អន្តរជាតិ
មន្ត្រីជាន់ខ្ពស់សិង្ហបុរី៖ ច្បាប់ប្រឆាំងព័ត៌មានក្លែងក្លាយ មិនប៉ុនប៉ុងរឹតត្បិតសិទ្ធិអ្នកមានទស្សនៈផ្សេងឡើយ
× សភាសិង្ហបុរី នៅថ្ងៃ៨ ឧសភាបានអនុម័តច្បាប់ប្រឆាំងនឹងព័ត៌មានមិនពិតជាផ្លូវការហើយ។ ក្រោមការរិះគន់ពីផលប៉ះពាល់លើសិទ្ធិសេរីភាពនៃការបញ្ចេញមតិ រដ្ឋាភិបាលសិង្ហបុរី បានអះអាងថា ច្បាប់ថ្មីនេះ មិនមានចេតនាដាក់សម្ពាធ និងរឹតត្បិតការបង្ហាញទស្សនៈផ្សេងគ្នាឡើយ។
តាមរយៈសន្និសីទសារព័ត៌មាន លោកឧបនាយករដ្ឋមន្ត្រី Heng Swee Keat បានពន្យល់ពីភាពចាំបាច់ ដែលសិង្ហបុរី ត្រូវតែមានច្បាប់ប្រឆាំងនឹងព័ត៌មានក្លែងក្លាយ ដែលទើបតែអនុម័តដោយសភារបស់ខ្លួនកាលពីពេលថ្មីៗ។ លោកឧបនាយករដ្ឋមន្ត្រី បានទាញឲ្យមានការចាប់អារម្មណ៍ខ្លាំងពីភាពខុសគ្នារវាងការពិត និងទស្សនៈ។ នេះបើយោងតាមការចុះផ្សាយរបស់សារព័ត៌មាន Channel News Asia។
សម្រាប់លោកឧបនាយករដ្ឋមន្ត្រី ការមានទស្សនៈផ្សេងគ្នាលើអង្គហេតុតែមួយ មិនមែនជាបញ្ហា ឬក្តីបារម្ភអ្វីឡើយ ក៏ប៉ុន្តែអ្វីដែលអាក្រក់ និងត្រូវបារម្ភនោះ គឺការយល់ឃើញខុសពីការពិត ហើយធ្វើការសន្និដ្ឋានរួម និងថែមបង្កឲ្យមានភាពភាន់ច្រលំដល់សាធារណៈ ជាពិសេសនោះតាមរយៈការផ្សព្វផ្សាយក្នុងបណ្តាញសង្គមតែម្តង។
លោកឧបនាយករដ្ឋមន្ត្រី និងជាបុគ្គលដែលត្រូវបានគេជឿជាក់ថាជាអ្នកបន្តវេនដឹកនាំប្រទេសពីលោកនាយករដ្ឋមន្ត្រី Lee Hsien Loong បានអះអាងថា សង្គមសិង្ហបុរី ជាសង្គមមួយដែលមានលក្ខណៈផុយស្រួយពីការវាយប្រហារពីព័ត៌មានមិនពិត ដ្បិតសិង្ហបុរី គឺជាមជ្ឈមណ្ឌលហិរញ្ញវត្ថុសកល ការប្រើប្រាស់ប្រព័ន្ធអ៊ិនធ័រទូលំទូលាយ ខណៈប្រជាជន ក៏មានចម្រុះគ្នាច្រើនលើជាតិសាសន៍ និងសាសនា។
ជុំវិញច្បាប់ថ្មីនេះ រដ្ឋមន្ត្រីមហាផ្ទៃសិង្ហបុរី K Shanmugam ក៏បានឲ្យដឹងថា ច្បាប់ថ្មីនេះ ក៏មានគោលដៅទប់ស្កាត់ការបាត់បង់ទំនុករបស់សាធារណៈទៅកាន់រដ្ឋាភិបាលតាមរយៈព័ត៌មានមិនពិត និងបង្កឲ្យមានការងើបឡើងនៃឧបាយនិយម និងការបែងចែកគ្នានៅក្នុងសង្គមផងដែរ។
គួរជម្រាបផងដែរថា បញ្ហានៃការចែករំលែកព័ត៌មានមិនពិត ជាក់ស្តែងតាមរយៈប្រព័ន្ធផ្សព្វផ្សាយបណ្តាញសង្គម បានក្លាយជាក្តីបារម្ភធំមួយរបស់ប្រទេសក្នុងតំបន់អាស៊ាន។ រដ្ឋអាស៊ាន លើកផលប៉ះពាល់ស្រដៀងគ្នា ថាទំនោរនេះ បង្កឲ្យមានការយល់ខុសលើការអនុវត្តគោលនយោបាយរបស់រដ្ឋាភិបាល និងធ្វើឲ្យមានការបែងចែកនិន្នាការទៀតផង៕
© រក្សាសិទ្ធិដោយ thmeythmey.com