អន្តរជាតិ
របបសឹកថៃ រងការរិះគន់ព្រោះតែងតាំងសាច់ញាតិនិងបក្សពួកជាសមាជិកព្រឹទ្ធសភា មេបញ្ជាការកម្លាំងប្រដាប់អាវុធទាំងបីប្រភេទ និងមេប៉ូលិសជាតិថៃ សុទ្ធតែមានឈ្មោះជាសមាជិកព្រឹទ្ធសភា។ រូបភាព The Nation
× របបយោធាថៃ កំពុងរងការរិះគន់យ៉ាងខ្លាំងជុំវិញការតែងតាំងសាច់ញាតិ និងបក្សពួករបស់មេដឹកនាំយោធាសំខាន់ៗជាសមាជិកព្រឹទ្ធសភា។ បើតាមបញ្ជីឈ្មោះដែលចុះផ្សាយក្នុងសៀវភៅរាជកិច្ចនៅថ្ងៃទី១៤ ខែឧសភា ពីរភាគបីនៃសមាជិកព្រឹទ្ធសភាក្នុងចំណោម២៥០រូប មានទំនាក់ទំនងជិតស្និទ្ធជាមួយរបបសឹកថៃ និងមានប្រវត្តិជាយោធា និងប៉ូលិសទៅទៀត។ ការណ៍នេះធ្វើឲ្យមានរិះគន់ថា ព្រឹទ្ធសភាគ្រាន់តែជាអាយ៉ងសម្រាប់ការបន្តអំណាចរបស់លោក ប្រាយុទ្ធ ចន្ទអូចា ប៉ុណ្ណោះ។
សមាជិកគ្រួសារថ្នាក់ដឹកនាំរដ្ឋាភិបាលយោធា មេបញ្ជាការកងកម្លាំងប្រដាប់អាវុធ និងអ្នកនយោបាយស្និទ្ធិរបបយោធាកាន់អំណាចជាច្រើនទៀត បានគ្របដណ្ដប់បញ្ជីឈ្មោះសមាជិកព្រឹទ្ធសភាទាំង២៥០រូប។ រដ្ឋធម្មនុញ្ញថៃបច្ចុប្បន្ន បើកសិទ្ធិឲ្យក្រុមប្រឹក្សាជាតិដើម្បីសន្តិភាព និងសណ្ដាប់ធ្នាប់មានលោក ប្រាយុទ្ធ ចន្ទអូចា ជាប្រធាន តែងតាំងសមាជិកព្រឹទ្ធសភាសម្រាប់អាណត្តិ៥ឆ្នាំ ហើយអាចចូលរួមជ្រើសរើសនាយករដ្ឋមន្ត្រីបានទៀតផង។
ដោយសាររឿងនេះ របបយោធាថៃ មិនអាចប្រថុយរកអ្នកផ្សេងឲ្យអង្គុយកៅអីព្រឹទ្ធសភាបានឡើយ ព្រោះអាចប៉ះពាល់ការបន្តអំណាចរបស់លោក ប្រាយុទ្ធ ។ ក្នុងបញ្ជីឈ្មោះសមាជិកព្រឹទ្ធសភា២៥០រូបដែលត្រូវបានមហាក្សត្រ មហា វជិរាលង្ករណ៍ ឯកភាពហើយនោះ សមាជិក១៦០រូប មានទំនាក់ទំនងជិតស្និទ្ធនឹងរបបសឹកថៃ ហើយក្នុងចំណោមសមាជិកព្រឹទ្ធសភាទាំងអស់ មានជាងមួយរយនាក់ទៅហើយជាយោធាដែលអ្នកខ្លះកំពុងបម្រើការងារ ឯខ្លះទៀតចូលនិវត្តន៍។
ក្នុងចំណោមសមាជិកព្រឹទ្ធសភាទាំងនោះ គេឃើញមាន ឧត្តមសេនីយ៍ Preecha Chan-o-cha ប្អូនប្រុសបង្កើតលោក ប្រាយុទ្ធ , ឧត្តមសេនីយ៍ Sisthawatchara Wongsuwan ជាប្អូនប្រុសលោកឧបនាយករដ្ឋមន្ត្រី ប្រាវីត វង្សសុវណ្ណ, ឧត្តមនាវី Chalermchai Krea-ngam ប្អូនប្រុសឧបនាយករដ្ឋមន្ត្រី Wissanu Krea-gnam និងលោក Som Jatusripitak បងប្រុសឧបនាយករដ្ឋមន្ត្រី Somkid Jatusripitak ។ នេះមិនទាន់គិតដល់អតីតរដ្ឋមន្ត្រី និងអតីតសមាជិកសភាជាច្រើនទៀត។
លោក ប្រាយុទ្ធ ដែលជាអ្នកសម្រេចចុងក្រោយលើបញ្ជីឈ្មោះមុនបញ្ជូនទៅកាន់រាជវាំង និងលោក Prawit ដែលជាអ្នកចុចឈ្មោះមុនស្នើទៅលោក ប្រាយុទ្ធ នោះ រងការរិះគន់ខ្លាំង និងត្រូវបានចោទប្រកាន់ពីការប្រកាន់បក្សពួកនិយម។ បើតាមកាសែតថៃ The Nation មេដឹកនាំចលនាអាវក្រហមម្នាក់និយាយថា ប្រជាជនថៃមិនអាចដាក់ក្ដីរំពឹងលើរបបយោធាដើម្បីវិលត្រឡប់ទៅរកប្រជាធិបតតេយ្យវិញឡើយ ព្រោះសមាជិកព្រឹទ្ធសភានឹងគាំទ្ររបបសឹកបន្តទៀត។
ជាមួយនឹងសំឡេងគាំទ្រពីសមាជិកព្រឹទ្ធសភា លោក ប្រាយុទ្ធ ទំនងសម្លឹងឃើញជាស្រេចកៅអីនាយករដ្ឋមន្ត្រីសម្រាប់អាណត្តិបួនឆ្នាំទៅមុខ។ បក្សកម្លាំងប្រជារាស្ត្រដែលគាំទ្រលោក ប្រាយុទ្ធ នោះ កំពុងប្រមូលសំឡេងពីបក្សផ្សេងទៀតដើម្បីឲ្យគ្រប់សំឡេងចំនួន៣៧៦ ដែលត្រូវការដើម្បីគាំទ្របេក្ខភាពណាមួយជានាយករដ្ឋមន្ត្រី។ ៣៧៦ ជាសំឡេងភាគច្រើនដាច់ខាតនៃកិច្ចប្រជុំរួមរវាងព្រឹទ្ធសភា និងរដ្ឋសភាដែលមានសមាជិក៥០០នាក់៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com