ជាតិ
២៥ខេត្ត/រាជធានី
កសិករ៦៦គ្រួសារនៅសៀមរាប លក់«បន្លែសុវត្ថិភាព»បាន៦តោនក្នុងមួយខែ
× សៀមរាប៖ ប្រជាកសិករ៦៦គ្រួសារ ក្នុងឃុំកៀនសង្កែ ស្រុកសូទ្រនិគម ខេត្តសៀមរាប ដាំដុះបន្លែសុវត្ថិភាព និងផ្គត់ផ្គង់ទីផ្សារក្នុងស្រុក បានជាមធ្យម២០០គីឡូក្រោមក្នុងមួយថ្ងៃ ដែលស្មើនឹងចំនួន៦តោនក្នុងមួយខែ។ ការដាំដុះបន្លែសុវត្ថិភាពរបស់កសិករទាំងនោះ ជាទម្រង់ខ្នាតតូចដោយអនុវត្តន៍តាមបច្ចេកទេស និងគោលការណ៍ស្តង់ដារសរីរាង្គរបស់អង្គការ GRET ។
លោក សុទ្ធ វិសាល មន្ត្រីទីផ្សារនៃអង្គការ GRET ប្រាប់ថ្មីៗ២៥ រាជធានី-ខេត្ត ថា ក្នុងចំណោមកសិករដាំបន្លែសុវត្ថិភាព ៣០០គ្រួសារ តាមរយៈគម្រោងអភិវឌ្ឍកសិកម្មនិរន្តភាព មានកសិករ ៦៦គ្រួសារ បានបង្កើតជាសហគមន៍ចម្ការសុវត្ថិភាពធម្មជាតិ នៅដើមខែមករា ឆ្នាំ២០១៩ ដើម្បីនាំគ្នាផលិតបន្លែសុវត្ថិភាពដែលមានស្តង់ដារទៅកាន់ទីផ្សារក្នុងខេត្ត និងនៅទីរាជធានីភ្នំពេញ។
(លោក សុទ្ធ វិសាល មន្ត្រីទីផ្សារនៃអង្គការ GRET នៅក្នុងវេទិកាអ្នកប្រើប្រាស់បន្លែសុវត្ថិភាព លើកទីពីរនាខេត្តសៀមរាប)
លោក វិសាល បានអះអាងដូច្នេះ៖«បន្លែសុវត្ថិភាពដែលដាំដោយកសិករក្នុងគម្រោងអភិវឌ្ឍកសិកម្មនិរន្តភាព មានទីផ្សារល្អដោយមិនបារម្ភចំពោះអ្នកបញ្ជាទិញជាមួយនឹងតម្លៃបន្លែទាំងនេះ។ សព្វថ្ងៃបន្លែសុវត្ថិភាពរបស់សមាគមន៍ ពុំទាន់ផ្គត់ផ្គង់គ្រប់គ្រាន់តាមតម្រូវការទីផ្សារនៅឡើយ»។ យ៉ាងណា សហគមន៍កសិករដាំបន្លែសុវត្ថិភាពទាំង៦៦គ្រួសារ ក្នុងឃុំកៀនសង្កែ ស្រុកសូទ្រនិគម ដែលបង្កើតនៅដើមឆ្នាំ២០១៩នេះ អាចផ្គត់ផ្គង់បន្លែសុវត្ថិភាពទាំងនោះនៅលើទីផ្សារបានប្រមាណជា៦តោនក្នុងមួយខែ។
បើតាមលោក សុទ្ធ វិសាល ក្រៅពីបន្លែសុវត្ថិភាពក្នុងសហគមន៍ចម្ការសុវត្ថិភាពធម្មជាតិ ក៏មានកសិករជិត៨០០គ្រួសារទៀត បានអនុវត្តន៍ដាំបន្លែសុវត្ថិភាពក្នុងគម្រោងអភិវឌ្ឍកសិកម្មនិរន្តភាព នៃអង្គការ GRET ក្នុងស្រុកប្រាសាទបាគង និងស្រុកសូទ្រនិគម អាចផ្គត់ផ្គង់បន្លែសុវត្ថិភាពលើទីផ្សារបាន ១០០តោន ក្នុងមួយខែ។ បន្លែសុវត្ថិភាពទាំងនោះ ភាគច្រើនជាបន្លែស្លឹក និងផ្លែ ដូចជា ស្ពៃ សាឡាត់ ខ្ទឹមស្លឹក ជីគីនឆាយ ប៉េងប៉ោះ ត្រប់ និងត្រសក់ជាដើម៕
© រក្សាសិទ្ធិដោយ thmeythmey.com