ជាតិ
សិល្បះ
លោក ប៉ាន់ រិទ្ធី ជាប្រធានមេប្រយោគពាន Camera d’Or នៃមហោស្រពភាពយន្តអន្តរជាតិក្រុងកាន
លោក ប៉ាន់ រិទ្ធី បានបង្កើតស្នាដៃភាពយន្តជាច្រើនស្តីពីរបបខ្មែរក្រហម ហើយលោកក៏មានចំណែកយ៉ាងសំខាន់ក្នុងរឿង មុនដំបូងគេសម្លាប់ឪពុកខ្ញុំរបស់ Angelina Jolie ផងដែរ។រូបថត AFP
×![]()
ដោយ: រួបរួម
លោក ប៉ាន់ រិទ្ធី សមិទ្ធករភាពយន្តខ្មែរ-បារាំង និងជាស្ថាបនិកមួយរូប នៃមជ្ឈមណ្ឌលបុប្ផាណា ត្រូវបានជ្រើសរើសជាប្រធានគណៈមេប្រយោគ សម្រាប់ពានរង្វាន់ «កាមេរ៉ាមាស» (Caméra d’Or) នៃមហោស្រពភាពយន្តអន្តរជាតិទីក្រុងកាន (Festival de Cannes) លើកទី៧២ ពីថ្ងៃទី១៤ ដល់ថ្ងៃទី២៥ខែឧសភា ឆ្នាំ ២០១៩ នេះ។ 
«Camera d’Or» ជាពានរង្វាន់ប្រកបដោយកិត្យានុភាពមួយ ក្នុងមហោស្រពក្រុងកាន សម្រាប់ខ្សែភាពយន្តខ្សែភាពយន្តខ្នាតវែង (Best Feature Film) ដែលត្រូវបានបង្កើតឡើងជាលើកដំបូងនៅឆ្នាំ១៩៧៨។ ពានរង្វាន់នេះ នឹងត្រូវផ្តល់ជូននាអំឡុងនៃពិធីបិទមហោស្រព។
សម្រាប់តួនាទី ជាប្រធានគណៈមេប្រយោគសម្រាប់ពានរង្វាន់ «កាមេរ៉ាមាស» នេះ លោក ប៉ាន់ រិទ្ធី មានសមាជិកដែលជាអ្នកជំនាញខាងភាពយន្តជនជាតិបារាំង៤រូបទៀត ដែលក្នុងនោះមាន Alice Diop, Sandrine Marques, Benoit Belhomme និង Nicolas Naegelen។
ភាពយន្តរឿង «Girl» របស់សមិទ្ធករបែលហ្ស៊ិក Lukas Dhont កាន់កាប់ពានរង្វាន់ «កាមេរ៉ាមាស» កាលពីឆ្នាំ២០១៨។ សម្រាប់តំបន់អាស៊ីអាគេ្នយ៍ រឿង «IIo IIo» របស់សមិទ្ធករសិង្ហបុរី Anthony Chen ធ្លាប់បានឈ្នះកាលពីឆ្នាំ២០១៣។
កើតនៅរាជធានីភ្នំពេញ ហើយបន្តទៅរស់នៅក្រុងប៉ារីស ប្រទេសបារាំង ក្រោយសម័យខ្មែរក្រហម លោក ប៉ាន់ រិទ្ធី បានបង្កើតស្នាដៃភាពយន្តជាច្រើន ទាក់ទងនឹងសម័យកាលងងឹតនៃរបបកម្ពុជាប្រជាធិតេយ្យ។ រឿង «អ្នកស្រែ» បានក្លាយជាស្នាដៃភាពយន្តខ្មែរទីមួយ ដែលសមិទ្ធកររូបនេះ យកទៅប្រកួតប្រជែងក្នុងមហោស្រពភាពយន្តអន្តរជាតិទីក្រុងកាន កាលពីឆ្នាំ១៩៩៤។
ស្នាដៃជាបន្តបន្ទាប់របស់លោក រិទ្ធី សម្រាប់ការប្រកួតប្រជែងពានរង្វាន់លំដាប់ពិភពលោក Festival de Cannes នោះ មានដូចជា មន្ទីរ ស ២១ ម៉ាស៊ីនពិឃាដខ្មែរក្រហម (ឆ្នាំ២០០៣), មហោស្រពដែលឆេះ (ឆ្នាំ២០០៥)។ ស្នាដៃដ៏គួរឲ្យកត់សម្គាល់ផ្សេងទៀតរបស់សមិទ្ធករវ័យ៥៥ឆ្នាំរូបនេះមាន ជំរំជនភៀសខ្លួនសាយធូ (១៩៨៩), ប្រទេសកម្ពុជានៅចន្លោះសង្គ្រាម និងសន្តិភាព (១៩៩២), បុប្ផាណា រឿងសោកនាដកម្មនៃស្ត្រីខ្មែរម្នាក់ (១៩៩៦), រាត្រីមួយក្រោយសង្គ្រាម (១៩៩៧), វ៉ាន់ ចាន់ ឬនៅឆ្នាំ ២០០០ នេះ ខ្ញុំមានអាយុ ៥០ ឆ្នាំ (១៩៩៨), ដែនដីនៃព្រលឹងវិលវល់ (១៩៩៩), អ្នកអង្គរ (២០០៣), ក្រដាសមិនអាចខ្ចប់ភ្លើងបានទេ (២០០៦), ឌុច គ្រូលត់ដំនៅឋាននរក (២០១២), ផ្នូរដែលគ្មានឈ្មោះ (ឆ្នាំ២០១៨) ជាដើម។
អ្វីដែលគួរឲ្យកត់សម្គាល់នោះ ស្នាដៃរឿងដែលមានចំណងជើងថា «កង្វះរូបភាព» (The Missing Picture) បានជាប់ក្នុងជម្រើសចុងក្រោយ នៃការប្រកួតដណ្ដើមយកពានរង្វាន់អូស្ការ កាលពីឆ្នាំ ២០១៣។ ស្ថាបនិកមជ្ឈមណ្ឌលបុប្ផាណា រូបនេះ ក៏បានចូលរួមផលិតជាមួយតារាភាពយន្តហូលីវូដ លោកស្រី Angelina Jolie សម្រាប់ខ្សែភាពយន្ត «មុនដំបូង គេសម្លាប់ឪពុកខ្ញុំ» ផងដែរ។
ក្នុងបទសម្ភាស ដែលស្រង់ដោយគេហទំព័រផ្លូវការរបស់មហោស្រពក្រុងកាន លោក ប៉ាន់ រិទ្ធី បានបង្ហាញពីអារម្មណ៍រំភើបប្រកបដោយមោទកភាព ដោយលោកទទួលបានតួនាទីដ៏ធំ ក្នុងកម្មវិធីប្រកួតប្រជែងភាពយន្តលំដាប់ពិភពលោក ដែលមានកំណើតតាំងពីឆ្នាំ១៩៤៦មក៕
Tag:
ប៉ាន់ រិទ្ធី
មហោស្រពភាពអន្តរជាតិ
© រក្សាសិទ្ធិដោយ thmeythmey.com
