀនសូត្របានរហ័ស។

សូមបញ្ជាក់ថា សមាជិករដ្ឋាភិបាលម៉ាឡេស៊ីទាំងមូល កើតចេញពីសម្ព័ន្ធភាព Pakatan Harapan ដែលមានបក្សធំៗចំនួន៤ ហើយមានលោក មហាធៀ ដែលធ្លាប់ជានាយករដ្ឋមន្ត្រីនៅឆ្នាំ១៩៨១-២០០៣ ជាមេដឹកនាំសំខាន់ៗ។ វត្តមានរបស់លោក មហាធៀ ដែលជារដ្ឋបុរសមួយរូបរបស់ម៉ាឡេស៊ី ជាមូលហេតុសំខាន់ដែលនាំឲ្យសម្ព័ន្ធភាពប្រឆាំងមួយនេះផ្ដួលបក្សកាន់អំណាច ដែលលោក មហាធៀ ផ្ទាល់ធ្លាប់ដឹកនាំដែរនោះ៕