កីឡាអន្តរជាតិ
អន្តរជាតិ
Tiger Woods ឈ្នះមេដាយកិត្តិយសខ្ពស់បំផុតសម្រាប់ជនស៊ីវិលអាមេរិកពីដូណាល់ ត្រាំ
× កំពូលអ្នកវាយកូនគោលពិភពលោក Tiger Woods ឈ្នះមេដាយលំដាប់កំពូលរបស់អាមេរិក Presidential Medal of Freedom នៅឆ្នាំ២០១៩ ដែលផ្តល់ជូនដោយផ្ទាល់ពីសំណាក់ប្រធានាធិបតីអាមេរិក ដូណាល់ ត្រាំនៅឯសេតវិមាន នាថ្ងៃទី៧ ខែឧសភានេះ។
Presidential Medal of Freedom ជាមេដាយកិត្តិយសដែលបង្កើតឡើងតាំងពីឆ្នាំ១៩៦៣មក សម្រាប់ផ្តល់ជូនទៅឲ្យជនស៊ីវិលអាមេរិករូបណាដែលបង្កើតភាពលេចធ្លោជាងគេបំផុត។
កីឡាករវាយកូនគោលសញ្ជាតិអាមេរិកវ័យ៤៣ឆ្នាំ Tiger Woods បានបង្ហាញខ្លួនដ៏អស្ចារ្យ តាមរយៈការឈ្នះពានកំពូល Masters ជាលើកទី៥របស់ខ្លួនយ៉ាងភ្ញាក់ផ្អើលបំផុត នៅឆ្នាំ២០១៩នេះ ដែលធ្វើឲ្យលោកត្រាំសម្រេចផ្តល់មេដាយនេះឲ្យរូបគេតែម្តង។
ប្រធានាធិបតីអាមេរិករូបនេះថែមទាំងសរសើរចំពោះការខិតខំប្រឹងប្រែង និងឆន្ទៈរបស់ Tiger Woods ផងដែរ។
«គុណសម្បត្តិទាំងនេះបានបញ្ចូលក្នុងស្មារតីប្រជាពលរដ្ឋអាមេរិកក្នុងការជំរុញទឹកចិត្តក្នុងការធ្វើអ្វីមួយ និងការខិតខំដើម្បីភាពអស្ចារ្យ»។ លោកត្រាំលើកសរសើរទៅកាន់អ្នកវាយកូនគោលលំដាប់ទី៦ពិភពលោកដូច្នេះ។
ប្រធានាធិបតីត្រាំ ធ្លាប់ផ្តល់មេដាយនេះម្តងរួចមកហើយកាលពីឆ្នាំមុនទៅឲ្យអតីតកីឡាករបាល់ទាត់អាមេរិក (American Football) លោក Roger Staubach ចាប់តាំងពីលោកឡើងកាន់តំណែងនេះកាលពីឆ្នាំ២០១៧។ អតីតប្រធានាធិបតីអាមេរិក Barack Obama ក្នុងឆ្នាំ២០១៧ ក៏ធ្លាប់ផ្តល់មេដាយនេះដល់អតីតអនុប្រធានាធិបតីអាមេរិក Joe Biden ផងដែរ៕
Tag:
វាយកូនគោល
Tiger Woods
Presidential Medal of Freedom
© រក្សាសិទ្ធិដោយ thmeythmey.com