អាជ្ញាធរពន្យល់ «ហេតុអ្វី ធ្វើផ្លូវរួច ហើយកាយផ្លូវ ដាក់លូតាមក្រោយ?»

ជាតិ

សង្គមជាតិ

អាជ្ញាធរពន្យល់ «ហេតុអ្វី ធ្វើផ្លូវរួច ហើយកាយផ្លូវ ដាក់លូតាមក្រោយ?»

15, May 2019 , 7:59 pm

រូបភាព

សកម្មភាពដាក់លូក្រោមផ្លូវជាតិលេខ២ ក្នុងសង្កាត់ចាក់អង្រែ ខណ្ឌមានជ័យ

ដោយ: ថ្មីៗ

អាជ្ញាធរ បានកាយផ្លូវប្រវែង៦៥០ម៉ែត្រ នៅលើផ្លូវជាតិលេខ២ ក្នុងសង្កាត់ចាក់អង្រែ ខណ្ឌមានជ័យ ដើម្បីដាក់លូ។ ប្រតិបត្តិការរបស់អាជ្ញាធរ នាំឲ្យមហាជន ពិសេសអ្នកប្រើប្រាស់បណ្តាញសង្គម សើចចំអកនិងរិះគន់។ ពួកគេ ឆ្ងល់ថា ហេតុអ្វី បានជាមិនដាក់លូឲ្យហើយតែម្តងទៅ ពេលចាប់ផ្តើមធ្វើផ្លូវ ចាំបាច់ធ្វើផ្លូវរួចហើយ បានមកកាយផ្លូវដាក់លូតាមក្រោយ?

មន្ទីរសាធារណការ និងដឹកជញ្ជូនរាជធានីភ្នំពេញ បានបង្ហោះសារលើទំព័រហ្វេសប៊ុក (Status) ដើម្បីបកស្រាយពីរឿងនេះ។ បើផ្អែកតាមសាររបស់មន្ទីរសាធារណការ អាជ្ញាធរ ពុំបានដាក់លូក្នុងចិញ្ចើមផ្លូវទេ គឺដាក់ក្នុងសាច់ផ្លូវ (ទ្រូងផ្លូវ)។ វា មានន័យថា ក្នុងចិញ្ចើមផ្លូវនោះ មានលូរួចស្រាប់ទៅហើយ ហើយអាជ្ញាធរ ដាក់លូបន្ថែមក្នុងសាច់ផ្លូវ។

មន្ទីរសាធារការ ពន្យល់ថា មូលហេតុ ដែលអាជ្ញាធរ មិនរុះរើលូក្នុងចិញ្ចើមផ្លូវ ដោយរក្សាទុកដដែល ហើយទៅធ្វើលូបន្ថែមនៅក្នុងសាច់ផ្លូវ គឺដោយសារតែខ្លាចប៉ះពាល់បណ្តាញខ្សែកាបអគ្គិសនីក្រោមដីតង់ស្យុងខ្ពស់ ហើយម្យ៉ាងទៀត ចិញ្ចើមផ្លូវនោះ មានបង្គោលអគ្គិសនី ដើមឈើ និងបំពង់មេរដ្ឋករទឹក។ មន្ទីរសាធារណការ បញ្ជាក់បែបនេះថា «ការដ្ឋានដាក់បណ្តាញលូមេ មិនអាចដាក់លូក្រោមចិញ្ចើមផ្លូវបានទេ ដោយពង្វាងការដាក់លូក្នុងសាច់ផ្លូវវិញ»។

មន្ទីរសាធារណការ សរសេរទៀតថា «ដើម្បីចៀសវាងការដាច់ចរន្តអគ្គសនីក្នុងរាជធានីភ្នំពេញ ដែលបណ្តាលមកពីការរុះរើបណ្តាញអគ្គិសនីក្រោមដីតង់ស្យុងខ្ពស់ ការចំណាយថវិកាអស់ច្រើន ពេលវេលាយូរ និង ដើម្បីជំរុញការដោះស្រាយបញ្ហាទឹកលិចធ្ងន់ធ្ងរ ឲ្យទាន់ក្នុងរដូវវស្សានេះ ក្រុមហ៊ុនម៉ៅការសាងសង់ បានស្នើសុំដាក់លូក្នុងសាច់ផ្លូវ ដោយធានាជួសជុលឲ្យបានដូចដើម។ ឯការចំណាយ ជាបន្ទុករបស់ក្រុមហ៊ុនផ្ទាល់»។

