ជាតិ
«ឈ្នក់» ជាឧបករណ៍នេសាទបែបបុរាណ នៅតែពេញនិយមប្រើប្រាស់នៅតាមដឹងស្ទឹងសង្កែ ឧបករណ៍នេសាទខ្នាតធំ «ឈ្នក់» ស្ថិតនៅក្នុងស្ទឹងសង្កែ នាភូមិពាមសីមា ឃុំព្រៃចាស់ ស្រុកឯកភ្នំ ខេត្តបាត់ដំបង។ រូបភាព៖ ឈុត ឈាណា / អច្ឆរិយភាពនៃទន្លេមេគង្គ
× ឧបករណ៍នេសាទខ្នាតធំ «ឈ្នក់» ជាឧបករណ៍នេសាទ ដែលមានប្រើប្រាស់ក្នុងប្រទេសកម្ពុជា ជាយូរណាស់មកហើយ។ ឧបករណ៍ «ឈ្នក់» ត្រូវបានគេដាក់នៅលើទូកពីរគ្រឿងដែលចងភ្ជាប់គ្នា ឬនៅលើក្បូនឬស្សី។ ឧបករណ៍ «ឈ្នក់» ដែលដាក់នៅលើក្បូនឬស្សី ត្រូវបានគេឃើញមានប្រើប្រាស់ជាទូទៅនៅតាមដងស្ទឹងសង្កែ ក្នុងខេត្តបាត់ដំបង និងនៅតំបន់មួយចំនួនទៀតក្នុងខេត្តកំពង់ចាម។ ចំពោះ ឧបករណ៍ «ឈ្នក់» ដែលដាក់នៅផ្ទាល់ដី គេឃើញមានប្រើនៅក្នុងតំបន់វាលទំនាបលិចទឹក ក្នុងខេត្តតាកែវ។
នៅតាមដងស្ទឹងសង្កែ ឧបករណ៍ «ឈ្នក់» ត្រូវបានគេប្រើដោយមានជំនួយពីរបាំងព្រួលនៅពីមុខ ដែលគេដាក់នៅក្នុងចរន្តទឹកដែលហូរចូលទៅក្នុងបឹងទន្លេសាប រវាងខែមករា ដល់ខែមិនា ពេលដែលត្រីធ្វើចរាចរផ្លាស់ទីចេញទៅខ្សែទឹកខាងលើ ខណៈពេលដែលទឹកបឹងចាប់ផ្តើមស្រក។ ឧបករណ៍ «ឈ្នក់» ភាគច្រើនបុរសជាអ្នកប្រើ ចំណែកឯស្ត្រី និងកុមារ ជាអ្នកជួយប្រមូលត្រី និងយកត្រីនៅលក់។
ត្រីដែលចាប់បានដោយ ឧបករណ៍ «ឈ្នក់» មានដូចជា៖ ត្រីរៀល (Gymnostomus spp.) ត្រីឆ្ពិន (Barbonymus gonionotus) ត្រីអាចម៍កុក (Labiobarbus siamensis ) ត្រីស្លឹកឬស្សី (Paralaubuca spp.) ត្រីឆ្កោក (Cyclocheilos enoplos ) ត្រីលិញ (Thynnichthys thynnoides) ត្រីច្រកែង (Puntioplites spp.) ត្រីស្រកាក្តាម (Cyclocheilichthys apogon) ត្រីក្រុស (Osteochilus spp.) ត្រីកំភ្លាញ (Trichopodus pectoralis)។ល។
ប៉ុន្មានចុងក្រោយនេះ ឧបករណ៍នេសាទខុសច្បាប់ដែលមានភ្ជាប់ដោយចរន្តអគ្គិសនី ជាទូទៅ វាមានប្រសិទ្ធិភាពណាស់ ក្នុងការចាប់ត្រីដោយចំនួនច្រើនក្នុងពេលខ្លី និងងាយស្រួលនោះ បានចូលមកជំនួយឧបករណ៍នេសាទបែបបុរាណរបៀបនេះ តាមបែបលួចលាក់ បួករួមទាំងការបាត់បង់ទីជម្រកលាក់ខ្លួន ពង-កូនផងដែរនោះ បានធ្វើឲ្យត្រីគ្រប់ប្រភេទ មាននិន្នការធ្លាក់ចុះយ៉ាងខ្លាំង ។
© រក្សាសិទ្ធិដោយ thmeythmey.com