ជាតិ
កូរ៉េ ប្រគល់ Tablets ជិត២០០គ្រឿង ដល់អង្គភាព និងសាលាគោលដៅចំនួន៤ ដើម្បីកាត់បន្ថយគម្លាតឌីជីថលរវាងសិស្សទីក្រុង និងជនបទ
រូបភាពពីក្រសួងអប់រំ យុវជន និងកីឡា
×![]()
ភ្នំពេញ៖ មន្ទីរអប់រំ ទីក្រុងប៊ូសាន នៃសាធារណរដ្ឋកូរ៉េ បានប្រគល់សម្ភារៈបរិក្ខារសម្រាប់បំពាក់ស្ទូឌីយោ និងកុំព្យូទ័របន្ទះ (Tablets) ចំនួន ១៨០គ្រឿង ដល់នាយកដ្ឋានបច្ចេកវិទ្យាព័ត៌មាន និងសាលារៀនគោលដៅចំនួន ៤ នៅរាជធានីភ្នំពេញ, ខេត្តកំពង់ចាម និងខេត្តសៀមរាប។ បើតាមក្រសួងអប់រំ កុំព្យូទ័របន្ទះ (Tablets) នេះ នឹងធ្វើឲ្យសិស្សានុសិស្សអាចទទួលបានការអប់រំប្រកបដោយសមធម៌ កាត់បន្ថយគម្លាតឌីជីថលរវាងសិស្សនៅទីក្រុង និងជនបទ ជាពិសេសដើម្បីគាំទ្រកំណែទម្រង់វិស័យអប់រំ ដោយផ្ដោតលើការលើកកម្ពស់ការអប់រំឌីជីថលនៅកម្ពុជា។
នៅថ្ងៃទី ១១ ឧសភានេះ មន្ទីរអប់រំទីក្រុងប៊ូសាន នៃសាធារណរដ្ឋកូរ៉េ បានប្រគល់សម្ភារបច្ចេកវិទ្យាដល់នាយកដ្ឋានបច្ចេកវិទ្យាព័ត៌មាន និងសាលារៀនគោលដៅចំនួន ៤។ សាលារៀនគោលដៅដែលទទួលបានកុំព្យូទ័របន្ទះ (Tablets) រួមមាន វិទ្យាល័យសម្ដេច ហ៊ុន សែន ពាមជីកង, សាលាបឋមសិក្សានរោត្តម, សាលាបឋមសិក្សាអង្គរបាន និងសាលាបឋមសិក្សាវត្តបូព៌ ដោយសាលានីមួយៗទទួលបាន Tablets ចំនួន ៣០គ្រឿង។ ពិធីប្រគល់នេះ ប្រព្រឹត្តនៅវិទ្យាល័យសម្ដេច ហ៊ុន សែន ពាមជីកង នាខេត្តកំពង់ចាម ដោយមានការចូលរួមពីរដ្ឋមន្ត្រីក្រសួងអប់រំ យុវជន និងកីឡា រួមទាំងម្ចាស់ជំនួយ។
រូបភាពពីក្រសួងអប់រំ យុវជន និងកីឡា
រូបភាពពីក្រសួងអប់រំ យុវជន និងកីឡា
បើតាមក្រសួងអប់រំ ការប្រើប្រាស់បច្ចេកវិទ្យាទាំងនេះ ដើម្បីលើកកម្ពស់ និងបញ្ជ្រាបការសិក្សាផ្នែកបច្ចេកវិទ្យាព័ត៌មាន ក្នុងកម្មវិធីអប់រំ និងចូលរួមបណ្ដុះធនធានមនុស្សប្រកបដោយសមត្ថភាព ដែលសម្របខ្លួននឹងសម័យឌីជីថល។ ក្រសួងអប់រំ ជឿជាក់លើការងារគ្រប់គ្រងរបស់សាលារៀន ដោយយកឧបករណ៍ដែលបានប្រគល់ជូននាពេលនេះ ទៅប្រើប្រាស់ឲ្យអស់ពីលទ្ធភាព។
រូបភាពពីក្រសួងអប់រំ យុវជន និងកីឡា
រូបភាពពីក្រសួងអប់រំ យុវជន និងកីឡា
តាមរយៈការប្រើប្រាស់បច្ចេកវិទ្យានេះ ក្រសួងអប់រំ បានអះអាងថា សិស្សអាចទទួលបានការអប់រំប្រកបដោយសមធម៌ កាត់បន្ថយគម្លាតឌីជីថលរវាងសិស្សានុសិស្សនៅទីក្រុង និងជនបទ ជាពិសេស ដើម្បីគាំទ្រកំណែទម្រង់វិស័យអប់រំដែលផ្ដោតលើផ្នែកមួយនៃការលើកកម្ពស់ការអប់រំឌីជីថលនៅកម្ពុជា។
សូមបញ្ជាក់ថា កុំព្យូទ័របន្ទះ (Tablets) ដែលបានចែកដល់អង្គភាព និងសាលារៀនគោលដៅខាងលើ នាយកដ្ឋានជំនាញ បានបញ្ចូលកម្មវិធីជំនួយការបង្រៀន-រៀនជាច្រើន ដែលអាចឲ្យលោកគ្រូ អ្នកគ្រូ យកទៅបង្រៀនសិស្សានុសិស្សបានដោយងាយស្រួល តាមមុខវិជ្ជាផ្សេងៗ ដូចជា៖ កម្មវិធីថ្មីៗរបស់ក្រសួង កម្មវិធីមេរៀនជំនួយ, គន្លឹះដោះស្រាយលំហាត់, តេស្តអំណាន និងភាសាអង់គ្លេសជាដើម៕
Tag:
ទីក្រុងប៊ូសាន
កូរ៉េ
ក្រសួងអប់រំ
កុំព្យូទ័រ
© រក្សាសិទ្ធិដោយ thmeythmey.com
