ភ្នំពេញ៖ នៅថ្ងៃទី៩ខែឧសភានេះ ក្រសួងកសិកម្ម រុក្ខាប្រមាញ់ និងនេសាទ បានរៀបចំពិធីសម្ពោធការនាំចេញផ្លែចេកលើកដំបូងទៅកាន់ប្រទេសចិន។ ដើម្បីជានិមិត្តរូបនៃការនាំចេញជាលើកដំបូងទៅប្រទេសចិន ចេកអំបូងលឿង៥កុងតេន័រប្រមាណ១០០តោន ត្រូវនាំទៅកាន់ទីផ្សារមួយនេះនៅថ្ងៃនេះ មុននឹងមានការនាំចេញជាបន្តបន្ទាប់ ដែលត្រូវបានរំពឹងថានឹងដល់ទំហំ ១៣ម៉ឺនតោនត្រឹមដំណាច់ឆ្នាំ២០១៩នេះ។
កន្លងមកកម្ពុជានាំចេញចេកអំបូងលឿងទៅកាន់ប្រទេសវៀតណាម ដែលប្រទេសនេះជាអ្នកនាំចេញបន្ត។ នៅខែសីហាឆ្នាំ២០១៨ ភាគីចិនបានយល់ព្រមឲ្យកម្ពុជានាំចេញផ្លែចេកទៅទីផ្សាររបស់ខ្លួនដោយផ្ទាល់។ កិច្ចព្រមព្រៀងនោះមិនបានកំណត់ចេកប្រភេទណានោះទេ តែមន្ត្រីកសិកម្មរបស់កម្ពុជាអះអាងថាមានតែចេកអំបូងលឿងនោះទេ ដែលមានលក្ខណៈគ្រប់គ្រាន់សម្រាប់ការនាំចេញនេះ។ ហើយនៅថ្ងៃនេះ ការនាំចេញចេកអំបូងលឿងដោយផ្ទាល់ទៅប្រទេសចិន បានចាប់ផ្ដើម។
អ្នកវិនិយោគជាបន្តបន្ទាប់បានបណ្ដាក់ទុនសម្រាប់ដាំចេកអំបូងលឿងនៅបណ្ដាខេត្តមួយចំនួន ដោយសម្លឹងឱកាសនាំចេញទៅចិន។ សព្វថ្ងៃនេះ ក្រុមហ៊ុនចំនួន៥ ប៉ុណ្ណោះ ក្នុងចំណោមក្រុមហ៊ុនដាក់ពាក្យសុំចំនួន១០ ដែលទទួលការអនុញ្ញាតពីភាគីចិន ដើម្បីនាំចេញចេកប្រភេទនេះទៅចិន។
មុនឈានដល់នាំទៅផ្ទាល់ចូលទីផ្សារចិន កម្ពុជាបានចេកអំបូងលឿងរាប់ម៉ឺនតោន ពិសេសទៅប្រទេសវៀតណាម ក្នុងមួយឆ្នាំៗ។ គ្រាន់តែក្នុងរយៈពេល៤ខែដើមឆ្នាំ២០១៩នេះ កម្ពុជាបាននាំចេកអំបូងលឿង ៣,៨ម៉ឺនតោនទៅក្រៅប្រទេស។ ហើយការនាំចេញទៅប្រទេសចិន ត្រឹមដំណាច់ឆ្នាំនេះ ត្រូវបានរំពឹងថានឹងដល់ចំនួន ១៣ម៉ឺនតោនឯណោះ។ នេះបើតាមលោក វេង សាខុន រដ្ឋមន្ត្រីក្រសួងកសិកម្ម ដែលបានថ្លែងក្នុងពិធីខាងយ៉ាងដូច្នេះថា៖«ក្នុងរយៈពេល៤ដើមឆ្នាំនេះ ការនាំចេញចេកអំបូងលឿងពីកម្ពុជាមានចំនួន ៣,៨ម៉ឺនតោនរួចទៅហើយ។ យើងសង្ឃឹមត្រឹមដំណាច់ឆ្នាំ២០១៩នេះ កម្ពុជានាំចេញចេកអំបូងលឿងទៅប្រទេសចិនមិនតិចជាង ១៣ម៉ឺនតោននោះទេ»។
លោក វេង សាខុន បានមើលឃើញសក្ដានុពលខ្ពស់នៃកសិកម្មផ្នែកដំណាំចេកអំបូងលឿងនេះនៅកម្ពុជាទៅថ្ងៃមុខ។ លោកលើកឡើងដូចនេះថា៖«តាមការព្យាកររបស់អគ្គនាយកដ្ឋានកសិកម្ម នៅឆ្នាំ២០៣០ កម្ពុជានឹងអាចផលិតចេកអំបូងលឿងបានប្រមាណ ១លានតោន។ ដូច្នេះ កម្ពុជានៅសល់សក្ដានុពលច្រើនណាស់ ដែលទាមទារការវិនិយោគបន្ថែមទៀត រួមផ្សំនឹងពាណិជ្ជករទាំងអស់ដែលមកពីប្រទេសចិនក្នុងការបញ្ជាទិញផលិតផលកសិកម្មពីកម្ពុជា»។
បើតាមលោក ងិន ឆាយ អគ្គនាយកនៃអគ្គនាយកដ្ឋានកសិកម្ម សព្វថ្ងៃ កម្ពុជាមានដំណាំចេកអំបូងលឿងជិត ១ម៉ឺនហិកតា។ ភាគច្រើនមានចេកប្រភេទនេះមានដាំនៅខេត្តរតនគិរី ក្រចេះ កំពត និងខេត្តកំពង់ចាម។
គួរបញ្ជាក់ថា ក្រុមហ៊ុនចំនួន៥ ដែលទទួលបានការអនុញ្ញាតនាំចេញពីអគ្គរដ្ឋបាលគយរបស់រដ្ឋាភិបាលចិន រួមមាន ក្រុមហ៊ុន Longmate Agriculture, Long Sreng Hua Jian Agriculture Development, Green Island Agriculture Development, Sovann Reachsey and ក្រុមហ៊ុន Grand Land Agriculture Development ៕