ជាតិ
ក្រសួងបរិស្ថាន ព្រមានវិធានការច្បាប់ ចំពោះអ្នកទន្ទ្រានយកដីព្រៃក្នុងតំបន់ការពារធម្មជាតិ
×![]()
ដោយ: ឡាយ សុភាវតី
ភ្នំពេញ៖ ក្រសួងបរិស្ថាន ដាស់តឿនពលរដ្ឋឲ្យបញ្ឈប់ការទន្ទ្រានយកដីព្រៃ ក្នុងតំបន់ការពារធម្មជាតិ។ បើមិនដូច្នោះទេ ក្រសួងនឹងចាត់វិធានការតាមផ្លូវច្បាប់។
ក្រសួងបរិស្ថាន បានសង្កេតឃើញថា បុគ្គលមួយចំនួនបានឈូសឆាយ កាប់ឆ្ការ ទន្ទ្រាន កាន់កាប់យកដីព្រៃធ្វើជាកម្មសិទ្ធិ រួមទាំងការទិញលក់ខុសច្បាប់។ ចំពោះបុគ្គលដែលមកទន្ទ្រានកាន់កាប់ដីព្រៃនោះ គឺបានយកឯកសារស្នើសុំកាន់កាប់ដីធ្លី ដែលរដ្ឋាភិបាលប្រកាសជាមោឃៈរួចហើយ យកមកធ្វើជាលេស។
សកម្មភាពទន្ទ្រានកាន់កាប់ដីព្រៃ នៅតែបន្តកើតមាននៅក្នុងតំបន់ការពារធម្មជាតិ ។ ជាពិសេសនៅតំបន់ឧទ្យាជាតិព្រះសីហនុ រាម, បូកគោ, គិរីរម្យ, ព្រែកទឹកសាបក្បាលឆាយ, ដែនជម្រកសត្វព្រៃលំផាត់ និងដែនជម្រកសត្វព្រៃស្រែពក។ ក្រសួងបរិស្ថានបានដាក់ចេញវិធានការនិងការណែនាំ មិនឲ្យទិញលក់ដី និងត្រូវបញ្ឈប់ជាបន្ទាន់ រាល់សកម្មភាពខុសច្បាប់ នៅតំបន់ការពារធម្មជាតិនិងដីរដ្ឋ។ ក្រសួងបរិស្ថាននឹងចាត់វិធានការ តាមច្បាប់ចំពោះអ្នកទន្ទ្រានដីព្រៃ សាងសង់ខ្ទម និងដាំដុះលើតំបន់ការពារធម្មជាតិ។
ដើម្បីពង្រឹងការគ្រប់គ្រងតំបន់ការពារធម្មជាតិ និងសិទ្ធិស្របច្បាប់របស់ក្រុមហ៊ុនវិនិយោគនៅតំបន់នោះ អាជ្ញាធរត្រូវចាត់វិធានការតឹងរឹង ចំពោះអ្នកទន្ទ្រានដីព្រៃទាំងនោះ ។ នេះបើតាមក្រសួងបរិស្ថាន៕
Tag:
ចាត់វិធានការច្បាប់
ទន្ទ្រានយកដីព្រៃ
© រក្សាសិទ្ធិដោយ thmeythmey.com
