អន្តរជាតិ
ថៃ ខាតបង់លុយ៧៨០លានដុល្លារ ដោយសារឥទ្ធិពលសង្គ្រាមពាណិជ្ជកម្ម កំពង់ផែ Hutchison Ports Thailand (ប្រភពរូប៖ វេបសាយ httphutchisonports.co.th )
× សង្គ្រាមពាណិជ្ជកម្មរវាងយក្សសេដ្ឋកិច្ចអាមេរិក និងចិន ដែលបានផ្ទុះឡើងកាលពីដើមពាក់កណ្ដាលឆ្នាំ២០១៨ បានជះឥទ្ធិពលដល់ការនាំចេញរបស់ថៃ។ យោងតាមការបញ្ជាក់ឲ្យដឹងពីមន្ត្រីជាន់ខ្ពស់នៃក្រសួងពាណិជ្ជកម្មថៃ ប្រទេសក្នុងអង្គការតំបន់អាស៊ានមួយនេះ ត្រូវបានប៉ាន់ស្មានថា បាត់បង់ចំណូលនៃការនាំចេញប្រមាណ ៧៨០លានដុល្លារ។
នៅថ្ងៃទី៩ ខែឧសភា រដ្ឋមន្ត្រីស្តីទីនៃក្រសួងពាណិជ្ជកម្មថៃ លោកស្រី Chutima Bunyapraphasara បញ្ជាក់ឲ្យដឹងថា ការសិក្សាមួយ រកឃើញថា ការនាំចេញរបស់ថៃ គិតត្រឹមថ្ងៃទី៣១ ខែមីនា ថយចុះ ០,៣ភាគរយ ដែលស្មើនឹង ៧៨០លានដុល្លារ ព្រោះតែឥទ្ធិពលជម្លោះពាណិជ្ជកម្ម។
បើតាមការចុះផ្សាយរបស់កាសែតបាងកកប៉ុស្តិ៍ ការសិក្សារបស់ក្រសួងពាណិជ្ជកម្មដដែល បង្ហាញថា ការនាំចេញទៅកាន់សហរដ្ឋអាមេរិក ធ្លាក់ចុះមកត្រឹម ៣១៦,៥លានដុល្លារ។ មូលហេតុគឺបណ្តាលមកពីការយកថ្លៃសេវាគមនាគមន៍លើផ្ទាំងសូឡា ម៉ាស៊ីនបោកសំលៀកបំពាក់ ដែកថែប និងអាលុយមីញ៉ូមជាដើម។ ចំណែក គ្រឿងបន្លាស់យានយន្ត ផលិតផលការិយាល័យនិងលំនៅឋាន គ្រឿងអេឡិចត្រូនិក និងម៉ាស៊ីន ដែលបាននាំចេញទៅកាន់ប្រទេសចិន ធ្លាក់ចុះមកត្រឹម ១,១ពាន់លានដុល្លារ។
ទាក់ទិននឹងការខាតបង់នេះ លោកស្រី Chutima លើកឡើងថា ក្រសួង កំពុងរៀបចំកិច្ចប្រជុំជាមួយប្រធានមជ្ឈមណ្ឌលពាណិជ្ជគម្មថៃនៅទូទាំងពិភពលោក នាបំណាច់ខែឧសភានេះ ក្នុងគោលដៅវាយតម្លៃលើស្ថានការណ៍ពាណិជ្ជកម្មអន្តរជាតិ និងពិភាក្សាលើគម្រោងផ្តល់សន្ទុះលើការនាំចេញខ្លួនឡើងវិញ។
មន្ត្រីជាន់ខ្ពស់នៃក្រសួងពាណិជ្ជកម្មថៃរូប បញ្ជាក់ទៀតថា ក្រសួងក៏កំពុងស្វះស្វែងរកទីផ្សារនាំចេញដែលមានសក្តានុពលផ្សេងទៀត រួមមាន ឥណ្ឌា និងមជ្ឈិមបូព៌ាជាដើម។ ត្រង់ចំណុចនេះ លោកស្រី និយាយបែបនេះ៖«ថៃ នឹងខិតខំប្រឹងប្រែងធ្វើពិពិធកម្មទីផ្សារនាំចេញ អំឡុងស្ថានភាពថមថយកម្លាំងនៃកំណើនសេដ្ឋកិច្ចសកលនេះ»។
ទន្ទឹមនឹងគ្នានេះដែរ ថៃ កំពុងតាមដានយ៉ាងល្អិតល្អន់លើកិច្ចពិភាក្សាពាណិជ្ជកម្មរវាងចិន និងសហរដ្ឋអាមេរិក ក្រោយពីរដ្ឋបាលលោកប្រធានាធិបតី ដូ ណាល់ ត្រាំ កាលពីថ្មីៗនេះ ព្រមានដំឡើងពន្ធពី១០ភាគរយ ទៅ ២៥ភាគរយ លើផលិតផលដែលនាំចូលពីចិនក្នុងទំហំទឹកប្រាក់ ២០០ ពាន់លានដុល្លារ។ នេះបើតាមការបញ្ជាក់របសលោកស្រី Chutima ដោយបន្ថែមថា ប្រសិនបើអាមេរិកដំឡើងពន្ធនាំចូល២៥ភាគរយមែននោះ ទីផ្សារមូលធុនសកល តម្លៃមាស និងប្រេង នឹងរងផលប៉ះពាល់យ៉ាងធំធេង ក្នុងនោះ វឌ្ឍនភាពសេដ្ឋកិច្ចរបស់ថៃ ក៏រងផលប៉ះពាល់ផងដែរ៕
Tag:
ថៃ
សេដ្ឋកិច្ចអន្តរជាតិ
សង្គ្រាមពាណិជ្ជកម្ម
© រក្សាសិទ្ធិដោយ thmeythmey.com