ជាតិ
ព្រះមហាក្សត្រយាងមកដល់រាជធានីភ្នំពេញវិញហើយ ក្រោយបញ្ចប់ព្រះរាជកិច្ចនៅប៉េកាំង
×![]()
ដោយ: ថ្មីៗ
ព្រះករុណាព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី ស្តេចយាងមកដល់រាជធានីភ្នំពេញវិញហើយ នារសៀលថ្ងៃព្រហស្បតិ៍ ទី១៦ ខែឧសភា នេះ តាមព្រះរាជទីនាំងយន្តហោះពិសេស បន្ទាប់ពីព្រះករុណាជាអម្ចាស់ បញ្ចប់ព្រះរាជកិច្ចក្នុងការយាងចូលរួមវេទិកាអរិយធម៌អាស៊ីលើកទី១នៅក្រុងប៉េកាំង ប្រទេសចិន។
អត្ថបទទាក់ទង
សម្តេច សាយ ឈុំ ប្រធានព្រឹទ្ធសភា សម្តេច ហេង សំរិន ប្រធានសភា និងសម្តេចនាយករដ្ឋមន្ត្រី ហ៊ុន សែន រួមទាំងថ្នាក់ដឹកនាំជាច្រើនរូបទៀត បានអញ្ជើញទទួលព្រះរាជដំណើរ ព្រះមហាក្សត្រ នៅអាកាសយានដ្ឋានអន្តរជាតិភ្នំពេញ ដោយផ្ទាល់។
នាវេទិកាអរិយធម៌អាស៊ីដែលជាគំនិតផ្ដួចផ្ដើមរបស់ប្រធានាធិបតីចិន លោក ស៊ី ជីនភីង ព្រះករុណា ព្រះមហាក្សត្រកម្ពុជា បានថ្លែងព្រះរាជសុន្ទរកថា ដ៏មានអត្ថន័យពាក់ព័ន្ធបញ្ហាសីលធម៌ គុណធម៌របស់មនុស្សជាតិ។
ព្រះករុណា ទ្រង់បានមានព្រះរាជឱង្កា កាលពីថ្ងៃទី១៥ ខែឧសភា ថា ៖«បច្ចុប្បន្ននេះសាកលលោកយើង កំពុងស្ថិតនៅក្នុងដំណាក់កាលនៃការរីកចម្រើននិងជឿនលឿន ដោយមានជំនាញខាងវិទ្យាសាស្ត្រ និងសម្ភារៈ ដែលមិនធ្លាប់មានពីមុនមក។ ប៉ុន្តែទន្ទឹមនឹងការរីកចម្រើនខាងលើនេះ សីលធម៌ និងអភិសមាចារ (មារយាទដ៏ល្អក្រៃលែង ឬជ្រះថ្លា) ក្នុងជីវភាពសង្គម ក៏មានការស្រុតចុះគួរឲ្យព្រួយបារម្ភណាស់ដែរ។ ភាពអន់ថយនៃសីលធម៌ និងគុណធម៌សង្គម នាំឲ្យមានការប៉ះពាល់យ៉ាងធ្ងន់ធ្ងរដល់សេចក្តីថ្លៃថ្នូរ និងនិរន្តរភាពនៃវប្បធម៌ និងចីរភាពរបស់សង្គមនិយមទៅអនាគត»។
ដើម្បីដោះស្រាយបញ្ហាធ្លាក់ចុះសីលធម៌ និងគុណធម៌ នៅក្នុងតំបន់នេះ ព្រះមហាក្សត្រ មានព្រះរាជបន្ទូលជំរុញឲ្យបណ្ដាប្រទេសទាំងអស់ ត្រូវមានភាពស្មោះត្រង់ និងចូលរួមដោះស្រាយបញ្ហារួមគ្នា។ ជាពិសេសពង្រឹងការជឿទុកចិត្ត និងសហការរួមគ្នា លើកិច្ចការអភិវឌ្ឍនៅតំបន់អាស៊ីនេះ៕
Tag:
ព្រះមហាក្សត្រ
© រក្សាសិទ្ធិដោយ thmeythmey.com
