លោក សម រង្ស៊ី៖ មានប៉ូលបី ដែលអាចផ្តួលលោក ហ៊ុន សែន

ជាតិ

នយោបាយជាតិ

លោក សម រង្ស៊ី៖ មានប៉ូលបី ដែលអាចផ្តួលលោក ហ៊ុន សែន

14, May 2019 , 10:18 am

រូបភាព

លោក សម រង្ស៊ី ថ្លែងទៅកាន់អ្នកគាំទ្រក្នុងរាជធានីភ្នំពេញ កាលអំឡុងឆ្នាំ២០១៣ (រូបពី AFP)

ដោយ: ថ្មីៗ

កម្លាំងប្រដាប់អាវុធ កម្លាំងប្រជាពលរដ្ឋខ្មែរ និង ប្រទេសជិតខាង ត្រូវបានលោក សម រង្ស៊ី មេដឹកនាំក្រុមប្រឆាំង ហៅថា «រង្វង់ទាំងបី» ដែលអាចផ្តួលរំលំរដ្ឋាភិបាលរបស់សម្តេច ហ៊ុន សែន។ លោក លើកពីយុទ្ធសាស្ត្រទាំងបីនេះ ក្នុងកិច្ចប្រជុំនៃអតីតគណបក្សសង្គ្រោះជាតិ នៅរដ្ឋកាលីហ្វ័រញ៉ា សហរដ្ឋអាមេរិក នាថ្ងៃទី១២ ខែឧសភា ឆ្នាំ២០១៩។

លោក សម រង្ស៊ី ថ្លែងថា កម្លាំងប្រដាប់អាវុធ នឹងងាកមកគាំទ្រខាងលោកនិងប្រជាពលរដ្ឋវិញ។ លោក អះអាងថា មានកម្លាំងប្រដាប់អាវុធខ្លះ មិនពេញចិត្តនឹងទង្វើរបស់រដ្ឋាភិបាលនោះទេ តែគ្រាន់តែមិនទាន់ហ៊ានបញ្ចេញសកម្មភាព។

ស្របជាមួយគ្នានេះ មេដឹកនាំក្រុមប្រឆាំងរូបនេះ ជឿជាក់ថា ប្រជាពលរដ្ឋកម្ពុជានៅក្រៅប្រទេស នឹងសម្រុកចូលមកកម្ពុជាជាមួយក្រុមលោក ដើម្បីរួមកម្លាំងគ្នាផ្លាស់ប្តូរ។ លោក ថែមទាំងព្រមានថា លោក និងប្រជាពលរដ្ឋ នឹងចាប់សម្តេច ហ៊ុន សែន។

លោក បន្តថា ប្រទេសជិតខាង ដែលរងផលប៉ះពាល់ ដោយសារតែសម្តេច ហ៊ុន សែន គាំទ្រចិន ក៏អាចនឹងលូកដៃដែរ។ លោក យល់ថា ប្រទេសទាំងនោះ មិនបណ្តោយឲ្យសម្តេច ហ៊ុន សែន បើកដៃឲ្យចិន ដើម្បីគំរាមកំហែងពួកគេឡើយ ជាពិសេសពាក់ព័ន្ធនឹងបញ្ហាសមុទ្រចិនខាងត្រូង។

លោក ផៃ ស៊ីផាន អ្នកនាំពាក្យរដ្ឋាភិបាល បានហៅការឃោសនារបស់លោក សម រង្ស៊ី ថាគ្រាន់តែជាសង្គ្រាមចិត្តសាស្ត្រប៉ុណ្ណោះ ដែលមិនអាចទៅរួចនោះទេ។ លោក យល់ថា លោក សម រង្ស៊ី ប្រឹងនិយាយបែបនេះ គឺចង់ឲ្យមហាជន បន្តចាប់អារម្មណ៍លើលោក។ លោក ចំអកឲ្យលោក សម រង្ស៊ី យ៉ាងដូច្នេះថា៖«គេលែងទទួលស្គាត់គាត់ហើយ»។

អ្នកនាំពាក្យរូបនេះ បន្ថែមថា លទ្ធផលបោះឆ្នោត គឺជាសញ្ញាដែលបញ្ជាក់ថា ប្រជាពលរដ្ឋកម្ពុជា បានគាំទ្រសម្តេច ហ៊ុន សែន និងគណបក្សប្រជាជនកម្ពុជា។

លោក សម រង្ស៊ី ប្រកាសថា លោក នឹងវិលមកកម្ពុជាវិញនៅឆ្នាំ២០១៩។ លោក បង្ហើបថា លោក នឹងឆ្លងកាត់តាមប្រទេសថៃ។

អត្ថបទទាក់ទង

លោក សម រង្ស៊ី បង្ហើបថា «តិចទៀត លោកចូលមកតាមថៃ...»

ថ្មីៗនេះ សម្តេចនាយករដ្ឋមន្ត្រី បានចេញលិខិតបង្គាប់ឲ្យមន្ត្រីថ្នាក់ក្រោម ចុះទៅពន្យល់ប្រជាពលរដ្ឋនៅគ្រប់មូលដ្ឋាន អំពីផលវិបាកនៃការផ្តួលរំលំរដ្ឋាភិបាល និង ផែនការនៃការវិលត្រឡប់របស់លោក សម រង្ស៊ី៕