អត្ថបទពាណិជ្ជកម្ម
ក្រុមហ៊ុន Royal Group ចុះអនុស្សារណៈយោគយល់ជាមួយក្រសួងប្រៃសណីយ៍ និងទូរគមនាគមន៍ លើកំណែទម្រង់ប្រព័ន្ធឌីជីថល ICT នៅកម្ពុជា
×![]()
ដោយ: ថ្មីៗ
ភ្នំពេញ៖ ក្រុមហ៊ុន Royal Group នៃប្រទេសកម្ពុជា បានចុះអនុស្សារណៈយោគយល់ ជាមួយក្រសួងប្រៃសណីយ៍ និងទូរគមនាគមន៍(MPTC) ដើម្បីលើកកម្ពស់ និងគាំទ្រដល់ការដាក់ឲ្យប្រើប្រាស់ប្រព័ន្ធឌីជីថល និងបច្ចេកវិទ្យា 5G ក្នុងប្រទេសកម្ពុជា។ កម្មវិធីនេះ ត្រូវបានប្រាព្ធឡើងជាផ្លូវការ នៅទីស្នាក់ការ កណ្តាលក្រសួងប្រៃសណីយ៍និងទូរគមនាគមន៍ ក្នុងទីក្រុងភ្នំពេញ កាលពីថ្ងៃទី៦ ខែឧសភា កន្លងទៅ ក្រោមអធិបតីភាព លោក គិត ម៉េង អគ្គនាយកក្រុមហ៊ុន Royal Group, លោក ត្រាំ អ៊ីវតឹក រដ្ឋមន្ត្រីក្រសួងប្រៃសនីយ៍ និងទូរគមនាគមន៍ ដែលរួមដំណើរដោយ លោក សុខ ពុទ្ធិវុធ រដ្ឋលេខាធិការក្រសួងប្រៃសណីយ៍និងទូរគមនាគមន៍ និងជាប្រធានក្រុមប្រឹក្សាភិបាលទូរគមនាគមន៍កម្ពុជា។
កិច្ចព្រមព្រៀងលើអនុស្សារណៈយោគយល់ នឹងបង្កើនការសហការរវាងគ្នា ក៏ដូចជាការបង្កើតផែនការសម្រាប់ការដាក់ឲ្យប្រើប្រាស់លើបច្ចេកវិទ្យាជំនាន់ក្រោយទំហំធំ ដូចជាកម្មវិធីអេឡិចត្រូនិក សម្រាប់រដ្ឋាភិបាល បច្ចេកវិទ្យា (AI) បច្ចេកវិទ្យា IoT ក៏ដូចជាមជ្ឈមណ្ឌល ការបង្កើតថ្មីលើប្រព័ន្ធទូរគមនាគម (ICT Innovation) និងមជ្ឈមណ្ឌលផ្ទុកទិន្នន័យ។
អនុស្សារណៈយោគយល់មួយនេះ ក៏នឹងជួយពង្រឹងសុវត្ថិភាពផ្សេងៗ ទាក់ទងនឹងបច្ចេកវិទ្យា ដែលអាចនឹងកើតមានឡើងនាពេលអនាគត ដូចជាការទាញយកឯកសារដែលបាត់បង់ អត្តសញ្ញាណ និងគេហទំព័រ លើប្រព័ន្ធឌីជីថល និងសុវត្ថិភាពអ៊ីម៉ែលរបស់រដ្ឋាភិបាល។
លោក គិត ម៉េង បានមានប្រសាសន៍ថានៅក្នុងពិធីចុះហត្ថលេខានោះថា ក្រុមហ៊ុនលោក នឹងបង្កើតគណៈកម្មាធិកាមួយ សម្រាប់រៀបចំដឹកនាំធ្វើកិច្ចការងារលើប្រព័ន្ធឌីជីថលនេះ ដែលមានសមាសភាព មកពីក្រុមហ៊ុន Royal Group និងក្រសួងប្រៃសនីយ៍ និងទូរគមនាគមន៍ ដើម្បីជំរុញរបៀបវារៈឌីជីថល តាមរយៈការធ្វើសិក្ខាសាលាជាផ្លូវការ ជាបន្តបន្ទាប់»។
លោក គិត ម៉េង បញ្ជាក់ទៀតថា៖«យោងតាមទិសដៅលើប្រព័ន្ធ ICT ក្រុមហ៊ុន Royal Group នឹងធ្វើការជាមួយក្រសួងប្រៃសនីយ៍ និងទូរគមនាគមន៍ ដើម្បីដំណើរការលើបច្ចេកវិទ្យា5G នៅក្នុងប្រទេសកម្ពុជា។ ពួកយើងមានគម្រោងជាច្រើន ដែលកំពុងដំណើរការ ហើយយើងជឿជាក់ថា យើងនឹងអាចក្លាយទៅជាអ្នកតំណាងដ៏ខ្លាំងក្លាមួយ សម្រាប់ប្រទេសកម្ពុជា។ ជាក់ស្តែងដូចជាក្នុងវេទិកា«ខ្សែក្រវ៉ាត់ និងផ្លូវ» និងវេទិកា«ផ្លូវសូត្រឌីជីថល»។
បើតាមលោក គិត ម៉េង ក្រុមហ៊ុន Royal Group បានដាក់ដំណើរការបច្ចេកវិទ្យា 5G របស់ខ្លួន ជាលើកដំបូង នៅក្នុងខែកញ្ញា ឆ្នាំ២០១៨ និងកំពុងចាប់ផ្តើមដាក់សម្ពោធសេវាកម្មបច្ចេកវិទ្យា 5G សម្រាប់សាធារណជនទូទៅ នៅចុងឆ្នាំនេះ។ លោកបន្ថែមទៀតថា៖«យើងនឹងធានាថា ប្រទេសកម្ពុជានឹងក្លាយជាឧទាហរណ៍ដ៏រឹងមាំមួយ នៅក្នុងតំបន់លើការវិវត្តបច្ចេកវិទ្យា ដែលស្របតាមការរីកចម្រើនយ៉ាងឆាប់រហ័ស និងកំណើននៃវិស័យពាណិជ្ជកម្ម និងសេដ្ឋកិច្ច»៕
(អត្ថបទពាណិជ្ជកម្ម)
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
