ONE Championship
កីឡាជាតិ
ជាតិ
សុខ ធី មិនញញើតនោះទេ ទោះ Rodtang ធ្លាប់ផ្តួលគូប្រកួតច្រើនលើកក៏ដោយ សុខ ធី ប៉ះជើងខ្លាំងថៃ Rotang នៅសង្វៀន ONE Championship ក្រុងបាងកក ល្ងាចនេះ។ រូបថត ONE FC
× អ្នកលេងគុនខ្មែរ សុខ ធី ត្រូវតតាំងជាមួយជើងខ្លាំងថៃ Rodtang Jitmuangnon ក្នុងព្រឹត្តិការណ៍ ONE Warriors of Light នៅថ្ងៃទី១០ ខែឧសភា ឆ្នាំ២០១៩នេះ នាទីក្រុងបាងកកប្រទេសថៃ។ សុខ ធី បានសិក្សាពីចំណុចខ្លាំង និងខ្សោយរបស់គូប្រកួតរួចហើយ។ ទោះបី Rodtang ជាកីឡាករជើងខ្លាំងមិនទាន់ចាញ់លើសង្វៀននេះក៏ដោយ តែកីឡាករមកពីខេត្តបន្ទាយមានជ័យរូបនេះ ហាក់មិនញញើតនឹងបទពិសោធនេះឡើយ។
កីឡាករ សុខ ធី បានសិក្សាពីចំណុចខ្លាំងនិងខ្សោយរបស់កីឡាករជើងខ្លាំងថៃ Rodtang Jitmuangnon តាមរយៈវីដេអូប្រកួតកន្លងមករួចហើយ មុនប៉ះគ្នានៅថ្ងៃនេះ។ កីឡាកររហស្សនាម កាកា រូបនេះមើលឃើញពីចំណុចខ្លាំងរបស់ Rodtang ជាកីឡាករមានកម្លាំងខ្លាំង រហ័សរហួន និងវាយសម្រុក។ ទន្ទឹមនឹងនេះ រូបគេក៏បានមើលឃើញពីចំណុចខ្សោយរបស់កីឡាកររូបនេះផងដែរ គឺរូបគេវាយបើកមុខ មិនសូវចេះតាំងឃុំមុខនោះទេ។ កាកា ចាត់ទុកចំណុចនេះ គឺជាឱកាសសម្រាប់គេក្នុងការប្រើកណ្តាប់ដៃវាយបកទៅកីឡាករថៃរូបនេះ។
សម្រាប់ សុខ ធី ទោះបីគូប្រកួតរបស់ខ្លួនជាកីឡាករជួរមុខរបស់ថៃ និងធ្លាប់ផ្តួលគូប្រកួតឲ្យសន្លប់និងបោះបង់ការប្រកួតជាញឹកញាប់ក្នុងព្រឹត្តិការណ៍នេះក៏ដោយ តែរូបគេអះអាងថា គ្មានអ្វីដែលរូបគេត្រូវកោតខ្លាចនោះទេ។ លើលពីនេះរូបគេប្តេជ្ញាថា នឹងព្យាយាមវាបបក និងប្តូរកណ្តាប់ដៃជាមួយកីឡាករថៃរូបនេះផងដែរ។
«ខ្ញុំនឹងព្យាយាមវាយមួយៗ ហើយដកថយ ព្រោះ Rotang ជាកីឡាករវាយសម្រុក។ ទោះបីខ្ញុំដកថយ តែខ្ញុំនឹងព្យាយាមប្តូរម៉ាត់ជាមួយ Rodtang។ ចំណុចខ្សោយរបស់កីឡាករថៃរូបនេះ គឺគាត់វាយបើកមុខ មិនសូវបិតមុខនោះទេ។ ទោះបីគេតែងតែផ្តួលគូឲ្យសន្លប់ក៏ដោយ ខ្ញុំមិនញញើតនោះទេ គឺធម្មតាៗ។ តែខ្ញុំទទួលស្គាល់ថា រូបគេមានបច្ចេកទេសល្អជាងខ្ញុំ»។ កាកា បានបញ្ជាក់បែបនេះក្នុងបទសម្ភាសជាមួយសារព័ត៌មានថ្មីៗកាលពីពេលកន្លងទៅ។
កាកា ដែលដាក់ក្តីរំពឹង៥០ភាគរយត្រូវតតាំងជាមួយជើងខ្លាំងថៃ Rodtang Jitmuangnon ក្នុងព្រឹត្តិការណ៍ ONE Warriors of Light នៅល្ងាចថ្ងៃទី១០ ខែឧសភា ឆ្នាំ២០១៩នេះ នាទីក្រុងបាងកកប្រទេសថៃ។ នេះជាការបង្ហាញខ្លួនលើកទី៣សម្រាប់អ្នកលេងគុនខ្មែរមកពីខេត្តបន្ទាយមានជ័យរូបនេះ ខណៈលើកកន្លងមករូបគេពិន្ទុកីឡាករថៃ Lerdsila ទាំងពីរលើក៕
Tag:
សុខ ធី
ONE Championship
ប្រដាល់គុនខ្មែរ
© រក្សាសិទ្ធិដោយ thmeythmey.com