រុស្ស៊ី ថ្កោលទោសអាមេរិកដែលដាក់ទណ្ឌកម្មថ្មីទៀតលើអ៊ីរ៉ង់

អន្តរជាតិ

រុស្ស៊ី ថ្កោលទោសអាមេរិកដែលដាក់ទណ្ឌកម្មថ្មីទៀតលើអ៊ីរ៉ង់

10, May 2019 , 3:03 pm

រូបភាព

រដ្ឋមន្រ្តីការបរទេសអ៊ីរ៉ង់ និងសមភាគីរុស្ស៊ី។ រូបភាព AFP

ដោយ: តន ចាន់រិទ្ធារ៉ា

អាមេរិកនៅថ្ងៃទី៩ ខែឧសភា បានដាក់ទណ្ឌកម្មថ្មីមួយទៀតលើអ៊ីរ៉ង់ ដោយលើកនេះដាក់គោលដៅលើវិស័យឧស្សាហកម្មលោហធាតុរបស់អ៊ីរ៉ង់។ នៅថ្ងៃដដែលនេះ ប្រទេសរុស្ស៊ី ចេញមកប្រឆាំងចំណាត់ការរបស់អាមេរិក និងអំពាវនាវឲ្យមានការចរចាដើម្បីការពារកិច្ចព្រមព្រៀងនុយក្លេអ៊ែរឆ្នាំ២០១៥ ។ រុស្ស៊ីក៏ស្នើទៅកាន់ហត្ថលេខីផ្សេងទៀតរបស់កិច្ចព្រមព្រៀងនេះឲ្យធ្វើតាមការប្ដេជ្ញាចិត្តរបស់ខ្លួនចំពោះអ៊ីរ៉ង់។

អាមេរិកទើបដាក់កញ្ចប់ទណ្ឌកម្មលើវិស័យរ៉ែអ៊ីរ៉ង់។ យើងសូមថ្កោលទោសចំណាត់ការនេះ។ នេះជាការប្រកាសរបស់ក្រសួងការបរទេសរុស្ស៊ី នៅថ្ងៃទី៩ ខែឧសភា ក្រោយប្រធានាធិបតីអាមេរិក ដូណាល់ ត្រាំ ចុះហត្ថលេខាដាក់ទណ្ឌកម្មលើអ៊ីរ៉ង់ ដែលជាទណ្ឌកម្មទីពីរលើប្រភពចំណូលរបស់ទីក្រុងតេហេរ៉ង់ បន្ទាប់ពីការនាំចេញប្រេង។

សម្រាប់ទណ្ឌកម្មថ្មីនេះ អាមេរិក នឹងដាក់ពិន័យលើប្រទេសណាដែលបន្តទិញលោហធាតុពីអ៊ីរ៉ង់ដូចជាដែក ទង់ដែង និងអាលុយមីញ៉ូម។ ឧស្សាហកម្មលោហធាតុនេះ មានទំហំ១០ភាគរយនៃការនាំចេញសរុបរបស់អ៊ីរ៉ង់។

តាមរយៈសេចក្ដីប្រកាសខាងលើ ក្រសួងការបរទេសរុស្ស៊ី ចាត់ទុកសភាពការណ៍បច្ចុប្បន្ននេះ ជារឿងធ្ងន់ធ្ងរ និងស្នើឲ្យអ៊ីរ៉ង់ជួបចរចាជាមួយមហាអំណាចពិភពលោកដទៃទៀតដើម្បីស្វែងរកផ្លូវធ្វើឲ្យស្ថានការណ៍វិលត្រឡប់ទៅរកភាពប្រក្រតីឡើងវិញ។ ទីក្រុងមូស្គូ លើកឡើងថា ខ្លួនយល់ពីសុខទុក្ខរបស់ក្រុងតេហេរ៉ង់ ប្រឈមមុខនឹងទណ្ឌកម្មរបស់ក្រុងវ៉ាស៊ីនតោន ហើយក៏យល់ពីជំហររបស់តេហេរ៉ង់ដែលសម្រេចចិត្តលែងអនុវត្តតាមចំណុចខ្លះនៃកិច្ចព្រមព្រៀងនុយក្លេអ៊ែរឆ្នាំ២០១៥ ។

ទោះជាយ៉ាងណា រុស្ស៊ី ប្រាប់ឲ្យអ៊ីរ៉ង់មិនត្រូវធ្វើខ្លាំងដៃពេកឡើយ ហើយបន្តប្រកាន់ខ្ជាប់កិច្ចព្រមព្រៀងដដែល។ ទន្ទឹមនឹងការប្រាប់អ៊ីរ៉ង់ រុស្ស៊ីក៏អំពាវនាវទៅកាន់មហាអំណាចផ្សេងឲ្យធ្វើតាមអ្វីដែលខ្លួនបានសន្យាឲ្យអ៊ីរ៉ង់។ នោះ គឺរុស្ស៊ី ចង់ប្រាប់អង់គ្លេស បារាំង និងអាល្លឺម៉ង់ ដែលបានធានាការពារមិនឲ្យរងទណ្ឌកម្មរបស់អាមេរិកលើការនាំចេញប្រេង និងវិស័យធនាគារដែលតួនាទីសំខាន់បំផុតក្នុងការទូទាត់ថ្លៃប្រេង។ ប៉ុន្តែប្រទេសទាំងនេះ មិនអាចធ្វើបានឡើយ។

តាមពិតទៅ ក្រោយអាមេរិកដាក់ទណ្ឌកម្មលើវិស័យប្រេង និងធនាគាររបស់អ៊ីរ៉ង់ អឺរ៉ុបបានឯកភាពគ្នាប្រព័ន្ធទូទាត់មួយដើម្បីបញ្ចៀសទណ្ឌកម្ម ហើយអឺរ៉ុប និងប្រទេសនានានៅតែអាចទិញប្រេងអ៊ីរ៉ង់ដដែល ដោយមិនបារម្ភរឿងទណ្ឌកម្ម។ ប៉ុន្តែ យន្តការថ្មី ហាក់គ្មានប្រសិទ្ធភាព ហើយប្រទេសជាច្រើនក៏មិនហ៊ានប្រថុយសាកល្បងនឹងចំណាត់ការរបស់អាមេរិកដែរ។ យ៉ាងក៏ដោយចុះ រុស្ស៊ីអះអាងថា ទំនាក់ទំនងសេដ្ឋកិច្ចជារឿងចាំបាច់រាប់ទាំងការទិញប្រេងផង៕