អន្តរជាតិ
លទ្ធផលផ្លូវការ៖ ក្ដីសង្ឃឹមបក្សភឿថៃកាន់តែខ្សត់ ឯលោក ប្រាយុទ្ធ សង្ឃឹមកាន់តែខ្ពស់ មេដឹកនាំបក្សភឿថៃលោកស្រី Sudarat Keyuraphan និងមេបក្សអនាគតឈានមុខលោក Thanathorn Juangroongruangkit ។ រូបភាព AFP
× នៅថ្ងៃទី៧ និងទី៨ ខែឧសភា គណៈកម្មការរៀបចំការបោះឆ្នោតថៃ បានប្រកាសលទ្ធផលផ្លូវការជាបន្តបន្ទាប់សម្រាប់ការបោះឆ្នោតថ្ងៃទី២៤ ខែមីនា។ តាមលទ្ធផលនេះ សម្ព័ន្ធភាពគាំទ្រប្រជាធិបតេយ្យដឹកនាំដោយបក្សភឿថៃ បែរជាធ្លាក់ចំនួនកៅអីសភារបស់ខ្លួន ខុសពីការគន់គូរតាមលទ្ធផលមិនផ្លូវការ ខណៈបក្សកម្លាំងប្រជារាស្ត្រដែលគាំទ្រលោក ប្រាយុទ្ធ ចន្ទអូចា កើនកៅអីសភា និងកំពុងប្រមូលបក្សនានាដើម្បីត្រៀមបង្កើតរដ្ឋាភិបាល។
ក្ដីសង្ឃឹមរបស់សម្ព័ន្ធភាពចម្រុះដឹកនាំដោយបក្សភឿថៃដើម្បីបង្កើតរដ្ឋាភិបាលថ្មី ហាក់រសាត់អណ្តែតទៅឆ្ងាយហើយ ក្រោយការប្រកាសលទ្ធផលផ្លូវការសម្រាប់ការបោះឆ្នោតថ្ងៃទី២៤ ខែមីនាដោយគណៈកម្មការរៀបចំការបោះឆ្នោតថៃ។ នៅថ្ងៃទី៧ ខែឧសភា គណៈកម្មការនេះ បានប្រកាសបញ្ជីឈ្មោះបេក្ខជនជាប់ឆ្នោតតាមមណ្ឌលចំនួន៣៤៩ រូប ហើយនៅថ្ងៃទី៨ ខែឧសភា បានប្រកាសពីបេក្ខជនតាមបញ្ជីឈ្មោះបក្ស១៤៩ រូប ខណៈចំនួនសមាជិកសភាទាំងអស់មានចំនួន៥០០ ។
បើតាមលទ្ធផលផ្លូវការ សម្ព័ន្ធភាពចម្រុះរបស់បក្សភឿថៃ ទទួលបានកៅអីសភាចំនួន២៤៥ ទាបជាងការប្រកាសរបស់ពួកគេកាលពីការបោះឆ្នោតភ្លាមៗដែលរំពឹងទទួលបានចំនួន២៥៥ កៅអី។ កៅអី២៤៥ នេះ មិនគ្រប់គ្រាន់ដើម្បីស្នើបេក្ខភាពនាយករដ្ឋមន្ត្រី និងការបង្កើតរដ្ឋាភិបាលឡើយ ដ្បិតនៅអាណត្តិនេះ ការបោះឆ្នោតជ្រើសរើសនាយករដ្ឋមន្ត្រីក៏មានគិតបញ្ចូលសមាជិកព្រឹទ្ធសភា២៥០ដែលតែងតាំងដោយយោធា។
៣៧៦ ជាចំនួនកៅអីចាំបាច់បំផុតសម្រាប់បក្សភឿថៃ បើចង់ដឹកនាំរដ្ឋាភិបាល ខណៈបក្សនេះតែឯងឈ្នះកៅអីសភាតែ១៣៦ ប៉ុណ្ណោះ។ តាមស្ថានភាពបច្ចុប្បន្ន បក្សនេះ ត្រូវរកបក្សផ្សេងទៀតដើម្បីបង្កើនចំនួនកៅអីក្នុងសម្ព័ន្ធភាពរបស់ខ្លួន។ ខណៈភឿថៃ ត្រូវធ្វើការធ្ងន់នោះ បក្សកម្លាំងប្រជារាស្ត្រដែលគាំទ្រលោក ប្រាយុទ្ធ ចន្ទអូចា ធ្វើជានាយករដ្ឋមន្ត្រីថ្មី នឹងមិនចាំបាច់ប្រឹងខ្លាំងឡើយ ព្រោះមានសមាជិកព្រឹទ្ធសភា២៥០ក្នុងដៃស្រាប់ទៅហើយ។
លទ្ធផលបោះឆ្នោតផ្លូវការបង្ហាញថា បក្សកម្លាំងប្រជារាស្ត្រទទួលបានកៅអីចំនួន១១៥ ហើយបូកសមាជិកព្រឹទ្ធសភា២៥០ទៀត មានកៅអីចំនួនសរុប៣៦៥ទៅហើយ គឺនៅខ្វះតែ១១ទៀត នឹងមានសំឡេងល្មមដើម្បីឲ្យលោក ប្រាយុទ្ធ អង្គុយកៅអីនាយករដ្ឋមន្ត្រីទៀត។ វាមិនមែនជារឿងលំបាកឡើយសម្រាប់បក្សកម្លាំងប្រជារាស្ត្រក្នុងការស្វែងរកការគាំទ្រពីបក្សផ្សេង ដ្បិតរូបមន្តចែកកៅអីសភា ធ្វើឲ្យបក្សជាង២០ទទួលកៅអីសភា។
ដូចរាប់រៀបពីខាងដើម កៅអីរដ្ឋសភាថៃទាំងអស់មានចំនួន៥០០ ។ កៅអី៣៥០ បែងចែកដោយផ្ទាល់តាមរយៈការបោះឆ្នោតតាមមណ្ឌល និង១៥០កៅអីទៀត ចែកតាមបញ្ជីឈ្មោះបក្ស ដែលនេះទើបជារឿងចម្រូងចម្រាស។ ក្បួនចែកកៅអី១៥០នេះហើយ ដែលធ្វើឲ្យកៅអីបក្សនយោបាយក្នុងសម្ព័ន្ធភាពចម្រុះរបស់បក្សភឿថៃធ្លាក់ចុះយ៉ាងនឹង។
តាមពិតទៅ ដើម្បីទទួលបានកៅអីសភាមួយ បក្សនយោបាយត្រូវមានសំឡេងគាំទ្រយ៉ាងហោចណាស់៧១០០០ សំឡេង។ ប៉ុន្តែរូបមន្តបែងចែករបស់គណៈកម្មការរៀបចំការបោះឆ្នោតដែលត្រូវបានតុលាការធម្មនុញ្ញប្រកាសថា ស្របតាមរដ្ឋធម្មនុញ្ញនោះ បែរជាផ្ដល់កៅអីឲ្យបក្សដែលទទួលសំឡេងបានជាងចំនួនខាងលើទៅវិញ។ ដោយសារហេតុនេះ បក្សតូចៗជាច្រើនដែលគេជឿថា គាំទ្រលោក ប្រាយុទ្ធ ក៏បានទទួលបានកៅអីមួយម្នាក់ដែរ៕
Tag:
ថៃ
បក្សភឿថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com