ជាតិ
សេដ្ឋកិច្ច
ក្រុមហ៊ុនចិនត្រៀមសិក្សាផ្លូវដែកជាច្រើនខ្សែនៅកម្ពុជា
× ភ្នំពេញ៖ ក្រុមហ៊ុនសាជីវកម្មសាងសង់ផ្លូវដែកចិន CRCC កំពុងឈានដល់ការសិក្សាដើម្បីធ្វើឲ្យប្រសើរឡើងប្រព័ន្ធផ្លូវដែកនៅកម្ពុជា។ ផែនការសិក្សានេះ ត្រូវលើកយកមកពិភាក្សាដោយគណៈប្រតិភូក្រុមហ៊ុន CRCC ដែលដឹកនាំដោយលោក Wang Wenzhong អនុប្រធានក្រុមហ៊ុនមួយនេះ និងលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅថ្ងៃទី៩ខែឧសភា។
ទស្សនកិច្ចនេះធ្វើឡើងបន្ទាប់ពីមានការស្នើរបស់សម្ដេចនាយករដ្ឋមន្ត្រី ហ៊ុន សែន ដែលសុំឲ្យក្រុមហ៊ុននេះជួយអភិវឌ្ឍន៍ផ្លូវដែកនៅកម្ពុជា។ សម្ដេចបានស្នើបែបនេះក្នុងពេលចូលរួមវេទិកាផ្លូវ និងក្រវាត់ នៅទីក្រុងប៉េកាំង កាលពីចុងខែមេសា។
បើតាមសេចក្ដីប្រកាសព័ត៌មានរបស់ក្រសួងសាធារណការ ដំណើរទស្សនកិច្ចរបស់ក្រុមហ៊ុន CRCC នឹងឈានដល់ការសិក្សាផ្លូវដែកជាច្រើនកន្លែង ទាំងផ្លូវដែកដែលមានស្រាប់ និងប្រព័ន្ធផ្លូវដែកថ្មីនៅភ្នំពេញ។ ក្រសួងបញ្ជាក់ដូច្នេះថា៖«ដំណើរទស្សនកិច្ចរបស់គណៈប្រតិភូក្រុមហ៊ុន CRCC នេះ គឺធ្វើឡើងដើម្បីសិក្សាគម្រោងធ្វើឲ្យប្រសើរឡើងផ្លូវដែកកម្ពុជាដែលមានស្រាប់ ភ្នំពេញ-ព្រះសីហនុ ភ្នំពេញ-ប៉ោយប៉ែត សិក្សាផ្លូវរថភ្លើងលើអាកាសធុនស្រាល (Monorail) និងរថភ្លើងក្រោមដី នៅរាជធានីភ្នំពេញ ហើយរាយការណ៍ជូនរដ្ឋាភិបាលកម្ពុជា ដើម្បីជ្រើសរើសយកប្រព័ន្ធដឹកជញ្ជូនណាមួយ ដែលមានប្រសិទ្ធភាពបំផុត អាចកាត់បន្ថយការកកស្ទះចរាចរណ៍នៅភ្នំពេញ»។
ជាមួយគ្នានេះលោក ស៊ុន ចាន់ថុល បានស្នើឲ្យក្រុមហ៊ុន CRCC សិក្សាផ្លូវដែកបន្តពីក្រុងសិរីសោភ័ណ មកខេត្តសៀមរាប ដែលមានប្រវែង១០០គីឡូម៉ែត្រ ដោយហេតុថាទេសចរចង់ធ្វើដំណើរតាមរថភ្លើងពីសិង្ហបុរី បាងកក មកលេងអង្គរវត្ត។
កិច្ចពិភាក្សាកងាររវាងប្រតិភូក្រុមហ៊ុន CRCC និងក្រសួងសាធារណការ (រូបពីក្រសួង)
អ្នកនាំពាក្យក្រសួងសាធារណការលោក វ៉ាស៊ឹម សុរិយា បានប្រាប់សារព័ត៌មានរបស់ថ្មីៗថា អ្នកជំនាញការរបស់ក្រុមហ៊ុន CRCC កំពុងធ្វើការទាក់ទងនឹងគម្រោងនេះនៅកម្ពុជា។ «បើតាមខ្ញុំដឹង ក្រុមការងារ ១៨នាក់របស់ក្រុមហ៊ុននេះកំពុងនៅកម្ពុជាធ្វើកិច្ចការទាំងអស់នោះ»។ តែលោកមិនអាចបញ្ជាក់បានការសិក្សានឹងប្រើរយៈពេលប៉ុន្មាន ហើយក្រុមហ៊ុននឹងវិនិយោគយ៉ាងដូចម្ដេចទៅលើគម្រោងទាំងនោះទេ។
គួរបញ្ជាក់ថា កាលពីចុងខែមីនាក្នុងវេទិការដ្ឋាភិបាលនិងវិស័យឯកជន ប្រមុខរដ្ឋាភិបាលបានសង្កត់ធ្ងន់ពីការអភិវឌ្ឍយឺតយ៉ាវនៃវិស័យផ្លូវដែករបស់កម្ពុជា។ សម្ដេច ហ៊ុន សែន បានណែនាំឲ្យក្រសួងសាធារណការត្រូវរកក្រុមហ៊ុនថ្មីផ្សេងទៀតដើម្បីសហការធ្វើឲ្យប្រសើរឡើងប្រព័ន្ធផ្លូវដែកនៅកម្ពុជា។ ហើយរដ្ឋាភិបាលបានអនុញ្ញាតឲ្យក្រុមហ៊ុន Royal Railways បន្តគ្រប់គ្រងប្រតិបត្តិការដឹកជញ្ជូនតាមផ្លូវដែកទាំងពីរខ្សែជាបណ្ដោះអាសន្នសិន មុននឹងមានការដាក់ឲ្យដេញថ្លៃយកសិទ្ធិគ្រប់គ្រងអាជីវកម្មផ្លូវដែក ម្ដងទៀត៕
© រក្សាសិទ្ធិដោយ thmeythmey.com