អន្តរជាតិ
ឧបនាយករដ្ឋមន្ត្រីថៃ ថ្លែងការពារការតែងតាំងប្អូនប្រុសលោក ប្រាយុទ្ធ ជាសមាជិកព្រឹទ្ធសភា លោក ប្រាយុទ្ធ ចន្ទអូចា នាយករដ្ឋមន្ត្រីថៃ (ឆ្វេង) ថតជាមួយលោក ព្រីឆា ចន្ទអូចា ជាប្អូនប្រុស នៅអគាររដ្ឋាភិបាលថៃ (ប្រភពរូប៖ The Nation)
× ឧបនាយករដ្ឋមន្ត្រីថៃ Prawit Wongsuwon បានថ្លែងការពារចំពោះការតែងតាំងលោក ព្រីឆា ចន្ទអូចា (Preecha Chan-o-cha) ជាសមាជិកព្រឹទ្ធសភាថៃ ដោយនិយាយថា មន្ត្រីចូលនិវត្តន៍មានបទពិសោធន៍គ្រប់គ្រាន់ ក្លាយជាអ្នកបង្កើតច្បាប់។ លោក ប្រេឆា ដែលជាអតីតលេខាធិការអចិន្ត្រៃយ៍នៃក្រសួងការពារជាតិ គឺជាប្អូនប្រុសបង្កើតរបស់លោកនាយករដ្ឋមន្ត្រីថៃ ប្រាយុទ្ធ ចន្ទអូចា។
ខណៈបញ្ជីឈ្មោះសមាជិកព្រឹទ្ធសភាទាំង២៥០ ពុំទាន់ត្រូវបានបញ្ចេញជាសាធារណៈទេនោះ មន្ត្រី គ្រាក់ៗថៃមួយចំនួន បានបញ្ជាក់ឲ្យដឹងថា ពួកគេបានយល់ព្រមទទួលយកតំណែងព្រឹទ្ធសភានេះ ក្នុងនោះមាន លោកឧត្តមសេនីយ៍ព្រីឆា ផងដែរ។
យោងតាមរដ្ឋធម្មនុញ្ញថៃ ដែលធ្លាប់ត្រូវបានធ្វើវិសោធនកម្មដោយរបបសឹកនោះ សមាជិកព្រឹទ្ធសភាទាំង២៥០នាក់នេះ ត្រូវបានជ្រើសរើសដោយផ្ទាល់ពីសំណាក់ក្រុមប្រឹក្សាជាតិសម្រាប់សន្តិភាព និងសណ្តាប់ធ្នាប់ថៃ (NCPO) ដែលមានលោក ប្រាយុទ្ធ ជាប្រធាន ។
ទន្ទឹមនឹងគ្នានេះ លោក ប្រេឆា ក៏ស្ថិតក្នុងចំណោមសមាជិកសភាថៃ (NLA) ចំនួន៦០នាក់ ដែលបានលាលែងពីតំណែងរបស់ពួកគេក្នុងសប្តាហ៍នេះ ពោលគឺមុនការឈានទៅទទួលតួនាទីជាសមាជិកព្រឹទ្ធសភា។ ហើយយ៉ាងហោចណាស់សមាជិកគណៈរដ្ឋមន្ត្រីថៃ ១៥នាក់ ក៏បានលាឈប់ពីតំណែងសម្រាប់ហេតុផលដូចគ្នានេះផងដែរ។
យោងតាមការចុះផ្សាយរបស់កាសែតបាងកកប៉ុស្តិ៍ ឧបនាយករដ្ឋមន្ត្រីថៃ លោកឧត្តមសេនីយ៍ Prawit Wongsuwon នៅថ្ងៃសុក្រទី ១០ ឧសភា បានគូសបញ្ជាក់ថា លោក ព្រីឆា ចន្ទអូចា ប្អូនប្រុសលោកប្រាយុទ្ធ ធ្លាប់កាន់តំណែងជាសមាជិកសភាថៃម្នាក់ ហើយជាមួយបទពិសោធន៍នេះ លោកនឹងក្លាយជាសមាជិកព្រឹទ្ធសភា។ លើសពីនេះ លោក Prawit អះអាងថា បញ្ជីឈ្មោះសមាជិកព្រឹទ្ធសភាទាំងអស់ ត្រូវបានបញ្ចូនរួចរាល់ទៅកាន់ព្រះមហាក្សត្រ ដើម្បីទូលសុំការយល់ព្រម។
គួរឲ្យកត់សម្គាល់ថា លោក ព្រីឆា ធ្លាប់ទទួលរងព្យុះរិះគន់ជុំវិញបញ្ហាគ្រួសារនិយមកាលពីឆ្នាំ២០១៦។ កាលនោះ លោកបានរៀបចំទុកដាក់កៅអីការងារមួយកន្លែងសម្រាប់កូនប្រុសលោក ក្នុងអគ្គនាយកដ្ឋានទទួលទន្ទុកកិច្ចការស៊ីវិលនៃកងទ័ពជើងគោកថៃ ដោយមានឋានៈជាអនុសេនីយ៍ត្រីស្តីទី។
ចំណែកកូនប្រុសម្នាក់ទៀតរបស់លោក ព្រីឆា គឺជាម្ចាស់ភាគហ៊ុនដ៏ធំមួយក្នុងក្រុមហ៊ុនសំណង់មួយ ដែលបានឈ្នះការដេញថ្លៃលើកិច្ចសន្យាសាងសង់ចំនួន៧ពីយោធាថៃ ចន្លោះពីខែធ្នូ ឆ្នាំ២០១៤ និង ខែមេសា ឆ្នាំ២០១៦ ដែលគិតជាទឹកប្រាក់សរុប ៩៧ពាន់លានបាត។ យ៉ាងណាមិញ លោកឧត្តមសេនីយ៍ ព្រីឆា ដែលជាឳពុក បានបដិសេធការលូកដៃក្នុងរឿងនេះ៕
Tag:
ថៃ
ប្រាយុទ្ធ
ប្រាវីត
© រក្សាសិទ្ធិដោយ thmeythmey.com