អន្តរជាតិ
វៀតណាម ប្តេជ្ញាអភិវឌ្ឍបច្ចេកវិទ្យា 5G ខ្លួនឯង ដោយមិនឲ្យក្រុមហ៊ុនចិនពាក់ព័ន្ធ
ប្រភពរូប៖ កាសែតវៀតណាម Nhan Dan
×![]()
កាលពីថ្ងៃទី២៥ ខែមេសាកន្លងទៅ វៀតណាម បានក្លាយជាសមាជិកនៃក្រុមប្រទេសមានបណ្តាញ 5G ក្រោយពីខ្លួន បានទទួលជោគជ័យក្នុងការសាកល្បងបច្ចេកវិទ្យាជំនាន់ទីប្រាំនេះ។ ជាមួយល្បឿនចន្លោះពី ៦០០ ទៅ ៧០០ មេហ្កាបៃក្នុងមួយវិនាទី គម្រោងនេះស្ថិតក្នុងដំណាក់កាលដំបូងប៉ុណ្ណោះ។ 
ហាក់ស្ទាក់ស្ទើរនឹងសុំជំនួយពីបរទេសទាំងស្រុងដើម្បីអភិវឌ្ឍបន្ត ក្រុមហ៊ុន Viettel របស់យោធាវៀតណាម កំពុងព្យាយាមអភិវឌ្ឍបច្ចេកវិទ្យាស្នូលផ្ទាល់ខ្លួន ដោយប្តេជ្ញាថា ៨០ភាគរយនៃបច្ចេកវិទ្យា 5G នឹងត្រូវអភិវឌ្ឍនៅក្នុងស្រុក។ ទោះបីជាអះអាងថា ការអភិវឌ្ឍប្រព័ន្ធនេះ ប្រហែលត្រូវការជំនួយខ្លះជាពិសេសផ្នែក Hardware ពីក្រុមហ៊ុនបរទេស ក្រុមហ៊ុនទូរគមនាគមន៍ដ៏ធំរបស់វៀតណាមមួយនេះ សង្កត់ធ្ងន់ថា ក្រុមហ៊ុនបច្ចេកវិទ្យាយក្សរបស់ចិន Huawei នឹងមិនចូលរួមក្នុងគម្រោងអភិវឌ្ឍន៍នេះជាដាច់ខាត។
មែនទែនទៅ ការសម្រេចចិត្តរបស់ក្រុមហ៊ុន Viettel បែបនេះ កើតឡើងខណៈសម្ព័ន្ធមិត្តជិតស្និទ្ធរបស់សហរដ្ឋអាមេរិក ជ្រួលជ្រើមនឹងតម្លៃធូរថ្លៃថោកជាងទីផ្សារក្នុងការអភិវឌ្ឍបច្ចេកវិទ្យា 5G ដែលផ្តល់ឲ្យដោយក្រុមហ៊ុន Huawei ។ កន្លងទៅ ក្រុងវ៉ាស៊ីនតោន ធ្លាប់បានព្រមានថា ក្រុមហ៊ុន Huawei ប្រហែលជាបង្កើតហេដ្ឋារចនាសម្ព័ន្ធបច្ចេកវិទ្យា 5G ដើម្បីបម្រើផលប្រយោជន៍ដល់ភ្នាក់ងារចារកម្មចិន។ យ៉ាងណាមិញ ក្រុមហ៊ុនបច្ចេកវិទ្យារបសចិននេះ បានច្រានចោលការលើកឡើងបែបនេះ។
និយាយពី មូលហេតុដែលធ្វើឲ្យវៀតណាមប្រយ័ត្នប្រយែងនឹងពាក់ព័ន្ធនឹងបច្ចេកវិទ្យាចិនជាពិសេស ក្នុងវិស័យទូរគមនាគមន៍ ដែលសំខាន់សម្រាប់សន្តិសុខជាតិ។ ក្នុងកែវភ្នែករបស់រដ្ឋាភិបាលក្រុងហាណូយ ចិនដែលជាប្រទេសជិតខាង គឺជាការគំរាមកំហែងសន្តិសុខពីខាងក្រៅដ៏ធំបំផុតមួយរបស់ប្រជាជាតិខ្លួន។ នេះបើតាមការចុះផ្សាយរបស់ទស្សនាវដ្តី Foreign Policy ។
តាមរយៈប្រវត្តិសាស្ត្រដែលវៀតណាមពិបាកនឹងបំភ្លេច ចិនធ្លាប់ចូលត្រួតត្រាវៀតណាមអស់រយៈពេលជាងមួយសតវត្ស មុននឹងខ្លួនវាយដណ្តើមយកឯករាជ្យមកវិញក្នុងឆ្នាំ ៩៣៨ ។ ហើយកាលពីឆ្នាំ១៩៧៩ ក្រុងប៉េកាំងបានឈ្លានពានវៀតណាមទៀត ក្រោយពីក្រុងហាណូយបានជួយវាយរំលំរបបខ្មែរក្រហមនៅកម្ពុជា ដែលកាលនោះចិនគាំទ្រ។ ជាលទ្ធផល សង្គ្រាមរយៈពេលខ្លី ត្រឹមមួយខែប៉ុណ្ណោះ បានផ្ទុះឡើង ដែលបណ្តាលឲ្យមនុស្ស៧ម៉ឺននាក់ស្លាប់។
ថ្វីបើទំនាក់ទំនងរវាងប្រទេសទាំងកម្មុយនីស្តទាំងពីរ មានភាពល្អប្រសើរច្រើនចាប់តាំងពីទសវត្សរ៍ឆ្នាំ១៩៩០មកក្តី វៀតណាម នៅរក្សាស្មារតីប្រុងប្រយ័ត្នខ្ពស់ចំពោះប្រទេសជិតខាងដ៏មានឥទ្ធិពលជាងខ្លួនទាំងផ្នែកសេដ្ឋកិច្ច និងយោធាមួយនេះ។ ទន្ទឹមនឹងគ្នានេះ ភាពតានតឹងរវាងចិន និងវៀតណាម នៅតែកើតមានឡើង ជាពិសេសការប្រឈមមុខដាក់គ្នាក្នុងជម្លោះសមុទ្រចិនខាងត្បូង។ ខណៈចិនព្យាយាមធ្វើយោធូបនីយកម្មនៅទីនោះ វៀតណាមឯណោះវិញ កំពុងអូសទាញអាមេរិកពាក់ព័ន្ធក្នុងសំណុំរឿងនេះកាន់តែខ្លាំងផងដែរ៕
Tag:
វៀតណាម
បច្ចេកវិទ្យា
ប្រព័ន្ធ 5G
© រក្សាសិទ្ធិដោយ thmeythmey.com
