កីឡាអន្តរជាតិ
អន្តរជាតិ
អង់គ្លេសទៀត! Arsenal និង Chelsea ឡើងទៅជួបគ្នានៅវគ្គផ្តាច់ព្រ័ត្រ Europa League Aubameyang រកបាន៣គ្រាប់ឲ្យ Arsenal រីឯ Kepa របស់ Chelsea សង្គ្រោះបាល់ប៉េណាល់យ៉ាងល្អក្នងការប្រកួតរៀងៗខ្លួន
× បន្ទាប់ពី Liverpool និង Tottenham Hotspur ត្រៀមជួបគ្នាដណ្តើមពានក្របខណ្ឌកំពូលអឺរ៉ុប Champions League អង់គ្លេសពីរក្រុមទៀត គឺ Arsenal និង Chelsea ក៏បានកៅអីទៅវគ្គផ្តាច់ព្រ័ត្រសម្រាប់ពាន Europa League ដែលជាពានលំដាប់ទីពីររបស់អឺរ៉ុបផងដែរ។ Arsenal ឈ្នះ Valencia ៤-២ បន្ថែម ដោយសរុបទាំងពីរជើង ៧-៣ ខណៈ Chelsea ឈ្នះដោយការទាត់បាល់ប៉េណាល់កំណត់ឈ្នះចាញ់ បន្ទាប់ពីលទ្ធផលស្មើ ១-១ បានអូសបន្លាយដល់១២០នាទី។
Pierre-Emerick Aubameyang រកបាន៣គ្រាប់ និង Alexandre Lacazette ជួយបាន១គ្រាប់ ក្នុងជ័យជម្នះ ៤-២ របស់ Arsenal នៅទឹកដី Valencia។ ពីរគ្រាប់របស់ម្ចាស់ផ្ទះសម្រេចបានដោយ Kevin Gameiro ទាំងពីរគ្រាប់។
ជ័យជម្នះបន្ថែមទៀតនេះ នាំកាំភ្លើងធំ ឈានទៅវគ្គផ្តាច់ព្រ័ត្រ Europa League ជាលើកដំបូងក្នុងលទ្ធផលសរុបទាំងពីរជើង ៧-៣។ នេះជាឱកាសរបស់គ្រូបង្វឹក Arsenal លោក Unai Emery ផងដែរសម្រាប់ឱកាសឈ្នះពាន Europa League ជាលើកទីបួន ក្រោយលោករកបាន៣ពេលដឹកនាំ Sevilla។
នៅ Stamford Bridge ក្រុម Chelsea និង Eintracht Frankfurt បានបញ្ចប់ក្នុងលទ្ធផលស្មើ ១-១ ក្នុងម៉ោងធម្មតា ដែលឈានដល់ការបន្ថែមម៉ោង ដោយសារកាលពីជើងទីមួយ ក៏មានលទ្ធផលបែបនេះផងដែរ។
Ruben Loftus-Cheek រកបានគ្រាប់នាំមុខឲ្យ Chelsea នៅនាទី២៨ ប៉ុន្តែដើមតង់ទីពីរ Luka Jovic តាមស្មើវិញសម្រាប់ Frankfurt។ ឈានដល់ការបន្ថែម១៥នាទីពីរដងក៏គ្មានការស៊ុតបាល់បញ្ចូលទីនោះដែរ។ Chelsea ទទួលបានកៅអីទៅវគ្គផ្តាច់ព្រ័ត្រ ដោយសារឈ្នះការទាត់បាល់ប៉េណាល់សម្រេចឈ្នះ-ចាញ់ តាមរយៈលទ្ធផល ៤-៣។
វគ្គផ្តាច់ព្រ័ត្រនឹងប្រព្រឹត្តទៅនៅកីឡដ្ឋាន Olympic Stadium ក្រុងបាគូ ប្រទេសអាស៊ែបៃហ្សង់ នាថ្ងៃទី២៩ ខែឧសភា៕
© រក្សាសិទ្ធិដោយ thmeythmey.com