អន្តរជាតិ
នយោបាយអន្តរជាតិ
៧០ប្រទេស ស្នើកូរ៉េខាងជើងឲ្យបោះបង់នុយក្លេអ៊ែរ និងមីស៊ីលបាលីស្ទិក រូបភាព KNCA
× ប្រទេសចំនួន៧០ នៅថ្ងៃទី១០ ខែឧសភា បានស្នើឲ្យកូរ៉េខាងជើងបោះបង់កម្មវិធីនុយក្លេអ៊ែរ មីស៊ីលបាលីស្ទិក និងកម្មវិធីអាវុធផ្សេងទៀត ដោយចាត់ទុកអាវុធទាំងនេះជាការគំរាមកំហែងដល់សន្តិសុខតំបន់ និងសន្តិភាពពិភពលោក។ សំណើនេះ ត្រូវបានលើកឡើងក្រោយកូរ៉េខាងជើងបានបាញ់មីស៊ីលចំនួនពីរដងក្នុងរយៈពេលមិនដល់មួយសប្ដាហ៍ផង ដែលក្នុងនោះក៏មានមីស៊ីលចម្ងាយខ្លីប្រើបច្ចេកវិទ្យាបាលីស្ទិកផងដែរ។
ប្រទេសមកពីអាហ្វ្រិក អាស៊ី អឺរ៉ុប និងអាមេរិកឡាទីនប្រមាណ៧០ បានចុះហត្ថលេខាលើសំណើមួយទៅកាន់កូរ៉េខាងជើង។ អាមេរិក និងកូរ៉េខាងត្បូង ដែលជាភាគីកំពុងចរចាជាមួយកូរ៉េខាងជើង ក៏បានចុះហត្ថលេខាលើលិខិតដែលរៀបរៀងដោយបារាំងដែរ ខណៈរុស្ស៊ី និងចិនដែលជាខ្នងបង្អែកការទូតដ៏សំខាន់របស់របបដឹកនាំលោក គីម ជុងអ៊ុន មិនបានចុះហត្ថលេខាឡើយ។
ក្នុងលិខិតនោះ ប្រទេសហត្ថលេខីទាំងអស់ បង្ហាញជំហរបារម្ភចំពោះការគំរាមដ៏ខ្លាំងក្លាលើសន្តិភាពតំបន់ និងពិភពលោកដែលបង្កដោយកម្មវិធីនុយក្លេអ៊ែរ និងមីស៊ីលបាលីស្ទិករបស់កូរ៉េខាងជើង។ ប្រទេសទាំងអស់បានប្រាប់ឲ្យកូរ៉េខាងជើងបញ្ចៀសសកម្មភាពបង្កហេតុណាមួយ និងបន្តចរចាជាមួយអាមេរិកលើការរំសាយនុយក្លេអ៊ែរ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ការចរចារវាងអាមេរិក និងកូរ៉េខាងជើងលើសំណុំរឿងនុយក្លេអ៊ែរនេះ បានជាប់គាំងតាំងពីជំនួបមេដឹកនាំនៅវៀតណាមបរាជ័យ។ ការបញ្ចប់ជំនួបដោយគ្មានការព្រមព្រៀងអ្វីនេះ ធ្វើឲ្យកូរ៉េខាងជើងខកចិត្តខ្លាំង ដ្បិតការទាមទាររបស់ខ្លួនមិនត្រូវបានអាមេរិកពិចារណា។ ប៉ុន្មានខែក្រោយមក ពោលនៅថ្ងៃទី៤ ខែឧសភា កូរ៉េខាងជើងក៏បានកាំជ្រួចជាច្រើនគ្រាប់ ដែលក្នុងនោះមានមីស៊ីលបាលីស្ទិកចម្ងាយខ្លីផង។ រំលងមិនប៉ុន្មានថ្ងៃ កូរ៉េខាងជើងក៏បាញ់មីស៊ីលមួយប្រាវទៀត។
ជុំវិញការបាញ់កាំជ្រួចនេះ កូរ៉េខាងជើងបានបកស្រាយម្ដងហើយ គឺសមយុទ្ធខាងលើនេះ គ្មានគោលដៅអ្វីក្រៅពីការហ្វឹកហាត់ជាប្រចាំរបស់កងទ័ពកូរ៉េខាងជើងឡើយ ហើយក៏មិនគំរាមកំហែងនរណា ឬធ្វើឲ្យមានភាពតានតឹងក្នុងតំបន់ដែរ។ ក្នុងន័យរិះគន់កូរ៉េខាងត្បូង កូរ៉េខាងជើងចាត់ទុកសមយុទ្ធរបស់ខ្លួនទៅនឹងសមយុទ្ធរួមគ្នារវាងយោធាអាមេរិក និងកូរ៉េខាងត្បូងដែលភាគីទាំងពីរនេះអះអាងថា ជាការពារខ្លួននោះ។
ចំណែកឯសហរដ្ឋអាមេរិក ហាក់មិនសូវប្រតិកម្មខ្លាំងឡើយជុំវិញសកម្មភាពថ្មីៗនេះរបស់កូរ៉េខាងជើង។ នេះទំនងជាអាមេរិកមិនបារម្ភចំពោះការបាញ់មីស៊ីលចម្ងាយខ្លី ដែលគ្មានសមត្ថភាពហោះដល់ទឹកដីអាមេរិកឡើយ។ កាលពីឆ្នាំមុន ខណស្ថានការណ៍ធូរស្រាលកាន់តែខ្លាំងនោះ លោក គីម ជុងអ៊ុន ប្រកាសផ្អាកទាំងស្រុងការបាញ់សាកល្បងមីស៊ីលបាលីស្ទិកចម្ងាយឆ្ងាយដែលអាចវាយប្រហារគោលដៅនៅទឹកដីអាមេរិក៕
Tag:
កូរ៉េខាងជើង
អាមេរិក
© រក្សាសិទ្ធិដោយ thmeythmey.com