សៀមរាប និងកំពង់ធំស្វាគមន៍ភ្ញៀវរៀងៗខ្លួន ដើម្បីប្រជែងដណ្តើមកៅអីវគ្គ១/២

កីឡាជាតិ

ជាតិ

សៀមរាប និងកំពង់ធំស្វាគមន៍ភ្ញៀវរៀងៗខ្លួន ដើម្បីប្រជែងដណ្តើមកៅអីវគ្គ១/២

08, May 2019 , 1:53 pm

រូបភាព

ដោយ:

ក្រុមកីឡាបាល់ទាត់សៀមរាប និងកំពង់ធំត្រូវបើកទ្វារកីឡដ្ឋានស្វាគមន៍ភ្ញៀវរៀងៗខ្លួន សម្រាប់ជំនួបវគ្គ៨ក្រុមចុងក្រោយនៃពានរង្វាន់សម្តេច ហ៊ុន សែន ថ្នាក់ខេត្ត នៅរសៀលថ្ងៃទី៨ ខែឧសភា ឆ្នាំ២០១៩នេះ។ ត្បួងឃ្មុំ និងកោះកុងកំពុងរង់ចាំនៅវគ្គ១/២ បន្ទាប់ពីពួកគេបានយកឈ្នះគូប្រកួតរៀងៗខ្លួនកាលពីម្សិលមិញ។

ក្រុមកីឡាបាល់ទាត់សៀមរាបត្រូវប្រជែងជាមួយកែបដើម្បីដណ្តើមកៅអីឡើងទៅប្រកួតនៅវគ្គពាក់កណ្តាលផ្តាច់ព្រ័ត្រពានរង្វាន់សម្តេច ហ៊ុន សែន ថ្នាក់ខេត្ត។ ការប្រកួតនេះរៀបចំនៅកីឡដ្ឋានខេត្តសៀមរាបនៅវេលាម៉ោង៥រសៀល។ មុនឡើងមកជួបគ្នានៅវគ្គ៨ក្រុមចុងក្រោយនេះ សៀមរាបបានយកឈ្នះកំពង់ស្ពឺដោយបាល់កាត់សេចក្តី ៤-៣ ខណៈកែបយកឈ្នះបន្ទាយមានជ័យដោយបាល់កាត់សេចក្តីក្នុងលទ្ធផល ៤-៣ ដូចគ្នា។

នៅកីឡដ្ឋានខេត្តកំពង់ធំម៉ោង៣រសៀលនេះដែរ ម្ចាស់ផ្ទះកំពង់ធំត្រូវតទល់ជាមួយក្រុមរតនគិរី ដើម្បីប្រជែងដណ្តើមកៅអីឡើងទៅប្រកួតនៅវគ្គ១/២នេះផងដែរ។ មុនប៉ះគ្នានៅថ្ងៃនេះ កំពង់ធំបានយកឈ្នះព្រះវិហារ ២-០ ខណៈរតនគិរីយកឈ្នះតាកែវក្នុងលទ្ធផល ៣-១។

ក្រុមឈ្នះនៅថ្ងៃនេះ ត្រូវទៅជួបក្រុមត្បូងឃ្មុំ និងកោះកុង ដែលកំពុងរង់ចាំនៅវគ្គពាក់កណ្តាលផ្តាច់ព្រ័ត្រ។ សម្រាប់ការប្រកួតកាលពីថ្ងៃអង្គារ ទី៧ ខែឧសភា ក្រុមត្បូងឃ្មុំបានយកឈ្នះព្រៃវែងក្នុងលទ្ធផល ២-០ ខណៈកោះកុងយកឈ្នះកំពត ១-០៕