ជាតិ
សង្គមជាតិ
ក្រុមហ៊ុនមួយ រងការចោទប្រកាន់ថា បំពានដីរបស់ពលរដ្ឋ៨គ្រួសារ នៅច្បារអំពៅ
× ប្រជាពលរដ្ឋ៨គ្រួសារក្នុងភូមិអូអណ្តូង សង្កាត់ព្រែកប្រា ខណ្ឌច្បារអំពៅ បានចោទក្រុមហ៊ុនផានអ៊ីម៉ិច ថាកំពុងរំលោភលើបណ្ដឹងរក្សាការពារដីរបស់ពួកគាត់ ដោយបានបូមខ្សាច់ចាក់លើដី ដែលកំពុងមានជម្លោះនេះ។
តំណាងប្រជាពលរដ្ឋ លោក រៀល ណារិទ្ធិ បានឲ្យដឹងថា ទីតាំងដីនោះ មានទំហំជិត៤ម៉ឺនម៉ែត្រការ៉េ ហើយប្រជាពលរដ្ឋទាំង៨គ្រួសារ បានបង្កបង្កើនផលតាំងពីឆ្នាំ១៩៩៥ ដល់ឆ្នាំ២០០៥។ លោកបន្ថែមថា វិវាទដីធ្លីនេះមានរយៈពេលជាង១០ឆ្នាំហើយ ហើយតុលាការមិនទាន់សម្រេចដោះស្រាយជូនពលរដ្ឋនៅឡើយទេ។
លោក អះអាងថា នៅដើមខែមេសា ឆ្នាំ២០១៩ ក្រុមហ៊ុននេះ បានបូមដីចាក់បំពេញដី ដែលមានជម្លោះជាមួយប្រជាពលរដ្ឋទាំង៨គ្រួសារ ទាំងតុលាការ សម្រេចចាត់ចែងជាបណ្តោះអាសន្ន ដោយហាមមិនឲ្យលក់ ដូរ ជួល បញ្ចាំ ដាក់ធានា ធ្វើប្រទានកម្មធ្វើអច្ច័យទាន ធ្វើអំណោយមរតក បង្កើតហ៊ីប៉ូតែក ធ្វើវិញ្ញាបនបត្រសម្គាល់ម្ចាស់អចលនវត្ថុ កាយយកអាចម៌ដី និងធ្វើសកម្មភាពផ្សេងៗទៀតចំពោះតំបន់ដីនោះ។
ប្រជាពលរដ្ឋទាំងនោះ បានអំពាវនាវឲ្យសម្តេចនាយករដ្ឋមន្ត្រី ហ៊ុន សែន ជួយធ្វើអន្តរាគមន៍លើរឿងនេះ៕
© រក្សាសិទ្ធិដោយ thmeythmey.com