AFF U15 Girl៖ កម្ពុជា​ប៉ះ​ម៉ាឡេស៊ី មុន​ថៃ​ស្វាគមន៍​សិង្ហ​បុរី​
កីឡាជាតិ
ជាតិ
AFF U15 Girl៖ កម្ពុជា​ប៉ះ​ម៉ាឡេស៊ី មុន​ថៃ​ស្វាគមន៍​សិង្ហ​បុរី​
11, May 2019 , 11:57 am        
រូបភាព
កីឡាការិនីជម្រើសជាតិកម្ពុជាហ្វឹកហាត់ត្រៀមមុនជួបជាមួយម៉ាឡេស៊ីនៅថៃ។(រូបភាពពី FFC)
កីឡាការិនីជម្រើសជាតិកម្ពុជាហ្វឹកហាត់ត្រៀមមុនជួបជាមួយម៉ាឡេស៊ីនៅថៃ។(រូបភាពពី FFC)
ក្រុម​កីឡាការិនី​ជម្រើសជាតិ​អាយុ​ក្រោម​១៥​ឆ្នាំ​កម្ពុជា ត្រូវ​តទល់​ជាមួយ​ក្រុម​ម៉ាឡេស៊ី សម្រាប់​ជំនួប​លើក​ទី​២ វគ្គ​ជម្រុះ AFF U15 Girl Championship នៅ​ម៉ោង​៣​រសៀល (​ម៉ោង​នៅ​កម្ពុជា​) ថ្ងៃទី​១១ ខែឧសភា​នេះ​។ ចំណែក​ក្រុម U15 នារី​ថៃ ប៉ះ​សិង្ហ​បុរី នៅ​ម៉ោង​៦​ល្ងាច​។​


​ក្រោយ​បរាជ័យ ២-១ ក្រោម​ថ្វី​ជើង​ក្រុមបាល់ទាត់​នារី អាយុ​ក្រោម​១៥​សិង្ហ​បុរី នា​ជំនួប​បើកឆាក​ពូ​ល B កាលពី​ថ្ងៃទី​៩ ខែឧសភា ក្រុម​កីឡាការិនី​ជម្រើសជាតិ​អាយុ​ក្រោម​១៥​ឆ្នាំ​កម្ពុជា ត្រូវ​បន្ត​ជួប​ក្រុម​ម៉ាឡេស៊ី សម្រាប់​ជំនួប​លើក​ទី​២​ពានរង្វាន់ AFF U15 Girl Championship នៅថ្ងៃនេះ​។ នា​ជំនួប​បើកឆាក ក្រុម​ម៉ាឡេស៊ី ត្រូវបាន​ក្រុម U15 នារី​ឡាវ​លត់​ក្នុង​លទ្ធផល ៤-០​។ 

​បើ​មើ​លពី​ប្រវត្តិ​ក្រុមបាល់ទាត់​នារី​របស់​ម៉ាឡេស៊ី មិនដែល​ឆ្លង​ផុត​វគ្គ​ជម្រុះ តាម​ពូ​ល​នោះទេ ខណៈ​កម្ពុជា ធ្លាប់​ទទួលបាន​ចំណាត់ថ្នាក់​លេខ​៤​ម្តង កាលពី​ឆ្នាំ​២០១៧​។ តែ​ក្រុម​ទាំងពីរ មិន​ធ្លាប់​ជួបគ្នា​នោះទេ​។ តាមរយៈ​លទ្ធផល​នេះ ក្រុម​កីឡាការិនី​ជម្រើសជាតិ​កម្ពុជា អាចមាន​ប្រៀប​ជាង​ម៉ាឡេស៊ី នៅថ្ងៃនេះ​។ 

​នៅ​ពូ​ល B ដដែល​នេះ ក្រុម​ការពារ​តំណែង​ជើងឯក​ថៃ ត្រូវ​បើកទ្វារ​កីឡដ្ឋាន​របស់ខ្លួន​ស្វាគមន៍​ក្រុម​សិង្ហ​បុរី ដែល​យកឈ្នះ​កម្ពុជា ២-១ សម្រាប់​ជំនួប​បើកឆាក​របស់ខ្លួន នៅ​ម៉ោង​៦​ល្ងាច​។ ក្រុម​កីឡាការិនី​ជម្រើសជាតិ​ថៃ បាន​គ្រង​ជើងឯក​ព្រឹត្តិការណ៍​នេះ​ពីរ​ឆ្នាំ​ជាប់​គ្នា គឺ​នៅ​ឆ្នាំ​២០១៧ និង ២០១៨ ខណៈ​សិង្ហ​បុរី មិនដែល​ឆ្លង​ផុត​វគ្គ​ជម្រុះ​តាម​ពូ​ល​នោះទេ​។​

​សម្រាប់​ការប្រកួត​បើកឆាក​ពូ​ល កាលពី​ថ្ងៃ​សុក្រ ទី​១០ ខែឧសភា ក្រុម​មី​យ៉ាន់​ម៉ា បាន​លត់​ក្រុមទី​ម័​រ​ខាងកើត ក្នុង​លទ្ធផល​ដ៏​ច្រើន​លើសលប់ ២៦-០ ខណៈ​វៀតណាម យកឈ្នះ​ហ្វីលីពីន ក្នុង​លទ្ធផល ២-០៕  


Tag:
 បាល់ទាត់​
  AFF U15 Girl Championship 2019
© រក្សាសិទ្ធិដោយ thmeythmey.com