កីឡាករយូដូម្នាក់អស់សិទ្ធិទៅវគ្គបន្ត ក្រោយធ្លាក់ទូរសព្ទពីអាវអំឡុងពេលប្រកួត

កីឡាអន្តរជាតិ

អន្តរជាតិ

កីឡាករយូដូម្នាក់អស់សិទ្ធិទៅវគ្គបន្ត ក្រោយធ្លាក់ទូរសព្ទពីអាវអំឡុងពេលប្រកួត

15, May 2019 , 5:51 pm

រូបភាព

ដោយ: ទេព ពិទូរ្យ

កីឡាករយូដូ Anri Egutidze ត្រូវបានអាជ្ញាកណ្តាលសម្រេចកាត់សេចក្តីឲ្យចាញ់តែម្តងក្រោយធ្លាក់ទូរសព្ទដៃពីសម្លៀកបំពាក់អំឡុងការប្រកួតមួយក្នុងព្រឹត្តិការណ៍កីឡា Judo Tour ឆ្នាំ ២០១៩ លំដាប់ Gran Slam នាទីក្រុងបាគូ ប្រទេសអាស៊ែបៃហ្សង់។

ហេតុការណ៍ដ៏គួរឲ្យភ្ញាក់ផ្អើលនេះបានកើតឡើងកាលពីចុងសប្តាហ៍មុននាការប្រកួតយូដូ ផ្នែកបុរសប្រភេទទម្ងន់ ៨១ គីឡូក្រាមរវាងកីឡាករព័រទុយហ្គាល់ Egutidze និងគូប្រជែង Robin Pacek សញ្ជាតិស៊ុយអែត។

ខណៈដែល Pacek ព្យាយាមយកដៃចាប់ទៅលើគូប្រកួត ភ្លាមនោះទូរសព្ទក៏ធ្លាក់ចេញពីអាវ (kimono) របស់កីឡាករ Egutidze ហើយអាជ្ញាកណ្តាលបានបញ្ឈប់ការប្រកួតតែម្តង។

កីឡាករយូដូវ័យ ២៣ ឆ្នាំដែលមានដើមកំណើតហ្សកហ្ស៊ីយល់ព្រមទទួលខុសត្រូវផ្នែកបច្ចេកទេសចំពោះការនាំយកវត្ថុដែលមិនមានការអនុញ្ញាតទៅលើក្តាតាពីប្រកួត។ អ្នករៀបចំការប្រកួតក៏បានព្រមប្រៀងគ្នាឲ្យ Egutidze ធ្លាក់ចេញពីព្រឹត្តិការណ៍នោះតែម្តង។

រឿងរ៉ាវដ៏កម្រនេះបានធ្វើអោយអ្នកប្រើប្រាស់បណ្តាញសង្គមជាច្រើនសើចចំអកទៀតផង។ អ្នកខ្លះលើកឡើងថា Egutidze ច្បាស់ជាភ្លេចយកទូរសព្ទចេញពីឯកសណ្ឋានមុនការប្រកួត។

អ្នកខ្លះទៀតថា«ប្រហែលគាត់ចង់ដឹងពីចង្វាក់បេះដូង និងកាឡូរីរបស់គាត់តាមរយៈ Google Health ឬ Strava »។

ហើយក៏មានអ្នកចំអកបែបលេងសើចថា ប្រហែលជា Egutidze ត្រូវការ Update ហ្វេសប៊ុករបស់ខ្លួនអំឡុងការប្រកួតនោះ៕