កីឡាជាតិ
ជាតិ
ទីលានបាល់ទាត់មរតកតេជោស្ថាបនាបាន៥០ភាគរយ ខណៈកម្ពុជាស្នើចិនជួយគ្រប់គ្រងដល់ឆ្នាំ២០២៣ លោក ថោង ខុន ថ្លែងក្នុងពិធីអបអរការបញ្ចប់ការដំឡើងបង្គំសំខាន់ៗនៃពហុកីឡដ្ឋានជាតិមរតកតេជោ, រូបភាពពី NOCC
× ទីលានបាល់ទាត់នៃពហុកីឡដ្ឋានជាតិមរតកតេជោ ដែលជាសមិទ្ធផលដំណាក់កាលទី២ ស្ថាបនារួចរាល់បានប្រមាណ៥០ភាគរយហើយគិតត្រឹមពាក់កណ្តាលខែឧសភានេះ។ ពហុកីឡដ្ឋាននេះ គ្រោងបញ្ចប់ការសាងសង់ជាស្ថាពរនៅចុងឆ្នាំ២០២០ ខណៈ ថ្នាក់ដឹកនាំកម្ពុជា គ្រោងស្នើរដ្ឋាភិបាលចិន ជួយគ្រប់គ្រង និងមើលថែរហូតដល់កម្ពុជាធ្វើជាម្ចាស់ផ្ទះការប្រកួតកីឡាស៊ីហ្គេមនៅឆ្នាំ២០២៣។
លោក ថោង ខុន ប្រធានគណៈកម្មាធិការជាតិអូឡាំពិកកម្ពុជាបានវាយតម្លៃថា ទីលានបាល់ទាត់ពហុកីឡដ្ឋានជាតិមរតតតេជោ ដែលជាសមិទ្ធផលដំណាក់កាលទី២ ស្ថាបនាបានប្រមាណ៥០ភាគរយហើយ គិតត្រឹមពាក់កណ្តាលខែឧសភានេះ ក្រោយបើកការដ្ឋានសាងកាលពីអំឡុងខែមេសា ឆ្នាំ២០១៧។ ការវាយតម្លៃនេះពេល លោក ចូលរួមក្នុងកម្មវិធីអបអរនៃការបញ្ចប់ការដំឡើងគ្រឿងបង្គំសំខាន់ៗ នៃពហុកីឡដ្ឋានកាលពីថ្ងៃទី១២ ខែឧសភា ឆ្នាំ២០១៩។
រដ្ឋមន្ត្រីក្រសួងទេសចរណ៍រូបនេះបន្ថែមថា ទីលានបាល់ទាត់លំដាប់អន្តរជាតិមួយនេះគ្រោងបញ្ចប់ការសាងសង់ជាស្ថាពរនៅចុងឆ្នាំ២០២០។ ប៉ុន្តែលោកគ្រោងស្នើឲ្យភាគចិនជួយគ្រប់គ្រង និងមើលថែរហូតដល់កម្ពុជាធ្វើជាម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣។
«ដំណើរការសាងសង់កីឡដ្ឋានសម្រេចបាន៥០ភាគរយ ការដំឡើងថាសបង្គំកៅអីអង្គុយសម្រេចបាន៧០ភាគរយ សម្ភារបរិក្ខាសាងសង់សម្រាប់ប្រើប្រាស់ដំណើរការសាងសង់ និងគ្រឿងបង្គំ គឺបាននាំចូលមកដល់ការដ្ឋាន១០០ភាគរយ។ ការដ្ឋានសាងសង់នេះត្រូវចំណាយពេលប្រមាណ៤០ខែ ដោយបញ្ចប់នៅចុងឆ្នាំ២០២០។ ក្នុងឱកាសនេះ ខ្ញុំសុំស្នើឲ្យភាគីចិនបន្តជួយគ្រប់គ្រងកីឡដ្ឋាននេះ ពិសេសជួយបង្ហាត់បង្រៀនដល់អ្នកជំនាញកម្ពុជាក្នុងការគ្រប់គ្រងកីឡដ្ឋានរហូតចប់ស៊ីហ្គេមឆ្នាំ២០២៣»។ នេះជាការលើកឡើងរបស់លោក ថុង ខុន។
ការដ្ឋានសាងសង់ពហុកីឡដ្ឋានមរតកតេជោដំណាក់កាលទី២នេះ ប្រើប្រាស់កម្មករ និងកម្មករជំនាញប្រមាណ៨០០នាក់ ដោយបានផ្តល់ការងារដល់ប្រជាពលរដ្ឋកម្ពុជាជាង៣០០នាក់ ខណៈក្រៅពីនេះជាជនជាតិចិន។
ទីលានបាល់ទាត់លំដាប់អន្តរជាតិនេះ ជាជំនួយឥតសំណងរបស់រដ្ឋាភិបាលចិន ដោយគ្រោងចំណាយជាង១៥៧លានដុល្លារ។ កីឡដ្ឋាននេះអាចផ្ទុកអ្នកទស្សនាប្រមាណ៦ម៉ឹននាក់ ពិសេសអ្នកជំនាញបានរៀបចំច្រកចេញពិសេស ដែលអាចជម្លៀសអ្នកគាំទ្រត្រឹមតែ៧នាទី ពេលមានហេតុការមិនប្រក្រតីកើតឡើង៕
Tag:
ថោង ខុន
ពហុកីឡដ្ឋានជាតិមរតកតេជោ
© រក្សាសិទ្ធិដោយ thmeythmey.com