ការបកស្រាយរបស់មន្ទីរសាធារណការ ទំនងជាចង់មានន័យថា ចិញ្ចើមផ្លូវនោះ មិនមែនមិនមានលូទេ គឺមានរួចហើយ តែដោយសារតែលូនោះតូច ទើបអាជ្ញាធរ សម្រេចដាក់លូបន្ថែម ដែលមានទំហំធំជាងមុន នៅក្រោមសាច់ផ្លូវ ដើម្បីដោះស្រាយបញ្ហាទឹកលិច។

មន្ទីរសារធារណការ មានសារ (Comment) បន្ថែមទៀត ជុំវិញចម្ងល់នេះ។ មន្ទីរសាធារណការ ពន្យល់បែបនេះថា «ផ្លូវនេះ ត្រូវបានស្ថាបនាគ្រឹះថ្នល់ តាំងពី២៤ឆ្នាំមុន ហើយខ្សែអគ្គិសនីតង់ស្យុងខ្ពស់ ក្រោមចិញ្ចើមផ្លូវនោះ មានតាំងពីសម័យសង្គមរាស្ត្រនិយមមកម្ល៉េះ»។

មន្ទីរសាធារណការ បន្តថា បណ្តាញលូក្នុងចិញ្ចើមផ្លូវ គឺចាស់ ពុកផុយ មានទំហំតូច (ទំហំតែ ០.៣ ម៉ែត្រ) ហើយអាយុកាលជាង៥០ឆ្នាំ ដែលធ្វើឲ្យផ្លូវនេះ តែងតែលិចទឹកនៅរដូវវស្សា។ មន្ទីរសាធារណការ បន្ថែមថា បំពង់លូតូចនេះ ដាក់ពីលើខ្សែអគ្គិសនីក្រោមដី ដូច្នេះ ពេលប្តូរទៅជាលូធំទំហំ១ម៉ែត្រវិញ នឹងបណ្តាលឲ្យជួបផលប៉ះពាល់ដល់ខ្សែអគ្គិសនី។

«បណ្តាញលូក្នុងរាជធានីភ្នំពេញ សម័យមុនមកដល់ពេលនេះមានអាយុកាលពី៥០ទៅ៦០ឆ្នាំ មានសភាពចាស់ ទំហំតូច សម្រាប់ប្រជាជនរស់នៅ ៣០ម៉ឺននាក់។ ប៉ុន្តែបច្ចុប្បន្ន យើងមានប្រជាជន៣លាននាក់ ដែលធ្វើឲ្យបណ្តាញលូមិនអាចទ្រទ្រង់បរិមាណទឹកដ៏ច្រើនបាន ដែលត្រូវការជីកដាក់លូធំថ្មី បណ្តាញអគ្គិសនីប្រើប្រាស់កើនឡើងខ្ពស់តាមការអភិវឌ្ឍ ដែលចាំបាច់ត្រូវការជីកផ្លូវកប់ខ្សែអគ្គិសនីថ្មី បណ្តាញខ្សែកាបអុបទិក ដំណាក់កាលអភិវឌ្ឍពិតជាលំបាក និងទទួលការរិះគន់»។ នេះជាសាររបស់មន្ទីរសាធារណការក្នុង Comment ដដែល។

មន្ទីរសាធារណការ បានឲ្យដឹងថា នៅរាជធានីភ្នំពេញ មានបណ្តាញលូតែជាង៧០០គីឡូម៉ែត្រ ខណៈផ្លូវមានរហូតដល់ ទៅជិន២ពាន់គីឡូម៉ែត្រឯណោះ។ មន្ទីរសាធារណការ លើកឡើងថា «ជាបច្ចេកទេស លូ ត្រូវការដាក់សងខាងផ្លូវយ៉ាងតិចប្រវែង៣៧៦៦គីឡូម៉ែត្រដែរ ដូច្នេះ យើងនៅខ្វះបណ្តាញលូ៣០៥១គីឡូម៉ែត្រ ត្រូវជា៨១ភាគរយទៀត ដែលត្រូវកសាង»៕