ជាតិ
ក្រុមប្រឹក្សាជាតិភាសាខ្មែរ ប្រមូលពាក្យមហាជនបាន៤០០០ពាក្យ សម្រាប់ដាក់ឲ្យប្រើប្រាស់ក្នុងវចនានុក្រមថ្មី លោក ហ៊ាន សុខុម ប្រធានក្រុមប្រឹក្សាជាតិភាសាខ្មែរ
× ភ្នំពេញ៖ ភាពចម្រូងចម្រាសរបស់ប្រជាពលរដ្ឋ ទាក់ទងនឹងការប្រើប្រាស់ពាក្យសាមញ្ញ ឬពាក្យមហាជន ដែលបង្កើតឡើងដោយប្រជាពលរដ្ឋ និយាយនៅតាមតំបន់ ឬហៅវត្ថុអ្វីមួយ តាមទម្លាប់ធម្មតា ដែលគ្មាននៅក្នុងវចនានុក្រមសម្ដេចសង្ឃ ជួន ណាត នោះ ត្រូវបានក្រុមប្រឹក្សាជាតិភាសាខ្មែរ ប្រមូលយកមករៀបចំដាក់ឲ្យប្រើប្រាស់ក្នុងវចនានុក្រមថ្មីហើយ។
លោក ហ៊ាន សុខុម បាននិយាយថា ពាក្យដែលក្រុមប្រឹក្សាជាតិភាសាខ្មែរ ប្រមូលយកមករៀបចំដាក់ក្នុងវចនានុក្រមថ្មីនោះ ភាគច្រើនផ្ដោតទៅលើពាក្យរបស់ពលរដ្ឋ ដែលពួកគាត់ប្រើប្រាស់ប្រចាំថ្ងៃ សម្រាប់ហៅអ្វីមួយចំណាំ ហើយមានន័យគ្រប់គ្រាន់ ដែលអាចយកជាការបាន។ បើតាមលោក ហ៊ាន សុខុម នៅពេលនេះស្ថាប័នលោក បានប្រមូលពាក្យមហាជននេះ បានជាង៤០០០ពាក្យហើយ ។
សូមស្ដាប់កិច្ចសម្ភាសរវាងលោក រំដួល ចិត្រា អ្នកសារព័ត៌មានថ្មីៗ និងលោកបណ្ឌិត ហ៊ាន សុខុម ប្រធានក្រុមប្រឹក្សាជាតិភាសាខ្មែរ ដូចតទៅ៖
ដ្បិតក្រុមប្រឹក្សាជាតិភាសាខ្មែរ កំពុងដោះស្រាយបញ្ហាប្រើប្រាស់ពាក្យរបស់ពលរដ្ឋក្តី ប៉ុន្តែលោក ហ៊ាន សុខុម ក៏មិនចង់ឲ្យពលរដ្ឋចេះតែប្រើប្រាស់ពាក្យដែលគ្មានស្ដង់ដារដែរ។ ត្រង់ចំណុចនេះលោក ហ៊ាន សុខុម ជំរុញឲ្យនិស្សិត បញ្ញវ័ន្ត និងពលរដ្ឋ ប្រើប្រាស់ពាក្យ ឬភាសាខ្មែរ ឲ្យបានត្រឹមត្រូវតាមវចនានុក្រម ។ ជាពិសេសការប្រើប្រាស់ពាក្យមានន័យគ្រប់គ្រាន់ ពោលគឺកុំចេះតែបង្កើតពាក្យថ្មី ដែលគ្មានអត្ថន័យអ្វីឡើយ។
ក្រៅពីពាក្យខាងលើនេះ ក្រុមប្រឹក្សាជាតិភាសាខ្មែរ បានសម្រេចដាក់ឲ្យប្រើប្រាស់ពាក្យបច្ចេកទេសស្របតាមវិទ្យាសាស្ត្រ ដែលបង្កើតឡើងថ្មីនោះ បានប្រហែល២៥០០ពាក្យហើយ ចាប់តាំងពីឆ្នាំ២០០៧មក។
ពាក្យទាំងនោះ ភាគច្រើនសុទ្ធតែជាពាក្យបច្ចេកទេស មានទាំងនៅក្នុងផ្នែកសុខាភិបាល វប្បធម៌ ភូមិវិទ្យា គីមីវិទ្យា រូបវិទ្យា និងពាក្យក្នុងវិទ្យាសាស្ត្រនយោបាយ និងការទូត ដែលមានជាភាសាខ្មែរ អង់គ្លេស បារាំងជាដើម។ នេះជាការបញ្ជាក់របស់លោក ហ៊ាន សុខុម ដែលបានបន្ថែមថាពាក្យទាំងនេះ គឺបង្កើតឡើងដើម្បីបំពេញតម្រូវការបច្ចុប្បន្នភាពសង្គម៕
Tag:
ក្រុមប្រឹក្សាជាតិភាសាខ្មែរ
វចនានុក្រម
សន្ទានុក្រម
© រក្សាសិទ្ធិដោយ thmeythmey.com